Read Hano Luk 19 Bible Online

Luk 19 - Hano bible

Luk 19

¹Jisas mwa dalin̄oro Jeriko i mwa ban sivi ute gea.

²Haḡe aia lavoa vwate ḡoro harahara homu ihana Sakeus, kea atat rosoga.

³Kea mwa doron maragai be men gita Jisas take bwatuna sinombu ivusi kea mwa hav gita te dumwia bwatuna be kea atat tirigi.

⁴Haḡe kea mwa rov dotomua nin sinombu mwa hae alun gai revrevo be gita Jisas be men vi ḡao la hala gea.

⁵Mahavana be Jisas mwa botui ute gea mwa ḡarere vai amare mwa ḡita Sakeus, mwa bevea be, “Hiv vilvilehi vai ata bwatuna nav togo lol imwamwa garigi.”

⁶Haḡe Sakeus mwa hiv vilvilehi vai ata i mwa lai ḡoḡoe gin samsamwara gaivua.

⁷Mahavana be sinombu ram ḡitae ram bavora ram biavoavo ginira ram bevea be, “Atatu uhu mwa ban gi tausala lol imwan atat vuroga!”

⁸Haḡe Sakeus mwa du amare mwa bevea lalai Ratahigi be “Ron̄oe Ratahigi! Nav lai udun bilaku lalai ira hiru, be nan ruruhi ihei nav vol mulei wani gea vavasi.”

⁹Haḡe Jisas mwa bevea lalainia be, “Varahuva mwa mai ulun imwa uhu garigi, huri be atatu uhu ata alun varan Ebraham mulei.

¹⁰Bwatuna higea Nitun Atatu nu mai be men hiḡe i be men varahura gabe ran sala.”

¹¹Batena be sinombu ram roron̄tainia, Jisas mwa avo rahurahu lalainira alun avoan dalogai. Kekadogaha kea mwa sosori huba gin Jerusalem i kera ram binihia be Rahuan Gara gabe God mwa Ratahigi ḡoro non sinombu alolona mwa abena be men visirai.

¹²I mwa bevea be, “Atatu vwate ata lol tanoi lavoa be mwa ban vai la vanua hautu be ramen taria gi ratahigi lavoa, vuvuri gim siv lol non taritari be vi tabagilu mulei.

¹³Amua mwa siv vano, mwa uloi non atatun non rovoga han̄vulu i mwa lai gaitutuvwai lalainira homu i mwa bevea lalainira be, Giv gitae be giv lol homu uhu vi mauri lol mahavana be nam la dagai.”

¹⁴Take sinombu ata la vanua gea ram barihainia, i ram hora ira horata ataguna be rav vevea be, “Gam, hav doron te atatu uhu be vi vora nomai Ratahigi Lavoa.”

¹⁵Wani gea mwa mai gi Ratahigi Lavoa i mwa dabagil mulei. Haḡe vilvilehi mwa hora huri non atatun rovoga gabe nu hagai homu lalainira be rav mai vai abena be men habwe luae be homu nu mauri kunhanigi.

¹⁶Muana mwa mai mwa bevea be, “Ratahigi, nan lai homu han̄vulu mulei maia be gon laia lalaiau.”

¹⁷Haḡe mwa bevea lalainia be, “Giḡo atatun rovoga tavuha! Bwatuna be gon ḡoḡoi ginau tirigi nav loligo gov lavoa ḡoro bwatun vanua han̄vulu.”

¹⁸Gairuana atatun rovoga mwa mai mwa bevea lalainia be, “Ratahigi, gita nom homu gabe gon laia lalaiau nan lolia nu mauri gailima mulei amare aluna.”

¹⁹Lalainia uhu mwa bevea be, “Gov vora lavoa ḡoro bwatutun vanua gailima.”

²⁰Gaitolun atatun rovoga mwa mai mwa bevea be, “Ratahigi, geki nom homu nan tahulinia lol susuru.

²¹Bwatuna nam mataguinigo, nam iloe be giḡo atat wasi. Gom lai hano be mwa hav vora te nomwa i gom hara dagai hano be gon hav rivua tehe.”

²²Haḡe mwa bevea lalainia be, “Giḡo atatun rovoga hantai! Nav lai mulei nom avoana nav vevegigo ginia! Gom iloe be inau atat wasi, nam lai dagai ginau be mwa hav vora te noḡu i nam hara dagai ginau be nan hav rivua tehe.

²³Huri hano gom hav tau te noḡu homu lol ban̄? Be gos taua nas lai muleinia mai maurianana.”

²⁴“Haḡe mwa bevea lalainira be ran tu aia be, ‘Giv lai dagai homu ninia i giv laia atatun rovoga gabe mwa haḡo han̄vulu.’

²⁵Take ram bevea lalainia be, ‘Ratahigi, kea mwa haḡo han̄vulu huba!’

²⁶Take mwa bwaliura be, ‘Nam bev lalai kimiu be, lalai ira hei gabe ran laia huba vi mom laiana liu lalainira; take lalainia gabe mwa hav haḡoe tehe gaituvwa n̄an be mwa haḡo tirigi ta vi laian dagai ninia.

²⁷Take hurira noḡu ivwalu gabe ram hav doroniau tehe be nav vora nora Ratahigi Lavoa, giv laira vai teti be wehi bamatera lol mataku!’ ”

²⁸Jisas mwa bev vuvuri ginau uhu mwa ban dotomua vai Jerusalem.

²⁹La mahavana be mwa mai sosori gin Betvej mai Betani, la vusin gai Oliv, kea mwa hora non roron̄tai gairua amua,

³⁰mwa bevea be, “Giru van vai la vanua mwa du bavtutu ban aia; mahavana be giru vi haroro giru vi habwe nitui don̄ki nu ligoana batugehi atatu mwa hav togo te aluna radu. Giru vi ribwesia ba laia vai teti.

³¹Be ihei tehe si hudali kimiru huria be huri hano gumuru dugua? Giru vi vevea lalainia be, Ratahigi mwa doronia.”

³²Haḡe ramuru ban ramuru habwe ginau duluai kunia gabe Jisas nu vevea lalainira.

³³Haḡe mahavana gabe ramuru dugu bwaloi don̄ki, vuigina mwa bevea be, “Gumuru dugua huri hano?”

³⁴Haḡe ramuru bwaliua be, “Ratahigi mwa doron be vi haḡo don̄ki huba,”

³⁵i kera ramuru lai don̄ki vai aben Jisas. Haḡe ram bohai gavu la gatiguna vuvuri Jisas mwa dogo aluna.

³⁶Batena be mwa lago sinombu ram lelei gaisagara la hala.

³⁷Mahavana be mwa mai sosori gin Jerusalem, lol ute gabe hala mwa hivo vai la vusin gai Oliv, sinombu ivusi gabe non roron̄tai ram dau bwatuna ram avkari God i ram lol roroania gin silo gaivua huri ginau lalavoa duluai gabe ran gitae.

³⁸Ram bevea be, “God vatavuhai Ratahigi Lavoa gabe mwa mai lol ihamwa! Tamwata amare i God na roroa lol mahao!”

³⁹Haḡe ira Varise rituai alolon sinombu ram avo lalai Jisas ram bevea be, “Vagahi vorotai nom roron̄tai be rasav sosobwero tehe!”

⁴⁰Take Jisas mwa bevea be, “Nam bevea lalai kimiu be, be rav to ḡoḡonai, vatu sibora rav tau bwatuna rav haharigi.”

⁴¹Haḡe kea mwa mai sosori gin bwatutun vanua, i mahavana be mwa ḡitae mwa dan̄ihia,

⁴²mwa bevea be, “Be gos iloe garigi hano gabe mwa doroniana huri tamwata! Take uhugaha gosav gita te dumwia!

⁴³Gubwen̄i vi mai batena nom ivwalu rav haḡo bul ara dalisigo lol davolana duluai.

⁴⁴Rav momogai kaburainigo mai nom sinombu alolon nom ara; vatu gaituvwa si hav togo tehe la tanona, bwatuna be gon hav gita te batoi mahavana huri maiana non God be men varahugo alolona!”

⁴⁵Haḡe Jisas mwa dalin̄oro lol Imwa Tataro mwa ḡoro luara ram leaheahi i ram bolvoligi.

⁴⁶Haḡe mwa bevea be, “God mwa bevea lol Ravrava Sabuga be, ‘Imwaḡu vi uloiana be Imwan Tataro.’ I take kimiu gim lolia gi imwan atat surasura!”

⁴⁷Vataha gubwen̄ Jisas mwa bagahi lol Imwa Tataro. Ira muai tataroi, i ira vagahin Silo, maira tomuai non sinombu ram doron be rav wehia,

⁴⁸take ram hav habwe te dum hala be rav lolia ginia, bwatuna sinombu duluai ram roron̄tai nia, ram hav doron te be rav vahal avoana gaituvwa.