Read Hano Luk 2 Bible Online

Luk 2 - Hano bible

Luk 2

¹Lol mahavan gea Akustus Ratahigi lavoa ata Rom mwa dau avoana be sinombu duluai halaten non silo vevev lol ureure, be rav bilin̄ai ihara.

²Batena ram dau bwatuna ram lai iha, Kwaerinias nu vora tomuai vevev Siria.

³Haḡe sinombu duluai, ram ban n̄oton̄oto, be ramen rav ihara, vataha atatu vai la mwasin bwatutun vanuana.

⁴Josep mwa mwalue nin bwatutun vanua Nasaret lol vanua Kalili huri bwatutun vanua Betlehem lol vanua Judia, ute gabe Deved Ratahigi Lavoa nu vora aia. Josep mwa ban aia bwatuna kea sibona ata la varan Deved.

⁵Nu van be men rav ihara mai Mere gabe nu lai mahalei huba huria. Kea mwa ros atatu huba,

⁶batena kera radu Betlehem, mahavan gubwen̄in Mere mwa malan̄a huri bavavana.

⁷Kea mwa haḡo nituna muai bwana atamwani, mwa nubwae lol gavu, i mwa lidua lol tanon ginau gan buluki bwatuna tanora nu sigai lol imwa tausala.

⁸Aia ira radaiḡoro sipsip rituai la udun vanua gea ran gitaḡoro bilara vatugigi lol bon̄i.

⁹Haḡe enjel non Ratahigi mwa bisirai abera, i sarisarin Ratahigi mwa ḡigita dalisira. I ram matagu maragai,

¹⁰take enjel mwa bevea lalainira be, “Gisav matagu tehe! Huri gita nam bev sera Roroi Tavuha lalai kimiu gabe vi lai samwarana gaivua lalai sinombu duluai.

¹¹Huri Varahu mwa bora lalai kimiu garigi bon̄i la vanuan Deved, kea haḡea Kraes gabe wani Vurai i Ratahigi!

¹²Geki vi vora dovon̄ana lalai kimiu be mwasigi: giv habwe naturigi nu nubwana lol gavu i mwa eno lol tanon ginau gan buluki.”

¹³Haḡe darihou vatugin enjel atamare ram ḡoḡo bulbul aben enjel, ram lol roroai God, ram bevea be

¹⁴“Uloi roron God lol mahao amare, i tamwata la ureure abera atatu gabe God mwa ron̄ mwandavuha ginira!”

¹⁵Batena ira enjel ram dabagil mulei vai amare, ira radaiḡoro ram biavoavo mau ginira ram bevea be, “Tan van vai Betlehem ba ḡita ginau geki gabe mwa loli, be Ratahigi nu vev serae lalai gida.”

¹⁶Haḡe ram la rovrovo ram habwe Mere i Josep mai naturigi mwa en lol tanon ginau gan buluki.

¹⁷Batena ira radaiḡoro ram ḡita vuvuria, ram bev lua avoana non enjel huri naturigi.

¹⁸Haḡe kera duluai gabe ran ron̄oe ram dan̄an̄a maragai gi avoana gabe ira radaiḡoro ran vevea.

¹⁹I Mere mwa ḡoḡoi ḡoro ginau duluai geki lol sibwen̄ina i mwa binbinihi tagaro alura.

²⁰Haḡe ira radaiḡoro ram dabagilu, ram uloi roron God huri ginau duluai gabe ran ron̄oe i ran gitae kun gabe enjel nu vevea lalainira.

²¹Haḡe atagun wik gaituvwa, mahavana mwa mai huri tavdovon̄ana alun naturigi, ram huri ihana gi Jisas, kun gabe enjel nu vevea amua batena naturigi mwa hav bulus te radui ratahina.

²²Mahavana mwa mai huri Josep i Mere be raru vi lol hano Silo non Moses mwa bevea huri lol melmeloi, haḡe ramuru lai naturigi vai Jerusalem be rav lai bisirainia lalai Ratahigi.

²³Geki hano mwa ravae lol silo non Ratahigi be: “Vataha muai bwana atamwani vi vora non Ratahigi.”

²⁴I mulei be raru men tataroi hurin silo non Ratahigi gin bwaloi mwaragi gairua sa bwaloi manbona gairua.

²⁵La mahavan gea atatu vwate ihana Simion nu togo Jerusalem. Kea atat vavtutu mwa ḡogonai God i mwa hohovi huri gubwen̄ ribwesiva nora ata Israel. I Vui Sabuga mwa do maia,

²⁶i nu lol bisirai lalainia be si hav gita te mateana vava vi gita Wani Vurai gabe Ratahigi nu tatauleo huria.

²⁷Haḡe Vui Sabuga mwa domuainia i mwa dalin̄oro lol Imwa Tataro. Mahavana be Mere mai Josep ramuru lai naturigi Jisas vai lol Imwa Tataro be raru men lol lalainia hano Silo mwa bevea,

²⁸Simion mwa lai naturigi mwa saloe i mwa avkari God mwa bevea be:

²⁹“Ratahigi, gon lol nom tatauleo, kadogaha gov lin̄ dumwiau nom atatun rovoga nai van dagai lol tamwata.

³⁰Huri nam ḡita gin mataku siboku nom varahuva,

³¹gabe gon lol vatuvwainia la lolmatara sinombu duluai:

³²Naturigi gea kea gigita be vi lol bisirai nom hala lalainira len̄len̄aga, i roroa be vi lol roroai nom sinombu Israel.”

³³Haḡe tamana mai ratahina ramuru dan̄an̄a maragai gin hano gabe Simion mwa bevea huri naturigi.

³⁴Simion mwa batavuhainira i mwa bevea lalai Mere ratahin naturigi be, “Naturigi geki God mwa ḡita luae be sinombu ivusi ata Israel rav hovi ta rav lai varahuva bwatuna kea. Kea vivora dovon̄ana nin God gabe sinombu ivusi rav ivwaluinia gin nora avoana,

³⁵kunia vi lol bisirai nora binihiv dahuligi. I giḡo Mere ron̄ḡagarasi kun buan bwaloana mamagani vi sari sivi sibwen̄imwa.”

³⁶Vavine bwero vwate atatun vevsera ihana Anna nitun Vanuel ata la varan Asa. Kea bwatavwe

³⁷i nu lagi huri taul gaibitu, i kadogaha tauluna n̄avul gaivwelu domwan gaivasi. Kea mwa hav lin̄ te Imwa Tataro take mwa lalaḡo lalai God, bon̄i i rani gin garagara vwavwa i tataro.

³⁸Haḡe la mahavana n̄an gea, kea mwa botu mwa lai avoan avkari lalai God i mwa avo huri naturigi lalai sinombu gabe ram hohov God be vi ribwes Jerusalem.

³⁹Haḡe batena be Josep mai Mere raru lol nogonogoi ginau duluai hurin leo non Ratahigi, ramuru siv tabagilu mulei vai Kalili, la bwatutun vanua Nasaret gabe vanuara.

⁴⁰Haḡe naturigi mwa mauri, mwa rihu maragai; i mwa masiri gin mataisao i hogoi non God mwa dogo maia.

⁴¹Vataha taulu taman Jisas mai ratahina ramuru ban vai Jerusalem huri Samsamwaran Halbisḡalau,

⁴²mahavana be taulun Jisas mwa han̄vul domwan gairua ram dol hae hurin silon samsamwara kun tagaro.

⁴³Mahavana be gubwen̄ samsamwara mwa nogo Josep mai Mere ramuru dabagil mulei huri vanuara, take naturigi Jisas mwa dogo radu Jerusalem. Ta tamana mai ratahina ramuru hav iloe tehe;

⁴⁴ramuru binihia be kea maira rituai gabe ran tomua, haḡe ramuru lago huri gubwen̄ duluai i ramuru siv tau bwatuna ramuru siroe abera havara maira nora buluana.

⁴⁵Ta ramuru hav habwea tehe, i ramuru dabagilu mulei vai Jerusalem ramuru siroe.

⁴⁶La gaitolun gubwen̄i ramuru siv habwea lol Imwa Tataro, mwa dogo maira vagahi ira Jius, mwa roron̄tainira i mwa hudalinira gin avoan hudaligi.

⁴⁷Hita kera duluai ram ron̄oe ram dan̄an̄a huri non iloute i huri non avoan vwaliu.

⁴⁸Tamana mai ratahina ramuru dan̄an̄a maragai batena ramuru ḡitae, i ratahina mwa bevea lalainia be, “Nituku, huri hano gom lol ginau kungeki lalai kamaru? Inau mai tamamwa gamuru hiḡego gin ron̄ mwahantai.”

⁴⁹Haḡe mwa bwaliura be, “Gumuru siroau huri hano? Matu gumuru hav iloe tehe be noḡu n̄an be nav togo lol imwan tamaḡu?”

⁵⁰Take ramuru hav ilo te binihiva ata lol non avoana.

⁵¹I kea mwa dabagil mulei maira vai Nasaret i aia kea mwa dabe tamana i ratahina lol ginau duluai. I Mere mwa ḡoḡoi ḡoro ginau duluai kera geki lol sibwen̄ina.

⁵²Jisas mwa mauri hae lol rebehi i mataisao, i God mai atatu ram ḡita dabea.