Read Hano Luk 20 Bible Online

Luk 20 - Hano bible

Luk 20

¹Haḡe lol gubwen̄ vwate Jisas mwa bagahi sinombu lol Imwa Tataro mwa doretore huri Roroi Tavuha, ira muai tataroi mai ira vagahin Silo, bul mai ira bwatmetue ram mai

²ram bevea lalainia be, “Vev luae, Gom lai hava roron̄o be gomen lol ginau kera geki? Ihei mwa laia lalainigo?”

³Haḡe Jisas mwa bwaliura be, “Inau mulei nav hudali kimiu, i giv vwaliuau.

⁴Roron̄o non Jon gabe mwa garuhisabuga ginia mwa mai nin God sa nin atatu?”

⁵Haḡe ram biavoavo mau ginira ram bevea be, “Tav vev haninia? Be tav vevea be garuhisabuga non Jon mwa mai nin God, kea vi vevea be, ‘Huri hano gim hav binihi te mwasiginia?’

⁶Sa be tav vevea be mwa mai nin atatu n̄an, gida tam matagui sinombu bwatuna be kera duluai ram bevea be Jon kea atatun vevsera vwate.”

⁷I ram bwaliua be, “Gam hav iloe tehe be mwa mai nin behe.”

⁸Haḡe Jisas mwa bevea lalainira be, “Inau mulei nasav vevea tehe be nam lai roron̄o be namen lol ginau kera geki halabehe.”

⁹Haḡe Jisas mwa avo gin avoan dalogai geki lalai sinombu be: “Atatu vwate mwa riv talun taligaon waen, mwa lin̄ derainia lalai ira gitaḡoro, huri be kea vi lago dagai huri mahavana n̄ava.

¹⁰La mahavana be vwain gaon taligaon wain gea mwa metue, vuigin talu gea mwa hora non turin rovoga vai abera ira gitaḡoro huribe rav bete uduna gabe nona lalainia. Take ira gitaḡoro ram wehi turin rovoga i ram hora mulei vuroinia.”

¹¹“Haḡe mwa hora turin rovoga dolua mulei, take ira gitaḡoro ram wehia mulei, i ram lol busbusinia i ram hora mulei vuroinia.

¹²Kunia mwa hora gaitolun turin rovoga, take ira gitaḡoro ram lol mulei kunia lalainia i ram bohai luae vai avare.

¹³Haḡe vuigin talu mwa bevea be, ‘Nav lol hano uhugaha? Nav hora mwasin nituku, mwasigi be rav tabea!’

¹⁴Take mahavana ram gitae ram avo ginginira be, ‘Geki haḡea mwasin nituna, tan wehia i talu vi vora bilada!’

¹⁵Haḡe ram bohai luae nin talu i ram wehi bamatea.” Jisas mwa hudaligi be, “Hano be vuigin talu vi lolia lalainira gitaḡoro?

¹⁶Haḡe kea be, vi mai vi wehi bamatera duluai i vi hagai talu lalai gitaḡoro dodolua.” Batena sinombu ram ron̄ avoana uhu ram bevea be, “Sigai sihav ḡunia tehe.”

¹⁷Haḡe Jisas mwa ḡitara mwa hudaligi be, “Ravrava Sabuga geki mwa bevea kun hanigi? ‘Gai mahan̄an imwa gabe kera ran vohai kaburainia kadogaha mwa bora mwasin gain imwa.’

¹⁸Vataha hei gabe rav hovi aluna rav momoga kaburai; tabe si hovi alun wani gea si momogainia kun taniavu.”

¹⁹Haḡe ira vagahin silo mai ira muai tataroi ram lol ron̄oe be rav haḡo batugehi Jisas lol ute gea bwatuna ram iloe be kea mwa bev avoan dalogai geki hurira; take ram matagui sinombu.

²⁰Haḡe kera ram hohovi huri mahavana gabe vi dum lalainira. Ram bol atatu be ramen san Jisas gin avoan hudaligi tentene be men vinihi mwasigi huri be rav lin̄ dumwia vai lol muramura i roron̄o non Tomuai vevev ata Rom.

²¹Haḡe ira wani sansani ram bevea lalai Jisas be, “Vagahi, gam iloe be hano gom bevea i gom bagahi aluna nu mwasigi. Gam iloe be gom hav roron̄tai te ihei lol hava tanoi tehe, take gom bagahi gin mwasigi hurin doroniva non God huri atatu.

²²Matu gomen vevea be, nu vahala hurin nomai silo be gav vol takis lalai Ratahigi lavoa ata Rom sa sigai?”

²³Take Jisas mwa ḡita nora sinealoalo i mwa bevea lalainira be,

²⁴“Matu nan gitae vatlegiga gea. Lolmatan ihei mai ihana kerageki aluna?” Haḡe ram bwaliua be, “Non Ratahigi lavoa ata Rom.”

²⁵Haḡe Jisas mwa bevea lalainira be, “Be kunia giv lai lalai Ratahigi ata Rom ginau non Ratahigi i lalai God ginau non God.”

²⁶Ram hav san te dumwia gin avoana vwate la lolmatara sinombu i kera ram do ḡoḡonai ram dan̄an̄a gin non avoan vwaliu.

²⁷Haḡe ira Sadusi ram mai aben Jisas, kera geki gabe ram bevea be atatu sihav tomare te mulei nin mateana.

²⁸Ram hudalinia be, “Vagahi, Moses nu rav silo uhu lalai kamai be: ‘Be atatu si mate nin tasalana take nitura sigai, tuan wani gea vi lagi dum mai bwerona i raru vi bav dum naturirigi leahi wani gabe nu mate.’

²⁹Ira huhugaituvwa gaibitu; tuagai nu lagi i mwa mate nituna sigai.

³⁰Gairuana mwa lagi mulei vavine gea,

³¹kunia mulei gaitoluna. Take kunia n̄an mulei vaivotu kera gaibitu ram mate nitura sigai.

³²La nogonana vavine mwa mate.

³³Kun hanigi lol gubwen̄ gabe atat mate rav tomare mulei vai lol rahuana, vi vora tasalan hei alolora lol mahavan gea? Bwatuna kera gaibitu ran lagi maia.”

³⁴Haḡe Jisas mwa bwaliura mwa bevea be, “Ira atamwani mai ira vavine lol rahuana garigi ram lagi,

³⁵take ira atamwani mai vavine gabe ran dadariha be rav tomare mulei nin mateana be rav rahu lol rahuana vi mai rasav lagi tehe.

³⁶Rav togo kun ira enjel i rasav mate te dum. Kera ira nitun God, bwatuna be ran tomare mulei nin mateana.

³⁷Kun Moses nu vev lua didininia be, ira atat mate rav tomare mulei huri rahuana. Lol vevurin ute vono gabe nu oda, Moses nu avo huri ratahigi be ‘kea God non Ebraham, God non Aisak, i God non Jekob.’

³⁸Kea God nora gabe ram rahu, mwa hav vora te nora be ran mate, bwatuna be lalainia atatu duluai ram rahu.”

³⁹Haḡe ira vagahin Silo rituai ram bev luae be, “Gom bwaliu tavuhai nia, Vagahi!”

⁴⁰Kera ram hav mom binihi te be rav lai mulei avoan hudaligi lalainia.

⁴¹Jisas mwa hudalinira mwa bevea be, “Huri hano mwa beveana be Mesaea (Kraes wani vurai) mwa mai nin varan Deved?

⁴²Huri Deved sibona nu vevea lol bukan Sam be, ‘God holomare mwa bevea lalai noḡu Ratahigi be: Gov to mahuri teti la mwatuaku

⁴³vava nav tau nom ivwalu rav togo gi tanon nom vavarahi.’

⁴⁴Deved nu uloinia be ‘Ratahigi.’ Be kunia Kraes vi vora ata la varan Deved kunhanigi?”

⁴⁵Mahavana be sinombu ram roron̄tainia, Jisas mwa bevea lalainira non roron̄tai be,

⁴⁶“Giv gitaḡoro ira vagahin Silo, kera ram doron be rav lago mai gaisaga n̄an̄ava i ram doron maragai silo lai ḡoḡo huri be atatu rav binihi marahinira lol saran volvoligi i ram doron be rav lai tanon togotogo haehae lol imwa tataro i mai tanon togotogo tavtavuha lol ginaganian lavoa;

⁴⁷ram gan bahiru ira bwero aten imwara i ram lol tataro n̄an̄ava be men gitana! Silo vevegi huria vi wasi liu!”