Read Hano Luk 21 Bible Online

Luk 21 - Hano bible

Luk 21

¹Haḡe Jisas mwa ate vai bano mwa ḡita ira ratahin homu ram bohai nora hogoi lol tanon homu lol Imwa Tataro,

²i mulei mwa ḡita bwero vwate gabe hiru mwa bohai non hogoi, kun vatu han̄vulu.

³Haḡe Jisas mwa bevea be, “Nam bevea lalai kimiu be bwero hiruga uhu nu vohai liu ninira duluai.

⁴Bwatuna kera rituai ran lai nora hogoi nin rosora gabe mwa hovi nin bilara; take kea, mwa lai duluai bilana kea gabe mwa rahu ginia.”

⁵Ira roron̄tai ram avo huri Imwa Tataro, be nu sarisari bwatuna nu loliana gin vat lalavoa mai rau matan vatu be mwa laiana huri vilakasi gabe hogoi nan vataha atatu huri be Imwa Tataro vi haḡoan ginia. Jisas mwa bwaliura mwa bevea be,

⁶“Ginau duluai gim ḡitae--mahavana vi mai be vatu tiri vwate sihav togo te dum mulei la tanona; take kera duluai rav hovi vai ata.”

⁷Haḡe kera ram hudali Jisas be, “Vagahi mahavana vi mai kunhanigi? I hano vi loli be men lol seserai mahavana be men loli?”

⁸Haḡe Jisas mwa bwaliura mwa bevea be, “Giv gitaḡoro; nin ruruhiana. Bwatuna atatu ivusi rav mai lol ihaku rav vevea be, ‘Inau haḡea! Mahavana mwa mai haḡea!’ Take gisav hurira tehe.

⁹Gisav matagu tehe be gim ron̄ bwaloana sa roron ginau gabe rav loli amua, ta nogonana sigai radu.”

¹⁰Haḡe mwa bev rahurahuinia be, “Vanua rav bwalo ginginira, ute Ratahigi rav bwalo mulei ginginira.

¹¹Sogai gaivua vi loli, maro mai harova vi dum vataha ute; vi vora ginau hantai maragai mai dovon̄ana lol mahao.

¹²Ginau kera geki rav loli amua, rav lai kimiu i rav lol bwarebware maragai kimiu, rav lin̄ kimiu be ramen vevegi kimiu lol imwa tataro, i be rav tau kimiu lol imwa vauvauhi; rav lai lua kimiu be giv tu lolmatan ira Ratahigi Lavoa maira tomuai huri ihaku.”

¹³“Geki haḡea vi vora mahavana huri kimiu be gimen vev lua Roroi Tavuha.

¹⁴Giv lol vatuvwai binihimiu amua nin mahavana vi mai huri be gisav binbinihi te huri hava avoana gabe giv vwaliura ginia;

¹⁵bwatuna Inau nav lai avoana i mataisao gabe giv avo aluna, gabe nomiu ivwalu rasav ivwalui te dum kimiu ginia, rasav tagara te dagai dum nomiu avoana.

¹⁶Ira tamamiu mai tuamiu mai ira ata la varamiu sage nomiu buluana; rav lin̄ kimiu i rav vevev bamate rituai.

¹⁷Haḡe kera duluai rav vev seburai kimiu bwatuna inau.

¹⁸Take nam bevea lalai kimiu be, ilu vwate ata lol bwatumiu sihav sala tehe nin tanona.

¹⁹Giv tu wasigi i giv varahu kimiu sibomiu.”

²⁰“Batena giv gitae be atatun bwaloana rav dalis ute Jerusalem, giv iloe be uhugaha bwatutun vanua gea sihav n̄ava tehe vi masalan̄ai.

²¹Kunia kera gabe ram dogo Judia rav romaragai vai la vusi, kera gabe ram dogo la bwatutun vanua rav tomare, i kera gabe ram dogo la vanua rasav van te vai la bwatutun vanua.

²²Bwatuna geki haḡea ‘Gubwen̄ vevev men visirai,’ ginau duluai gabe ravrava sabuga nu ravae huria.

²³Hagavi lalainira ira vavine gabe ram dogo mai sibwen̄i i hahagavi lalainira ratahi mai naturigi gara! Ginau hantai vi dum vanua geki, i silo vevev non God vi mai alura sinombu.

²⁴Tavalun atatu rai wehi bamatera gin buan bwaloana, i rituai rav laira vai lol imwa vauvauhi lol vanua duluai; i ira len̄len̄aga rav lai lua vanua Jerusalem vaivotu gubwen̄ira vi nogo.”

²⁵“Haḡe dovon̄ana vi visirai alun alo, vula, mai visiu. Lol ureure binihiva non sinombu rav hovi duluai, rav matagui dumdumwianan tahi mai rebu.

²⁶Atatu rav mate mulei gin mataguana hohov hano gabe men visirai la lolmatan ureure, huri ginau muramura duluai ata la mahava rav tagara nin tanora.

²⁷Kunia Nitun Atatu vi visirai lol ten lan̄i lol roron̄o gaivua mai sarisari.

²⁸Haḡe mahavana be ginau kera uhu ram dau bwatuna be ramen loli, giv tu amare ba dada bwatuna nomiu varahuva mwa sosori.”

²⁹Haḡe Jisas mwa avo lalainira gin avoan dalogai huri gai vik mwa bevea be.

³⁰“Mahavana be gim ḡita rauna be ram bavora ram sogainira gim iloe be mwa sosori gin mwagota.

³¹Kunia mulei, batena gim ḡita ginau kera geki ram loli, gim iloe be Rahuan Gara gabe God mwa Ratahigi ḡoro non sinombu alolona mwa abena be men visirai.”

³²“Mwasigi nam bevea lalai kimiu be, tatan̄an varana uhu rav rahu radu vai votu ginau uhu rav loli duluai.

³³Amare mai ureure vi nogo dagai; take noḡu avoana sihav nogo te dum.”

³⁴“Giv mamata ḡoro kimiu sibomiu! Gisav mahin̄a tehe be giv van lol ginaganian lalavoa tagaro i gisav mwin te maragai wai i gisav binbinihi tehe huri rahuana geki, bereva Gubwen̄imwa gim mai vilvilehi,

³⁵kun vidi. Huri be vi lol sinombu lol ureure duluai.

³⁶Giv mamata i giv tataro tagaro be rahumiu vi wasi be gimen van sivigi dum dagai nin ginau kera uhu gabe rav loli, i be giv tu dum la lolmatan Nitun Atatu.”

³⁷Haḡe Jisas mwa bagahi duluai lol gubwen̄ kera gea lol Imwa Tataro, haḡe mwa sosori gin ute ravrav, kea mwa ban dagai be vi togo bon̄i duluai la vusin gai Oliv.

³⁸Vataha mabon̄i sinombu ram ban be ramen roron̄tainia lol Imwa Tataro.