Read Hano Luk 22 Bible Online

Luk 22 - Hano bible

Luk 22

¹Mahavana mwa sosori gin gubwen̄in Samsamwaran Bereti Vatuga, mwa uloiana be Halbisḡalau.

²Haḡe ira muai tataroi mai ira vagahin Silo ram lol ron̄oe be ramen habwe te hala be rav wehi dahuli Jisas; bwatuna be ram matagui sinombu.

³Haḡe Setan mwa haroro alolon Judas Iskariot, kea tuara vwate ninira han̄vul domwan gairua.

⁴Haḡe Judas mwa ban dagai mwa avo lalai ira muai tataroi mai ira atatun gitaḡoro lol Imwa Tataro huri be kunhanigi kea vi lin̄ dum Jisas lalainira.

⁵I kera ram samsamwara ram datauleo be rav lai homu lalainia.

⁶Judas mwa dame aluna, i mwa dau bwatuna mwa hiḡe mahavana tavuha be vi lin̄ dum Jisas lalainira dahuligi dagai nin sinombu.

⁷Haḡe mwa botui gubwen̄in Samsamwaran Bereti Vatuga mahavana be bwaloi sipsip huri ginaganianan Halbisḡalau vi wehiana.

⁸Jisas mwa hora Pita mai Jon mai avoana geki be: “Giru van ba lol vatuvwai ginaganianan Halbisḡalau huri gida be tav gania.”

⁹Haḡe ramuru hudalinia be, “Matuke gom doron be garu vi lol vatuvwainia halabehe?”

¹⁰Jisas mwa bwaliura be, “Batena be giru vi vano giru vi habwe atatu vwate mwa datal buḡalin wai vi visogari mai kimiru, wani haḡea giru vi huria vai la imwa be kea vi haroro alolona,

¹¹i giru vi vevea lalai vuigin imwa be: ‘Vagahi mwa hudalinigo be, vwavwan imwa behe gabe inau mai noḡu roron̄tai gav gan ginaganianan Halbisḡalau aia?’

¹²I kea vi vagahi kimiru gin vwavwan imwana gaivua amare nu vagahan tavuhai huria, i giru vi lol vatuvwai vataha ginau duluai.”

¹³Batena be ramuru bano ramuru habwe ginau duluai gabe Jisas nu vevea lalainira, ramuru lol vatuvwai ginaganianan Halbisḡalau.

¹⁴Batena mwa botui tarona, Jisas mwa do mahuri maira non hala dalis tebol.

¹⁵Haḡe mwa bevea lalainira be, “Nam doron maragai be nav gan ginaganianan Halbisḡalau geki mai kimiu vuvuri nam siv ron̄ḡagarasi!

¹⁶Bwatuna nam bevea lalai kimiu be, nasav gania tehe vaivotu be vi lai mwasin binihiva huria lol Rahuan Gara be God mwa bora Ratahigi Lavoa ḡoro non sinombu alolona.”

¹⁷Haḡe Jisas mwa haḡo laha i mwa avkari God mwa bevea be, “Giv laia ba betea lalai kimiu sibomiu.

¹⁸Nam bevea lalai kimiu be, nasav mom mwin te waen geki mwa dau bwatuna garigi vaivotu be Rahuan Gara gabe God mwa bora Ratahigi Lavoa ḡoro non sinombu alolona vi mai.”

¹⁹Haḡe mwa lai tavihen bereti, mwa avkari God, mwa biha borae, mwa laia lalainira, mwa bevea be, “Geki rebehiku, mwa laia huri kimiu. Giv lolia kungeki gin binihi mulei huriau.”

²⁰Kunia mulei, mwa lai laha lalainira atagun ginaganiana, mwa bevea be, “Laha geki tatauleo gara non God mwa laia mai dagaku gabe mwa rovo huri kimiu.”

²¹“Take, giv gitae! Wani gabe mwa sineau, kea gekado la tebol maiau!

²²Nitun Atatu vi mate kun God nu binihia; take vi hantai maragai lalai wani gea gabe mwa sinea.”

²³Haḡe ram bavora ram hudaltaligi mau ginginira be ihei alolora gea be vi sinea.

²⁴Haḡe vigaigaiana mwa domare lol davolara roron̄tai be ihei ninira vi vinihiana be kea tomuai.

²⁵Jisas mwa bevea lalainira be, “Ira Ratahigi Lavoa nora Lolobon̄i ram haḡo muramura ḡoro nora sinombu, i ira tomuai mwa uloinira be, ‘kera ira buluana non sinombu.’

²⁶Take geki mwa hav vora te hala be giv huria; ihei nin kimiu be vi vora lavoa, kea vi mai gi tihigi atatu alolomiu duluai, i tomuai vi mai kun be atatun rovoga.

²⁷Ihei lavoa, wani gabe mwa do mahuri be men gan ginau sa wani gabe mwa lol ginaganiana lalainia? Mwasigi haḡea be, wani gabe mwa do mahuri huri ginaganiana. Take inau abemiu kun wani gabe mwa lol ginaganiana lalainia.”

²⁸“Gim dogo maiau lol taro ririhai duluai be mwa dumwiau, gim dogo maiau;

²⁹kunia be Tamaḡu nu lai roron̄o lalaiau be nav gitaḡoro, i nav lol kunia mulei lalai kimiu.

³⁰Giv gangan i giv mwinmwin la noḡu tebol lol noḡu Rahuan Gara, i giv to mahuri la tanon togotogo be gimen tomuai ḡoro varan Israel han̄vul domwan gairua.”

³¹“Saimon, Saimon! Gov ron̄oe Setan mwa lai tanona be men lol ron̄ kimiu duluai, be men harabora ginau tavuha nin ginau hantai kun gabe atatun ute loloara mwa harabora mwasin koni nin bwagavina.

³²Take nam dataro hurigo Saimon, be nom binihimwasigi garagusi si hav hovi tehe. I batena be gom dabagilu mulei huriau, gov tura wasi ira tuamiu.”

³³Pita mwa bwaliua mwa bevea be, “Ratahigi, nam lol dautau be nai van maigo lol imwa vauvauhi i nav mate bultai maigo!”

³⁴Jisas mwa bwaliua mwa bevea be, “Pita nam bev mwasigi lalainigo be, toa si hav totoreto te radu garigi bon̄i gov vevea vatolu be gom len̄aiau.”

³⁵Haḡe Jisas mwa hudalinira non roron̄tai mwa bevea be, “Batena be nam hora lua kimiu gim hav haḡo te tan̄ vavagaha, i tan̄ sarisarigi sa sus, matu gin vahal ginau vwate?” Haḡe ram bwaliua be, “Sigai.”

³⁶Take Jisas mwa bwaliura mwa bevea be, “Kadogaha be ihei tehe non tan̄ vavagaha abena sage tan̄ sarisarigi mwa du be vi haḡoe; ihei te mulei non buan bwaloana sigai, mwa du be vi salei non koti vuvuri gim bol vwate.

³⁷Bwatuna geki nai vevea lalai kimiu be, Ravrava Sabuga gabe mwa bevea be, ‘Kea bultai maira hantain lalaḡo,’ mwa du be vi mwasigi huriau, huri be hano gabe nu ravana huriau mwa bisirai mwasigi.”

³⁸Haḡe ira roron̄tai ram bevea be, “Gitae Ratahigi! Buan bwaloana gairua kera geki!” Jisas mwa bwaliura be, “Nu dadariha haḡea.”

³⁹Jisas mwa mwalue nin bwatutun vanua i mwa ban vai la vusin gai Oliv; kun gabe mwa lolia tagaro, haḡe ira roron̄tai ram huria.

⁴⁰Batena Jisas mwa botui ute gea, kea mwa bevea lalainira be, “Giv tataro huri be gisav hovi te lol kalkaliana.”

⁴¹Haḡe Jisas mwa ban dagai ninira, kun n̄avanan mahavana be vatu mwa bohaiana, haḡe mwa sisiabwau mwa dataro.

⁴²Mwa bevea be, “Tata, be vi dumwi, lai dagai lahan ron̄ḡagarasi geki niniau. Mwa hav vora te hurin noḡu doroniva, take nom doroniva n̄ano vi dumwi.”

⁴³Haḡe enjel atamare mwa bisirai abena i mwa dura wasinia.

⁴⁴Jisas mwa n̄ala gin non ron̄ḡagarasi gaivua, i mwa dataro hahavwani; mamaonona mwa duturu kun daga vai lol tano.

⁴⁵Mwa dataro vuvuri mwa ban mulei vai aben ira roron̄tai take mwa habwera be ram dol maturu, bwatuna be ram ron̄ mwahantai maragai.

⁴⁶Haḡe Jisas mwa bevea lalainira be, “Gim dol maturu huri hano? Gitol tomare ba dataro, huri be gisav hovi te lol kalkaliana.”

⁴⁷Jisas mwa avo radu batena be tatan̄an sinombu mai Judas vwate ninira han̄vul domwan gairua mwa domuai bisirai sinombu gaivua, mwa mai sosori Jisas be men rimrimia.

⁴⁸Take Jisas mwa bevea lalainia be, “Gom sine Nitun Atatu gin rimrimi, Judas?”

⁴⁹Haḡe ira roron̄tai gabe kera bul mai Jisas lol mahavana gea ram ḡita havanau gabe mwa loli i ram bevea be, “Ratahigi gamen bwalo gin buan bwaloana?”

⁵⁰Haḡe vwate ninira mwa dai haviri bweron turin rovoga non Muai Tataroi la mwatuana.

⁵¹Take Jisas mwa bevea be, “Gisav lol te ginau kunia!” Haḡe mwa sibweri bwerona i mwa dari mulei.

⁵²Kunia Jisas mwa bevea lalainira muai tataroi maira tomuai huri rovoga lol Imwa Tataro, mai ira Bwatmetua gabe ram mai duluai aia, be ram laia mwa bevea lalainira be, “Matu gim mai huriau mai buan bwaloana i irubwi kun gabe inau nam dogo dagai nin silo?

⁵³Nam dogo mai kimiu lol Imwa Tataro vataha gubwen̄, take gim hav haḡo te batugehiau. Take kadogaha mahavana be giv lol hano kun gabe gin doronia, lol mahavana geki be muramura ata lol ute meto mwa ratahigi.”

⁵⁴Ram haḡo batugehi Jisas ram lagoi dagainia vai lol imwan Muai Tataroi; i Pita mwa huri dagutagunainia.

⁵⁵Haḡe Pita mwa domahuri abera be ram dalai borasinen sara.

⁵⁶Vavinen rovoga vwate mwa ḡita Pita be mwa do mahuri aben gabi mwa bevea be, “Wani geki mulei kea bul mai Jisas!”

⁵⁷Take Pita mwa bevea be, “Vavine, nam hav ilo te wani gea!”

⁵⁸Tiriḡalia n̄an, atatu vwate mwa ḡita batoia mwa bevea be, “Giḡo ha vwate!” Take Pita mwa bwaliua be, “Giḡo, inau sigai!”

⁵⁹Atagun mahavan alo gaituvwa, atatu vwate mwa bev wasinia mulei mwa bevea be, “Tasav mom binihi te gairuruai be wani geki kea mai Jisas sa sigai, bwatuna kea mulei ata Kalili!”

⁶⁰Take Pita mwa bwaliua mwa bevea be, “Giḡo, nam hav ilo te havanau gom bevea!” Batena Pita mwa avo radu, toa mwa dotoreto.

⁶¹Haḡe Ratahigi mwa ban burigai mwa ḡita Pita, haḡe Pita mwa binihi dum avoana non ratahigi, gabe nu vevea be, “Amua toa gim siv totoreto garigi bon̄i goi vevea vatolu be gom hav iloau tehe.”

⁶²Haḡe Pita mwa bwihavare mwa dei maragai.

⁶³Kera gabe ram ḡitagoro Jisas ram lol leileia i ram wehia.

⁶⁴Ram ḡagav ḡoro lolmatana ram hudalinia ram bevea be, “Visia, be ihei mwa wehigo?”

⁶⁵Haḡe ram bev avoan hahantai ivusi lalainia.

⁶⁶Haḡe ute mwa rani, ira bwatmetua maira muai tataroi, i ira vagahin Silo ram ḡoḡo bulbulu, ram lai Jisas vai lolmatan nora Kansel.

⁶⁷I ram hudalinia ram bevea be: “Gomen vevea lalai kamai, giḡo haḡea Kraes gabe wani vurai?” Haḡe kea mwa bwaliura mwa bevea be, “Be nai vevea lalai kimiu gisav binihi te mwasigiau;

⁶⁸sage nav hudali kimiu gin avoana vwate gisav vwaliuau tehe.

⁶⁹Take mwa dau bwatuna garigi Nitun Atatu vi togo la mwatuan God mwasin roron̄o.”

⁷⁰Haḡe kera duluai ram hudaligi be, “Matu giḡo haḡea Nitun God?” Haḡe mwa bwaliura mwa bevea be, “Gim bevea huba haḡea, inau haḡe geki.”

⁷¹Haḡe ram bevea be, “Tam hav mom doron te turaturan avoana mulei! Gida duluai tam ron̄ non avoana sibona huba!”