Read Hano Luk 24 Bible Online

Luk 24 - Hano bible

Luk 24

¹La Sande mwabon̄ gaituvwa ira vavine ram bano aben malan̄a mai wai sasav bonboni gabe ran lol vatuvwainia.

²Haḡe batena be ram botuinia ram ḡita vatu be nu tatui dagaiana nin bwan̄on malan̄a,

³haḡe kera ram dalin̄oro alolona; take ram hav habwe te Rebehin Ratahigi Jisas.

⁴Ha kera ram du aia ram hav lai te dum binihiva huri ginau geki, haḡe darihou n̄an atatu gairua gaisagara ran abwaga ramuru du abera.

⁵Kera ram matagu maragai, ram dai bwatura vai la tano, mahavana atatu gairua ramuru bevea lalainira be: “Hurihano gim hiḡe wani gabe mwa rahu abera atatmate?

⁶Kea sigai teti; kea nu tomare mulei nin mateana. Giv binihi dum avoana be nu vevea lalai kimiu mahavana be kea Kalili radu be:

⁷‘Nitun Atatu vi lin̄iana lalainira hantain lalaḡo, rai vohae vai alun volovolo i atagun gubwen̄ gaitolu kea vi rahu vi tomare mulei.’”

⁸Kunia ira vavine ram binihi dum non avoana,

⁹ram dabagilu nin malan̄a, ram bev ginau duluai geki lalai ira roron̄tai han̄vul domwan gaituvwa maira duluai.

¹⁰Ira vavine kera geki, Mere Makdalen, Joana, i Mere ratahin Semes; kera gaitolu mai ira vavine dodolua ram bev ginau duluai kera geki lalai ira hala.

¹¹Take ira hala ram binihia be hano ira vavine ram bevea mwa hav vora te mwasigi, i ram hav binihi te mwasiginira.

¹²Pita mwa domare mwa rovo vai aben lulu; haḡe mwa siolo mwa ḡita gavu gabe ran nubwae ginia mwa en vuroi. Haḡe Pita mwa dabagilu mulei i mwa dan̄an̄a gin ginau be nu loli.

¹³Lol gubwen̄i n̄an gea atatu non Jisas gairua ramuru ban vai la vanua mwa huiana be Emaus, mahavana kun n̄avanan vasan̄vul valima, vudolua varua vena n̄avul gaiono, nin Jerusalem,

¹⁴i ramuru bevuri ginginira huri ginau duluai be ran loli.

¹⁵Mahavana be ramuru bevuri aluna, Jisas sibona mwa mai sosorira i mwa lago bul maira;

¹⁶ramuru ḡitae take ramuru hav gita te batoia.

¹⁷Jisas mwa bevea lalainira be, “Gumuru bevuri havanau gingin kimiru la nomiru lagoana?” Haḡe ramuru barahidu, lolmatara mwa hantai, gin busbusiana.

¹⁸Haḡe vwate ninira, ihana Kiliapas mwa hudalinia mwa bevea be, “Giḡo n̄an gaituvwa tausala aia Jerusalem gabe gom hav ilo te havanau be nu siv loli aia non̄oiha?”

¹⁹Haḡe mwa hudalinira be, “Havanau?” Haḡe ramuru bwaliua be, “Ginau gabe nu loli lalai Jisas ata Nasaret. Wani geki kea atatun vevsera, i God mai sinombu duluai ram ḡita dabea be kea atatu muramura lol non avoana i lalaḡova duluai.

²⁰Kera nonda muai tataroi ran lin̄ia huri be vi vevegian bamate, i ran vohae vai alun volovolo.

²¹I gan vinihia haḡea be kea vi ribwes Israel! Garigi gubwen̄ina mwa ḡaitolu ataguna be ginau kera geki ran loli.

²²Ira vavine rituai abemai ran lolia gam dan̄an̄a maragai ran van aben lulu mabon̄ gaituvwa,

²³take ram hav habwe te rebehina. Haḡe ram dabagilu ram bevea be, ran hueri ira enjel gabe God mwa lol bisirainira lalainira ram bevea lalainira be kea mwa rahu.

²⁴Haḡe tavalumai rituai ram bano vai aben lulu ram ḡitae kunia haḡea be ira vavine ran vevea, take ran hav gitae tehe.”

²⁵Jisas mwa bevea lalainira be, “Ira daloi, gim ravrava maragai be gimen binihimwasigi ginau duluai gabe ira atatun vevsera ran vevea!

²⁶Matuke nu hav maron̄ron̄o te lalai Kraes wani Vurai be men ron̄ḡagarasi alun ginau kera geki i gim haroro lol sarisarina?”

²⁷Haḡe Jisas mwa dugu halana lalainira huri havanau nu vevea huria sibona alolon Ravrava Sabuga duluai, nu tau bwatuna lol buka non Moses mai ravrava non ira atatun Vevsera duluai.

²⁸I batena be ram la sosori vanua be ram bano huria, Jisas mwa la rahurahu dotomua kun be men van rahurahu;

²⁹take ramuru borotainia ramuru bevea be, “To mai kamaru; ute nu ravravi huba.” I kea mwa haroro mwa dogo maira.

³⁰Haḡe kea mwa do mahuri be men gan ginau bul maira, mwa lai bereti, mwa batavuhainia; i mwa biha borae mwa laia lalainira.

³¹Haḡe matara mwa matavugeri i ramuru siv gita batoia be kea, i mwa binogonogo dagai nin lolmatara.

³²I ramuru bevea ginginira be, “La mahavana be mwa avo mai gidaru la hala, i mwa dugu halan ravrava sabuga duluai lalai gidaru taru ron̄ mwandavuha maragai ginia?”

³³Haḡe ramuru domare darihou ramuru ban mulei vai Jerusalem, aia ramuru habwe ira roron̄tai han̄vul domwan gaituvwa ram du utegaituvwa mai atatu rituai

³⁴ram bevea be, “Ratahigi nu tomare mwasigi! Kea nu visirai aben Saemon!”

³⁵Haḡe ira tarua ramuru bevea lalainira huri ginau be nu loli lalainira la hala, i kun hanigi raru gita batoi Ratahigi mahavana be nu viha bora bereti.

³⁶Mahavana be ramuru bev hurinia Ratahigi sibona mwa du bora lolora darihou mwa bevea lalainira be, “Tamwata na togo abemiu.”

³⁷Haḡe huira mwa ruru, ram matagu maragai, i ram binihia be ram ḡita vui.

³⁸Take mwa bevea lalainira be, “Huri hano gim matagu maragai? Huri hano gim binihi gairuruai kungeki lol binihimiu?

³⁹Gin gita limaḡu mai bwalageku, i gin gitae be inau siboku. Gin sibweriau, gitae, bwatuna be vui vigohona mai huina sigai kunia gabe gim ḡitau mai rebehiku.”

⁴⁰Mwa bevea vuvuri mwa bagahira gin limana i bwalagena.

⁴¹Take kera ram hav binihi te mwasiginia, ram masiri gin samwarana i binihi lalan̄ana; i kea mwa hudalinira mwa bevea be, “Ginaganiana tehe abemiu?”

⁴²I kera ram lai tavihen ige manogo lalainia,

⁴³ke mwa laia mwa ḡania lol matara.

⁴⁴Haḡe mwa bevea lalainira be, “Geki haḡea ginau be nan vevea lalai kimiu mahavana be nan togo radu mai kimiu: ginau duluai nu ravae huriau lol Silo non Moses, i Ravrava non ira Atatun Vevsera, i lol bukan Sam mwa bisirai mwasigi.”

⁴⁵Haḡe mwa havan̄ nora binihiva be ramen ron̄ batoi Ravrava Sabuga duluai.

⁴⁶I mwa bevea lalainira be, “Geki havanau mwa ravae be: Kraes wani Vurai vi ron̄ ḡagarasi i vi tomare nin mateana atagun gubwen̄ gaitolu,

⁴⁷i lol ihana roroi huri binihi leahi, i tugu kaburai vuro vi toretore huria vataha vanua duluai vi tau bwatuna Jerusalem.

⁴⁸Kimiu haḡea turatura huri ginau kera geki.

⁴⁹I inau siboku nav horae vai alumiu ginau gabe Tamaḡu nu tatauleo huria. Take giv hohov lol bwatutun vanua vai votu muramura ata amare vi himai alumiu.”

⁵⁰Haḡe Jisas mwa domuai bwihavareinira nin bwatutun vanua vaivotu Betani, i kea mwa hagai lua limana mwa batavuhainira.

⁵¹I batena be mwa batavuhainira, kea mwa ban dagai nin lolmatara i mwa lai muleinia vai amare.

⁵²Haḡe ram ḡogonainia i ram dabagil mulei vai Jerusalem, ram masiri gin samwarana gaivua,

⁵³i ram dogo huri mahavana duluai lol Imwa Tataro ram avkari God.