Read Hano Luk 3 Bible Online

Luk 3 - Hano bible

Luk 3

¹La mahavan taulu han̄vul domwan gailima batena lavoa Taeberias nu Ratahigi; Pontus Paelat nu vora tomuai vevev Judia, Herod nu lavoa Kalili, i tuana Vilip nu lavoa Ituria i Trakonaetas; Lisanias nu lavoa Abilini, i Pontus Paelat

²i Annas mai Kaiavas raru vora muai tataroi. Lol mahavan gea avoana non God mwa bisirai lalai Jon nitun Sakaraia la vanua.

³Haḡe Jon mwa ban sisivigi vanua duluai dalis wai Jodan mwa doretore mwa bevea be, “Giv binihileahi huri vuromiu i giv lai garuhisabuga, haḡe God vi binihi kaburai vuromiu.”

⁴Kun Aesaia Atatun Vevsera nu ravae lol non buka mwa bevea be, “Atatu vwate mwa ulo lol vanua vurai be: ‘Giv lol vatuvwai halan Ratahigi; giv lol bavtutui hala huria!

⁵Walui duluai vi hogon̄iana, vus ririgi mai vus lalavoa vi tavolaiana. Hal viletelete vi vavtutuiana, hal bwaran̄ran̄a vi haravuiana;

⁶haḡe atatu duluai rav gita varahuva non God!’”

⁷Sinombu gaivua ram mwalue vai aben Jon be vi garuhisabugainira i mwa bevea lalainira be, “Kimiu kun teltele! Ihei mwa bevea lalai kimiu be giv romaragai dum nin silo vevegi non God gabe mwa abena be men mai?

⁸Be kimiu gim binihi leahi mwasigi giv dovon̄ainia alun nomiu lalaḡova. Take gisav tau te bwatuna be gimen vevea lalai kimiu sibomiu be, ‘Gida ira nitun Ebraham.’ Nam bev mwasigi lalai kimiu be God vi lol dum vatu kera geki ram du rai vogi gi ira nitun Ebraham!

⁹Talai mamagani mwa en dautau be men tai dul gai lol garona. Gai duluai gabe ram hav vwae te tavuha vi taian kaburai ba bohaiana lol gabi.”

¹⁰Haḡe sinombu ram hudalinia be, “Kamai gav lol hano?”

¹¹Haḡe mwa bwaliura be, “Atatu be gaisagana gairua vi lai vwate lalai wani be gaisagana sigai, mulei atatu be gan ginau abena vi hogosira be gara ginau sigai.”

¹²Ira harahara homu rituai ram mai be rav lai garuhisabuga, i ram hudali Jon be, “Vagahi kamai gav lol hano?”

¹³Haḡe mwa bevea lalainira be, “Gisav hara te homu liu nin hano silo mwa bevea.”

¹⁴I atatun bwaloana rituai ram hudalinia be, “Hanigi huri kamai? Kamai gav lol hano?” I Jon mwa bevea be, “Gisav lai te homu nin ihei tehe gim lol bonogai i gisav tul te bonogai vai alun ihei tehe ta giv ron̄ mwandavuha huri volimiu gim laia.”

¹⁵Haḡe sinombu ram bavora ram binihi hohov i ram bihiḡehiḡe lol binihira huri Jon be daga kea Wani Vurai.

¹⁶Haḡe Jon mwa bevea lalainira duluai be, “Inau nam garuhisabuga kimiu gin wai, take atatu vwate mwa mai kea lavoa liuau. Inau siboku nam hav dadariha tehe be nav tugu gaon non sus. Wani gea vi garuhisabugai kimiu gin Vui Sabuga i gabi.

¹⁷I mulei mwa haḡo non gaigosi lol limana, kun atatu mwa ḡos niu mwa lai lua mwasina nin bwalana i mwa haraḡoḡo mwasina vai la mwasin batana, take mwa bohai kaburai tabwelahana vai lol gabi gabe mwa oda mosmosianana sigai.”

¹⁸Jon mwa doretore lalai sinombu huri Roroi Tavuha, mwa suvwainira gin avoan dodolua mulei be rav leahi alen̄ara.

¹⁹Ram dau Jon Garuhisabuga lol imwa vauvauhi huri be Jon mwa hul bagahi lavoa Herod bwatuna Herod nu lai Herodias tasalan tuana i huri tavalten ginau ivusi be Herod nu lolira.

²⁰Ta Herod mwa mom lol ginau hantai liu huri mwa dau Jon lol imwa vauvauhi.

²¹Ataguna be Jon mwa garuhisabugai sinombu duluai, Jisas mulei mwa lai garuhisabuga. I batena be Jisas mwa du mwa dataro mahao mwa mahavan̄i,

²²i Vui Sabuga mwa hivo aluna gitanana kun manbona. I silo mwa himai nin amare, mwa bevea be, “Giḡo Nituku gabe nam dabego i nam doron maragainigo.”

²³Jisas mwa dau bwatuna non lalaḡova, batena tauluna kun n̄avul gaitolu. Kea nitun atatu Josep, kun sinombu ram binihia. I Josep nitun Heli,

²⁴nitun Matat, nitun Levi, nitun Melki, nitun Janae, nitun Josep,

²⁵nitun Matatias, nitun Amos, nitun Nahum, nitun Esli, nitun Nagai,

²⁶nitun Maat, nitun Matatias, nitun Semein, nitun Jose, nitun Joda,

²⁷nitun Joanan, nitun Resa, nitun Serubabel, nitun Salatiel, nitun Neri,

²⁸nitun Melki, nitun Adi, nitun Kosam, nitun Elmadam, nitun Ere,

²⁹nitun Josua, nitun Eliesa, nitun Jorim, nitun Mathat, nitun Levi,

³⁰nitun Simion, nitun Juda, nitun Josep, nitun Jonam, nitun Eliakim,

³¹nitun Melea, nitun Mena, nitun Matata, nitun Natan, nitun Deved,

³²nitun Jese, nitun Obed, nitun Boas, nitun Salmon, nitun Nason,

³³nitun Aminadab, nitun Admin, nitun Ani, nitun Heson, nitun Peres, nitun Juda,

³⁴nitun Jekob, nitun Aisak, nitun Ebraham, nitun Tera, nitun Naho,

³⁵nitun Serak, nitun Reu, nitun Pelek, nitun Ebe, nitun Sela,

³⁶nitun Kainan, nitun Arposad, nitun Sem, nitun Noa, nitun Lamek,

³⁷nitun Metusela, nitun Enok, nitun Jared, nitun Mahalalel, nitun Kenan,

³⁸nitun Enos, nitun Set, nitun Adam, nitun God.