Read Hano Luk 4 Bible Online

Luk 4 - Hano bible

Luk 4

¹Haḡe Jisas mwa mwalue nin vanua Jodan mwa masiri gin Vui Sabuga i Vui mwa domuainia vai la vanua vuroi,

²aia vui hantai mwa lol ron̄oe huri gubwen̄ n̄avul gaivasi. Lol mahavan duluai gea nu hav gan te ginau, ataguna mara mwa siv gasia.

³Haḡe vui hantai mwa bevea lalainia be, “Sivora giḡo Nitun God, gos lol vatu uhu si vogi gi bereti.”

⁴Haḡe Jisas mwa bwaliua be, “Lol ravrava sabuga mwa bevea kungeki be, ‘Atatu si hav rahu tehe n̄an gin bereti.’”

⁵Haḡe vui hantai mwa laia vai amare i mwa bagahi darihounia gin ute ratahigi duluai ata lol ureure.

⁶I mwa bevea be, “Nav mahin̄ai lalainigo roron̄o mai roso duluai uhu, huri nu mahin̄aiana lalaiau i inau nav mahin̄ai dumwia lalai wani gabe nav gita luae.

⁷Kunia ginau duluai kera geki vi vora nomwa be gov hivbwaubwau ḡoroau.”

⁸Haḡe Jisas mwa bwaliua be, “Lol Ravrava Sabuga mwa bevea be, ‘Gov gogonai God gabe nom Ratahigi, i gov lalaḡo lalainia gaituvwa n̄ano.’ ”

⁹Haḡe vui mwa laia vai Jerusalem mwa daua la ulun ibwirin Imwa Sabuga, haḡe mwa bevea lalainia be, “Be giḡo mwasigi Nitun God gov burere sibomwa nin teti vai ata.

¹⁰Huri be Ravrava Sabuga mwa bevea be, ‘God vi tau maira non enjel be rav gitaḡorogo.’

¹¹Nu vevea mulei be, ‘Rav salo luago gin limara huri be gosav taturai te dum bwalagemwa vwate la vatu.’ ”

¹²Ta Jisas mwa bwaliua be, “Ravrava sabuga mwa bevea be, ‘Gosav ḡal te God gabe nom Ratahigi.’ ”

¹³Haḡe ataguna gabe vui hantai nu lol ron̄ Jisas lol hala ivusi, mwa ban dagai kalkaligi ninia.

¹⁴Haḡe Jisas mwa dabagilu vai Kalili, i roron̄o non Vui Sabuga mwa dogo maia. Roroi huria mwa lon̄ahi vanua duluai Kalili.

¹⁵Kea mwa bagahi lol nora imwa tataro i sinombu ram lol roroainia.

¹⁶Haḡe Jisas mwa ban vai Nasaret, vanua gabe nu gaivuaga aia, haḡe lol gubwen̄ mambuharai kea mwa ban kun tagaro vai lol imwa tataro. Mwa du amare be men vasogo Ravrava Sabuga,

¹⁷i ram hagai lalainia buka non Aesaia atatun vevsera. Kea mwa bugeria i mwa habwe ute nu ravae be,

¹⁸“Vui non Ratahigi mwa dogo aluku, bwatuna nu vurai luau be nai vev sera Roroi Tavuha lalai ira hiru. Nu horau be nai vev luae huri ribwesiva nora atat vauvauhi i huri lol i ba lol bugeri matara ira matagara, i mulei nav ribwesira ram dogo aten nora ivwalu

¹⁹i nai vev luae be mahavana nu mai huba be Ratahigi vi varahu non sinombu.”

²⁰Haḡe mwa bul ḡoro mulei buka, i mwa hagai muleinia lalainia gabe mwa ḡitaḡoro, vuvuri mwa do mahuri. I sinombu duluai lol imwa tataro ram ḡita mamaragainia,

²¹haḡe mwa bavora mwa avo lalainira, mwa bevea be, “Garigi haḡea ravrava uhu nu haraharai huba batena, gin ron̄oe nu vasogoana.”

²²Kera duluai be ran ron̄oe ram dara i ram dan̄an̄a alun non avoan tavuha duluai gabe ran mwalue nin bwan̄ona. Ram bevea be, “Matu kea mwa hav vora te nitun Josep?”

²³Haḡe mwa bevea lalainira be, “Nam binihi mwasigi be gi vev dum avoana uhu lalaiau be, ‘Dokta, varahu muleinigo.’ I mulei giv vevea lalaiau be, nav lol ginau teti la mwasin bwatutun vanuaḡu, ginau duluai be gin ron̄ora ran loli Kapanium.

²⁴Nam bev ginau geki lalai kimiu be, atatun vevsera sihav lai te dum ḡoḡoana la mwasin bwatutun vanuana.”

²⁵“Giv roron̄taiau: nam bev mwasigi be ira bwero ivusi Israel la gubwen̄in Elaija, la mahavana gabe nu hav uhe tehe huri taul gaitolu i udui maro gaivua nu dum vanua gea.

²⁶Take Elaija nu hav horana tehe lalai ihei tehe Israel, haḡe ta lalai bwero vwate lol ute Sarevat lol vanua ata Saidon.

²⁷Gita ira lepa ivusi Israel la gubwen̄in atatun vevsera Elaija, take nu hav varahu te vwate ninira ta Neman n̄an ata Siria.”

²⁸Mahavana be sinombu lol imwa tataro ram ron̄oe, ram masiri gin lolhoro.

²⁹Kera ram domare, ram rav dagai Jisas nin bwatutun vanua, i ram laia vai la n̄olivun vusi gabe bwatutun vanua nu haḡoana aluna. Ram binihia be rav vohai kaburainia la bwabwa,

³⁰take mwa lago lol davolara sinombu i mwa ban dagai.

³¹Haḡe Jisas mwa ban vai Kapanium, bwatutun vanua vwate ata Kalili, aia mwa bagahi sinombu la gubwen̄ mambuharai.

³²Kera duluai ram dan̄an̄a gin non silo vagahi, bwatuna mwa avo gin roron̄o.

³³Haḡe atatu vwate lol imwa tataro vui hantai nu lolia; mwa haharigi gin silo gaivua, mwa bevea be,

³⁴“Ee! gom doron havanau mai kamai, Jisas ata Nasaret? Matu gom mai teti be gomen lol kaburai kamai? Nam ilogo; be giḡo horata sabuga non God!”

³⁵Haḡe Jisas mwa borotai vui hantai, mwa bevea be “Gov buhiga, ba mwalue dagai nin wani gea!” Haḡe vui hantai mwa bohai wani gea vai ata lolmatara duluai, i mwa mwalue dagai ninia, nu hav lol te hantainia.

³⁶Haḡe sinombu ram dan̄an̄a ram avo ginginira be, “Hava avoana kera geki? Gin roron̄o mai muramura atatu geki mwa hora lua ira vui hantai, i ram mwalue!”

³⁷Haḡe roroi huri Jisas mwa lon̄ahi ute duluai lol vanua gea.

³⁸Haḡe Jisas mwa mwalue nin imwa tataro mwa ban vai lol imwan Saemon. Ratahin tasalan Saemon mwa haro gin rurutia gaivua, i ram hudali Jisas huria.

³⁹Haḡe kea mwa ban mwa du hurin batana, mwa av wasi lalai rurutia be vi lin̄ia. Haḡe rurutia mwa lin̄ia, i vavine mwa domare darihou mwa lol ginaganiana lalainira.

⁴⁰Haḡe ataguna be alo nu roro huba kera gabe nora buluana ram haro gin lalan̄an harov dodolua ram laira vai aben Jisas; i kea mwa dau limana alura mwa barahu duluainira.

⁴¹Kunia mulei vui hantai ram mwalue nin sinombu ivusi ram haharigi ram bevea be, “Giḡo haḡea Nitun God!” Haḡe mwa borotai ira vui hantai be rasav avo tehe bwatuna ram iloe be kea haḡea mwasigi Kraes.

⁴²Haḡe mwa ran mabon̄i mwa domare nin bwatutun vanua, mwa ban dagai vai lol ute bibieli. Take sinombu ram hiḡea mahavana be ram habwea, ram lol ron̄oe be si hav vis te dagai ninira.

⁴³Take mwa bevea lalainira be, “Noḡu be nav seserai Roroi Tavuha huri Rahuan Gara gabe God mwa Ratahigi ḡoro non sinombu alolona lalai bwatutun vanua dodolua mulei, bwatuna be kea haḡea lalaḡova gabe God nu horau huria.”

⁴⁴Haḡe kea mwa doretore lol imwa tataro vataha vanua.