Read Hano Luk 5 Bible Online

Luk 5 - Hano bible

Luk 5

¹Gubwen̄ vwate Jisas mwa du la vwavwanhaon numbu gaivua mwa uloinia be numbu gaivua Kenasaret, i sinombu ram bivirira vai abena be ramen roron̄tai avoana non God.

²Haḡe mwa ḡita waḡa gairua ran rav basagera lol one; atatun ravrav ige ran van ninira be ramen bwaga nora gabe.

³Haḡe Jisas mwa ḡalo la waḡa vwate gabe waḡan Saemon i mwa hudaligi be vi hen sogai luae tiri nin vwavwanhao. Jisas mwa domahuri la waḡa i mwa bagahira sinombu.

⁴Batena be mwa nogoi non avoana, mwa bevea lalai Saemon be, “Gin sogai lua waḡa vai lol ute roro ba lin̄ nomiu gabe huri ige.”

⁵Take Saemon mwa bwaliua be, “Ratahigi, gan lol rovoga hahavwani bon̄i duluai take gam hav rav te dum ige. Ta huri be gom bevea kunia gav lin̄ ron̄ mulei gabe.”

⁶Haḡe ram lin̄ mulei gabe i ram rav luae gabe nu masiri gin ige ivusi maragai, i nora gabe mwa abena be men mahera.

⁷I ram dai warera nora buluana la waḡa vwate be ramen mai ba buluira. Haḡe ram mai i ram hogon bamasiri waḡa gairua i ram bavora be ramen moru gin ige.

⁸Batena Saemon Pita mwa ḡita hano be mwa loli, kea mwa hivbwaubwau lolmatan Jisas, mwa bevea be, “Visdagai niniau Ratahigi! Huri inau atat hantai!”

⁹Kea maira rituai maia ram dan̄an̄a huri ige ivusi gabe ram laira lol gabe.

¹⁰Kunia mulei lalai ira buluana non Saemon, Semes mai Jon ira nitun Sebedi. Haḡe Jisas mwa bevea lalai Saemon be, “Gosav matagu tehe; huri nin garigi gov rav atatu.”

¹¹I ram rav saraḡo waḡara vai aute lol one, ram lin̄ nora viloḡoana duluai i ram huri Jisas.

¹²Haḡe gubwen̄ vwate Jisas mwa dogo, la bwatutun vanua vwate i gita, atatu vwate aia lepa nu dumwia. Mahavana mwa ḡita Jisas, mwa hiv bwaubwau mwa hudalinia mwa bevea be, “Ratahigi, be gos doron gos lol melmeloiau!”

¹³Jisas mwa hagai lua limana, mwa sibweria mwa bevea be, “Nam doron be rebehimwa vi melmelo.” Haḡe harova mwa lin̄ia darihou.

¹⁴Jisas mwa bevea lalainia be, “Gosav vevuri te lalai hei, dolua huri ginau nam lolia lalainigo, take goi van aben Tataroi ba vi gitago i gov vohai non hogoi kun Silo non Moses mwa bevea, huri be vi seserainia lalai sinombu be gon melmelo.”

¹⁵Take roroi huri Jisas mwa lon̄ahi ute duluai, i sinombu ivusi ram mai be ramen roron̄tainia i be rav rahu nin nora harova.

¹⁶Ta kea vi van dagai vai lol ute bibieli huri tataro.

¹⁷Gubwen̄ vwate batena Jisas mwa bagahi, gita ira Varise rituai maira Vagahin Silo ran togo aia ran mai nin vataha bwatutun vanua ata Kalili mai Judia i nin Jerusalem. Haḡe roron̄o non Ratahigi mwa do mai Jisas be vi varahu ira harova.

¹⁸Haḡe gita atatu rituai ram mai ram datal atat vwate be rebehina nu mate mwa eno la bata, ram lol ron̄oe be rav haroroinia lol imwa ba daua lolmatan Jisas.

¹⁹Bwatuna sinombu ivusi hala mwa hav dumi tehe be rav haroroinia. Haḡe ram dataloe vai amare la ulun imwa, i ram laḡas ulun imwa ram lin̄ia vai ata la batana borara vatugin sinombu ḡoro lolmatan Jisas.

²⁰Jisas mwa ḡita batoi nora binihimasigi garagusi, mwa bevea lalai atatu gea be, “Noḡu buluana vuromwa mwa binihi kaburaiana.”

²¹Ira vagahin Silo mai ira Varise ram dau bwatuna ram bevea ginira be, “Ihei wani uhu gabe mwa av deḡeteḡe vai alun God? God n̄ano gabe mwa binihi kaburai dum vuro!”

²²Take mwa ilo nora binihiva i mwa bevea lalainira be, “Huri hano be gim binbinihi kunia?

²³Kehibehe nu maron̄ron̄o? Be men vevea be, ‘Mwa binihi kaburai vuromwa,’ sa be men vevea be ‘Tomare ba lago’?

²⁴Take be gimen iloe be, Inau Nitun Atatu noḡu roron̄o abena la ureure be nav binihi kaburai vuro.” Haḡe mwa bevea lalai wani rebehina nu mate be, “Inau nam bevea lalainigo, be tomare, ba lai batamwa ba dabagil mulei vai la imwamwa!”

²⁵Darihou wani gea mwa domare la lolmatara duluai mwa lai bata gabe nu en aluna, mwa dabagilu mulei vai la imwana, mwa lol roroai God.

²⁶Haḡe kera duluai ram dan̄an̄a maragai! i ram masiri gin mataguana, ram lol roroai God, ram bevea be, “Is! Hava lalaḡov dan̄an̄a uhu tam ḡitae garigi!”

²⁷Ataguna gea, Jisas mwa bwihavare i mwa ḡita harahara homu vwate ihana Livae, mwa dogo la imwan harahara homu, i Jisas mwa bevea lalainia be, “Huriau.”

²⁸Haḡe Livae mwa domare mwa lin̄ non ginau duluai mwa huria.

²⁹Haḡe Livae mwa lol ginaganiana gaivua lol imwana huri Jisas, i ira harahara homu ivusi mai sinombu dodolua, ram dogo bul maia.

³⁰Gita ira Varise mai ira vagahin Silo rituai ram mai nin nora vatugigi ram ḡurutuinia be, “Huri hano gim ḡan ginau i gim mwin bul maira harahara homu maira vev duli?”

³¹Take Jisas mwa bwaliura mwa bevea be, “Kera gabe rebehira harova sigai alura ram hav doron te dokta, itake kera n̄an gabe ram haro.

³²Inau nam hav mai tehe be nav uloi ira vavtutu huri binihi leahi, take ira vev duli.”

³³Haḡe sinombu rituai ram bevea lalai Jisas be, “Roron̄tai non Jon ram ḡaragara vwavwa vaivusi i ram dataro, i roron̄tai non ira Varise mulei ram lol kunia, take nom roron̄tai ram ḡan ginau i ram mwinmwinu.”

³⁴Take Jisas mwa bwaliura be, “La mahavana be atatu vwate mwa siv lagi i mwa dogo radu mai non sinombu gim binihia be kera rav garagara vwavwa dum batena ram dogo radu maia? Sigai len̄len̄a!

³⁵Take gubwen̄ vi mai batena lagi vi lai dagaiana ninira, ataguna gea rav siv garagara vwavwa.”

³⁶Haḡe Jisas mwa bev avoan dalogai vwate lalainira be, “Nu hav tavuha tehe be gov hera gav gara ba bon ute mahera la gav maleiga. Be kea si lol kunia, vi lol hantai gav gara i tavihen gav gara sihav dadariha tehe mai gav maleiga.

³⁷I mulei sihav sisiai te waen gara vai lol bwelehu ḡuramega, be si ḡunia waen gara vi momogai bwelehu maleiga gea i waen vi rov bwebweu i bwelehu vi maverovero kaburai.

³⁸Take, waen gara vi sisiaiana vai lol bwelehu gara!

³⁹Atatu sihav doron te waen gara ataguna be nu mwin waen ata tuai. Bwatuna mwa bevea be waen ata tuai nu tavuha.”