Read Hano Luk 6 Bible Online

Luk 6 - Hano bible

Luk 6

¹Haḡe Jisas maira non roron̄tai ram la sivi umwan koni rituai lol Gubwen̄ Mambuharai. Gita non roron̄tai ram bavora ram n̄ari koni, ram bovorira i ram ḡanira.

²Take ira Varise rituai ram bevea be, “Huri hano gim lol ginau gabe nonda silo mwa bisigai be gisav lolia tehe lol Gubwen̄ Mambuharai?”

³Haḡe Jisas mwa bwaliura be, “Matu gin hav vasogoe tehe huri hano Deved nu lolia, mahavana kea maira non atatu maro nu gasira?

⁴Kea mwa dalin̄oro alolon imwan God, mwa lai bereti gabe ram dataroi ginia lalai God, i mwa ḡania i mwa laia lalai non atatu mulei. Kea nu hav hurin te nonda silo huri atatu vuroi be vi gan bereti gea, haḡe ta ira tataroi n̄ano mwa mahin̄aiana lalainira be rav gania.”

⁵Haḡe Jisas mwa bev nogonogoinia be, “Inau Nitun Atatu nam Ratahigi ḡoro gubwen̄ mambuharai.”

⁶Haḡe lol gubwen̄ mambuharai vwate Jisas mwa ban vai la imwa tataro i mwa bagahi. Gita atatu vwate aia limana mwatua nu mate.

⁷Haḡe ira vagahin Silo rituai mai ira Varise ram doron be rav habwe ginau be rav vevegi dum Jisas ginia, i kera ram hohov ḡoḡonainia be vi lol barahu lol gubwen̄ mambuharai.

⁸Take Jisas mwa ḡita dum nora binihiva haḡe mwa bevea lalai atatu, gabe limana nu mate, be, “Tu amare ba mai lol matara sinombu.” Kea mwa domare mwa du aia.

⁹Haḡe Jisas mwa hudalinira be: “Nav hudali kimiu: Hano nonda silo mwa mahin̄ainia lalai gida be tav lolia lol gubwen̄ mambuharai? Tav bului sage tav lol hantai? Tav varahu rahun atatu sage tav lol kaburainia?”

¹⁰Mwa ḡitara duluai dalisia, haḡe mwa bevea lalai wani gea be, “Sogai lua limwamwa.” Kea mwa lol kunia, i limana mwa davuha mulei.

¹¹Haḡe kera ram masiri gin lolhoro i ram bavora ram bevuri mau ginira be rav lol dum hano lalai Jisas.

¹²La mahavana gea Jisas mwa hae vai la vusi be men tataro, kea mwa dogo aia bon̄ duluai mwa dataro lalai God.

¹³Batena be mwa ran mabon̄i, mwa uloi non hala vai abena i mwa gita luara han̄vul domwan gairua, i mwa uloinira be ira hala:

¹⁴Saemon (kea gabe mwa uloinia be Pita) mai tuana Andru; Semes mai Jon, Vilip mai Batolomiu,

¹⁵Matiu mai Tomas, Semes gabe nitun Alvius, mai Saemon ninira vatugigi gabe ram barihainira ata Rom,

¹⁶Judas gabe nitun Semes, mai Judas Iskariot, kea gabe nu sine Jisas.

¹⁷Haḡe Jisas mai ira non hala ram himai mulei nin vusi vai lol tavola. Ira non hala ivusi mulei rituai ram du aia. Haḡe sinombu gaivua aia mulei ran mai dalis Judia, mai Jerusalem i ninira bwatutun vanua ata Taea mai Saidon huri tahi;

¹⁸ram mai be ramen ron̄oe ba rahu nin nora harova. Kera gabe vui hantai nu lolira, kera mulei ran mai i mwa barahura.

¹⁹Sinombu duluai ran lol ron̄oe be ramen sibweria, huri muramura mwa mwalue ninia i mwa barahura duluai.

²⁰Haḡe Jisas mwa ḡarere mwa ḡitara non roron̄tai mwa bevea be: “Kimiu ira hiru, giv ron̄ mwandavuha; huri be kimiu haḡea giv uloi God be nomiu Ratahigi!”

²¹“Kimiu gabe maro mwa ḡas kimiu uhu gaha; giv ron̄ mwandavuha huri be God vi lol bamasiri kimiu!” “Giv samwara kimiu gabe gim deidei uhu gaha, huri be giv mana!”

²²“Kimiu gabe atatu ram hun̄ai kimiu, i ram barihai kimiu, i ram bev hantai kimiu, i ram bevea be kimiu atat hantai, bwatuna be inau Nitun Atatu; giv ron̄mwandavuha!

²³Giv garigari kimiu batena vi loli, i giv savwogoro gin samsamwara, bwatuna be giv lai volimiu gaivua amare. Huri be ira sibira ran lol ginau n̄an kunia lalainira atatun vevsera.”

²⁴“Take hahagavi lalai kimiu gabe rosomiu gaivua uhu gaha; huri be gin lai nomiu rahuan tavuha huba!”

²⁵“Hahagavi lalai kimiu gabe gim ḡubwa uhu gaha; huri be maro vi gas kimiu!” “Hahagavi lalai kimiu gim mana uhu gaha; huri be giv deidei.”

²⁶“Hagavi lalai kimiu batena sinombu ram bev tavuhai kimiu bwatuna be ira sibimiu ran lol n̄an kunia lalai ira atatun vevsera dentene.”

²⁷“Take nam bevea lalai kimiu gabe gim roron̄taiau be; giv tabe nomiu ivwalu, giv lolotavuha lalainira gabe ram hun̄ai kimiu,

²⁸giv vatavuha irahei gabe ram bev hantai kimiu, i giv tataro hurira gabe ram lol bwarebware kimiu.

²⁹Be ihei mwa rabas valamwa vwate lin̄ia na rabas tavaluna mulei; be ihei mwa lai nom koti ninigo lai nom soti mulei lalainia.

³⁰Giv lai lalai ira hei ginau gabe ram hudaligi huria, haḡe be atatu mwa lai nom ginau gosav hudali te muleinia huria.

³¹Giv lol lalai irahei kunia be gim doron be rav lol lalai kimiu.”

³²“Be gim dabe atatu n̄ano gabe ram dabe kimiu, gisav lai te dum hano tavuha ninia. Huri ira hantain lalaḡo ram dabe kera gabe ram dabera mulei!

³³Be gim lalaḡo tavuha n̄ano lalainira gabe ram lalaḡo tavuha lalai kimiu, huri hano be giv lai vatavuha ninia? Huri ira hantain lalaḡo ram lol kunia mulei!

³⁴Sa be gim lai lalai irahei n̄ano gabe gim doronhohov be rav lai muleinia lalai kimiu, gisav lai te dum hano tavuha ninia? Huri ira hantain lalaḡo mulei ram lai lalai ira hantain lalaḡo be rav lai dum muleinia kunia n̄an gabe ran lai lalainira.

³⁵Mwa hav vora te kunia! Ta gov tabe nom ivwalu i gov lol tavuhainira. Giv hogosira gin ginau ta gisav doron te hohov be rav tabagilui muleinia. Kunia giv habwe tavwemiu gaivua, i giv vora ira nitun God Holomare Hae. Bwatuna kea mwa davuha lalai irahei gabe rasav vev te silo avkari lalainia i lalai ira hantain lalaḡo.

³⁶Giv sine hagavi kunia gabe tamamiu mwa sine hagavi.

³⁷Gisav vevegi te atatu dolua, God sihav vevegi te kimiu; gisav vevegi te hantai atatu, God sihav vevegi te dum kimiu; giv vinihi kaburai vuron atatu dolua, God vi vinihi kaburai vuromiu.

³⁸Giv laia lalai ira hei dolua i God vi laia mulei lalai kimiu: vi hogoniana lol nomiu gete tovtovo gabe vi haḡoe, vi rihurihuinia, vai votu vi malivwa. Tovtovo gabe gim dov irahei ginia, kea n̄an haḡea be God vi tov mulei kimiu ginia.”

³⁹Haḡe Jisas mwa bev avoan dalogai geki lalainira be; “Matagara vwate si hav tomuai te dum matagara dolua; be si lol kunia, kera saraḡo raru vi hovi lol lulu.

⁴⁰Wani hiḡehiḡe mwa hav lavoa te nin non vagahi; take la mahavana gabe mwa nogoi non hiḡehiḡe mwa siv vora kun non vagahi.”

⁴¹“Huri hano gom ḡarerei han̄ora lolmatan tuamwa take gom hav vinihi te huri n̄adun gai gaivua lol matama sibomwa?

⁴²Huri hano gom bevea aben tuamwa be, ‘Tua mahin̄a ba namen ari lua han̄ora gabe mwa en lol matamwa’; take gom hav gita te dum n̄andun gai gaivua gabe mwa en lol matamwa sibomwa? Giḡo hoḡoiḡoro! Muana giḡo sibomwa gov lai dagai n̄adun gai gaivua lol matamwa vuvuri gov siv gita dum tavuhai ute, kadogaha gov siv ari dagai han̄ora lolmatan tuamwa.”

⁴³“Gai tavuha sihav vwae te dum vwae hantai, i gai hantai sihav vwae te dum vwae tavuha.

⁴⁴Vataha gai mwa seserainia la vwaina, gisav tobwa te dum vwain vik alun ḡauli laso, sage alun vwain gaon taligaon waen la utevono visanisani.

⁴⁵Raumatan atatu mwa lai lua raumatan ginau nin raumatan ginau gabe mwa lol ḡoḡoe lol lolona. Huri bwan̄on atatu mwa bev lua ginau gabe lolona nu masiri ginia.”

⁴⁶“Huri hano gim uloiau be, ‘Ratahigi, Ratahigi,’ take gim hav lol te hano gabe nam bevea?

⁴⁷Irahei gabe ram mai huriau, i ram ron̄ siloku, i ram huri noḡu avoana--nav dovon̄ainia be kea kun hanigi.

⁴⁸Kea nu ḡun atatu gabe mwa haḡo imwa. Nu gel lulu roro i mwa dari bwatbwatuna alun vatu. Haḡe wai mwa rovo mwa malivwa i mwa rovo alun imwa gea; take mwa hav rihu te dumwi bwatuna be nu haḡoan tavuha.

⁴⁹Take ihei tehe gabe mwa ron̄ noḡu avoana i mwa hav huria tehe kea kun atatu gabe nu haḡo imwa ita bwatbwatuna sigai; batena be wailuluvi mwa rovo alun imwa gea mwa hovi darihou mwa masalan̄ai kaburai!”