Read Hano Luk 7 Bible Online

Luk 7 - Hano bible

Luk 7

¹Haḡe mahavana be Jisas mwa bev nogonogoi duluai non avoana lalai sinombu, kea mwa siv van vai Kapanium.

²Tomuai vwate ḡoro vatugin bwaloana ata Rom non atatun rovoga gabe mwa dabe maragainia mwa haro gaivua mwa abena be men mate.

³Batena be tomuai ḡoro mwa ron̄oe huri Jisas, kea mwa hora ira bwatmetua ira Jius rituai be rav hudali Jisas be vi mai ba barahu non atatun rovoga.

⁴Mahavana be ram botui Jisas ram hudali maragainia, ram bevea be, “Wani uhu mwa du be vi lai buluiana ninigo.

⁵Kea mwa dabe nonda sinombu, i nu haḡo imwa tataro sibona.”

⁶Haḡe Jisas mwa ban bul maira. Batena mwa sosori gin imwana, tomuai ḡoro mwa hora non buluana rituai be rai vevea lalai Jisas be, “Ratahigi, gosav lol te bilon̄ainigo. Nam hav dadariha tehe be gov dalin̄oro aten imwaḡu,

⁷kunia mulei nam hav binihi te be nav mai siboku abemwa. Take gov avo n̄ano i noḡu atatun rovoga gim rahu.

⁸Huri inau mulei nam dogo halaten tomuai ḡoro rituai liuau, i mulei nam bora tomuai ḡoro vatugigi vwate. Mahavana nam bevea lalai noḡu atatu vwate be, ‘Vano!’ haḡe mwa bano; i lalai vwate be, ‘Mai!’ haḡe mwa mai; i batena nam bevea lalai noḡu turin rovoga be, ‘Lol ginau uhu!’ haḡe mwa lolia.”

⁹Haḡe Jisas mwa ron̄oe mwa dan̄an̄a maragai kea mwa du burigai, mwa bevea lalai sinombu gabe ran huria be, “Nam bev mwasigi lalai kimiu be nam hav habwe te ihei gabe mwa binihimasigi garagusi kun wani uhu, vai votu lol vanua Israel!”

¹⁰Haḡe ira horata ram dabagilu mulei vai lol imwan tomuai ḡoro i ram habwea be non atatun rovoga mwa rahu mulei.

¹¹Atagun kea Jisas mwa ban vai lol bwatutun vanua ihana Nen; non roron̄tai mai sinombu gaivua ram ban bul maia.

¹²Batena mwa botui matgatavan bwatutun vanua gita sinombu ram lagoi lua atatmate. Kea voragaituvwa non nitun vavine bwero i sinombu gaivua nin bwatutun vanua uhu ram mai bul maia.

¹³Batena be Ratahigi mwa ḡita bwero gea mwa hagav maragainia haḡe mwa bevea lalainia be, “Gosav dei tehe.”

¹⁴Haḡe mwa ban sosorira gabe ram dataloe mwa sibweri bata gabe atatmate mwa en alolona i kera gabe ran tataloe ram du. Jisas mwa bevea be, “Mwalaḡelo! Nam bevea lalainigo be, Tomare!”

¹⁵Haḡe atatmate mwa do amare i mwa bavora mwa avo, i Jisas mwa lin̄ muleinia lalai ratahina.

¹⁶Sinombu duluai ram masiri gin mataguana i ram lol roroai God, ram bevea be, “Atatun vevsera gaivua mwa bisirai abeda! God mwa mai be men varahu non sinombu!”

¹⁷Haḡe roroi huri Jisas mwa ban sivi vanua duluai mai vanua ram do daldalisi.

¹⁸Batena roron̄tai non Jon ram bevuri lalainia huri ginau duluai be Jisas mwa lolia i mwa uloi kera gairua

¹⁹i mwa horara vai aben Ratahigi be raru men hudalinia be, “Giḡo haḡea wani gabe Jon nu vevea be vi mai, sage gav hohov radui atat dolua?”

²⁰Batena ram botui Jisas ram bevea lalainia be, “Jon Garuhisabuga mwa hora kamai be gamen hudalinigo be, giḡo haḡea wani gabe gam hohovia be vi mai, sage gav hohov atatu dolua radu?”

²¹Lol mahavana Jisas mwa barahu sinombu ivusi nin nora lalan̄an harova; i mwa hora lua vui hantai ivusi i mwa lol bugeri matara ivusi gabe ram matagaraga.

²²Haḡe kea mwa bwaliura ira horata non Jon be, “Giv tabagilu ba bevea lalai Jon havanau gabe gin ḡitae i gin ron̄oe: ira matagara ram ḡita dum ute, ira luḡu ram lago, ira lepa ram melmelo mulei, ira bwerovono ram ron̄ dum ute ira atatmate ram domare mulei, haḡe ira hiru ram ron̄ toretore huri Roroi Tavuha.

²³Samwarana gaivua lalai ira hei gabe ram hav vinihi te gairuruai aluku!”

²⁴Haḡe ataguna be ira horata non Jon ram dabagilu Jisas mwa bevuri huri Jon lalai sinombu, mwa bevea be, “Batena be gin vano huri Jon la vanua vuroi, gin vinihia be giv gita hano? Ariu mwa magibegibe gin lan̄i?

²⁵Gin vano be giv gita hano? Atatu gabe mwa sagasagai gaisaga ḡalkalana? Atatu gabe ram sagasaga i ram dogo lol rahuan tavuha ram dogo n̄an lol imwan ira lavoa!

²⁶Gin vevea lalaiau gin vano be giv gita hano? Atatun vevsera vwate? Asia, mwasigi haḡea take wani gabe gin gitae kea liu nin ira atatun vevsera.

²⁷Bwatuna Jon uhu wani gabe God mwa bevea lol ravrava sabuga be: ‘Geki haḡea noḡu horata nav horae amua ninigo be vi havan̄ matanhala hurigo.’ ”

²⁸Haḡe Jisas mwa mom bevea be, “Nam bev mwasigi lalai kimiu be, Jon uhu nu liu vataha atatu ran vora lol ureure geki; take wani gabe tirigi lol Rahuan gara gabe God mwa Ratahigi ḡoro non sinombu alolona, kea gaivua liu nin Jon.”

²⁹Batena sinombu duluai ram ron̄oe; kera haḡea liuhage maira harahara, atatu gabe ran tabe hala vavtutu gabe God nu lolia, i Jon mwa ḡaruhisabugainira.

³⁰Take ira Varise mai ira vagahin Silo ram barihai ginau gabe God mwa doron be vi lolia hurira bwatuna be ran varihai didi lai garuhisabuga nin Jon.

³¹Jisas mwa darihou non avoana mwa bevea be, “Nav dovon̄ai dum alen̄ara ata la gubwen̄ garigi alun hano? Kera kun hano?

³²Kera gea kun naturirigi gabe ram dogo lol tanon volvoligi. Tatan̄an vwate mwa ulo lalai tatan̄an dolua, mwa bevea be, ‘Gam uvwi bua bava huri lagiana, take gim hav savwogoro tehe! Gan lol iboin tavtavigi, take gim hav dei tehe!’

³³Jon Garuhisabuga nu mai nu garagara vwavwa i nu hav mwin te waen, gim bevea be, ‘Vui hantai alolona!’

³⁴Inau Nitun Atatu nam mai, nam ḡan i nam mwin i gim bevea be, ‘Gin gitae kea mwasin atatun gangan i mwinmwin gaivua i mwa bora buluana nora harahara homu, i ira vev duli!’

³⁵Take mataisao non God mwa lol bisirai non mwasigi lalainira gabe ram lai ḡoḡoe.”

³⁶Haḡe Varise vwate mwa ware Jisas be vi gan ginau bul maia, haḡe Jisas mwa dalin̄oro lol imwana i mwa do mahuri be men gan ginau.

³⁷Haḡe gita vavine vwate nin bwatutun vanua gea lol rahuna, non togoana nu hav tavuha tehe. Kea mwa ron̄ dumwia be Jisas mwa ḡan ginau lol imwan Varise, haḡe kea mwa lai wai sasavi bonboni nu masiri lol bwelehu vwate

³⁸mwa du atagun Jisas, mwa dei i mwa mehoi bwalagena gin mataruana. Haḡe mwa man̄ mamahainia gin iluna, i mwa rimrim bwalagena, i mwa salil hun wai sasavi bonboni alura.

³⁹Batena be Varise gabe nu ware Jisas mwa ḡita ginau uhu, mwa bev ḡoḡonainia lol binihina be, “Be wani uhu mwasigi atatun vevsera, kea si gita dumwia be hava vavine uhu gabe mwa sibweria; si ilo hava rahuan bibili vavine uhu nu togo alolona!”

⁴⁰Haḡe Jisas mwa av lua mwa bevea be, “Saemon nam binihi ginau vwate be namen vevea lalainigo.” I kea mwa bwaliua be, “Hano, Vagahi, vevea lalaiau.”

⁴¹Haḡe mwa bevea be, “Atatu gairua raru lai homu nin ratahin homu, vwate nu lai vatlegiga vudolua valima, i vwate dola n̄avul gailima.

⁴²Ihei ninira sihav vol te dum mulei homu, ratahin homu mwa harabamat kaburai vurora saraḡo. Behe ninira vi tabe ratahigi liu?”

⁴³Saemon mwa bevea be, “Nam binihi be, wani gabe nu harabamat vurona gaivua.” Haḡe Jisas mwa bevea be, “Gom bev mwasigi.”

⁴⁴Haḡe mwa ban burigai huri vavine i mwa bevea lalai Saemon be, “Gom ḡita vavine uhu? Nam haroro lol imwamwa, i gom hav lai te wai lalaiau huri bwalageku, take kea nu bwaga bwalageku gin mataruana i mwa man̄ mamahainira gin iluna.

⁴⁵Giḡo gon hav lai te ḡoḡoau gin rimrimi, take kea nu hav mambu tehe be men rimrim bwalageku ataguna be nan haroro.

⁴⁶Giḡo gon hav lol te vatuvwai hun wai sasasavi bonboni huri bwatuku, take kea nu sasav bwalageku gin wai bonboni.

⁴⁷Bwatuna gea nam bevea lalainigo, be, Vurona gabe ivusi mwa binihi kaburainira, bwatuna non lolotabetabe gaivua. Take ihei gabe nu lai binihi kaburai tirigi, mwa dovon̄ai lolotabetabe tirigi.”

⁴⁸Haḡe Jisas mwa bevea lalai vavine be, “Vuromwa mwa binihi kaburaiana.”

⁴⁹Haḡe kera rituai gabe ram du dalis tanon ginaganiana bul maia ram bavora ram avo mau ginira be, “Ihei wani uhu gabe mwa binihi kaburai vuro?”

⁵⁰Take Jisas mwa bevea lalai vavine be, “Nom binihimasigi garagusi nu varahugo; van lol tamwata.”