Read Hano Luk 8 Bible Online

Luk 8 - Hano bible

Luk 8

¹Ataguna gea be Jisas mwa lago sivi bwatutun vanua mai vanua ririgi rituai, kea mwa doretore alun Roroi Tavuha huri Rahuan gara gabe God mwa Ratahigi ḡoro non sinombu alolona. Ira roron̄tai han̄vul domwan gairua ram ban bul maia,

²i mulei ira vavine rituai kera gabe vui hantai ran mwalue ninira i kera gabe ran rahu nin nora harova. Mere ata Makdala gabe vui hantai gaibitu ran mwalue ninia;

³Joana tasalan Kusa gabe gitaḡoro ata lol imwan Herod; mai Susana mai ira vavine rituai gabe ran bului Jisas mai ira non roron̄tai gin rosora.

⁴Gita sinombu ram mai radu huri Jisas nin bwatutun vanua ivusi; i sinombu ivusi ram ḡoḡo. Haḡe Jisas mwa bev avoan dalogai geki lalainira be:

⁵“Atatu vwate mwa bano be men gaburai biri loloara. La mahavana gabe mwa ḡaburainia rituai ram hovi la hala, i mwa barahiana, i manu ram ḡan bebegainia.

⁶I rituai ram hovi lol tanogin vatu, i la mahavana be ram sisiu hae vuvuri ram ḡoru, bwatuna be tano nu n̄alan̄ala.

⁷Rituai ram hovi lol ḡauli, i ḡauli mwa mauri bultai mai biri i mwa bivihi haravuinira.

⁸I biri rituai ram hovi lol mwasin tano; ram mauri i ram bwaevwae, vwaina vudolua la gaituvwa.” Haḡe Jisas mwa ulo, mwa bevea be, “Ihei bwerona abena na ron̄oe!”

⁹Haḡe non roron̄tai ram hudali Jisas huri binihiva ata lol avoan dalogai gea,

¹⁰haḡe Jisas mwa bwaliura be, “Mwa hogoi lalai kimiu be gimen ilo ginau ririhai huri rahuana gabe God vi vora Ratahigi Lavoa ḡoro atatu duluai, take lalainira dodolua, mwa mai gin avoan dalogai, huri be rav gitae take rasav gita te batoia, i rav roron̄tai take rasav ron̄ te batoia.”

¹¹“Geki binihiva huri avoan dalogai: Biri haḡea avoana non God.

¹²Biri gabe ram hovi la hala mwa du hurira gabe ram ron̄oe, take vui hantai mwa mai mwa lai dagai avoana nin lolora huri be bereva ram binihimasigi ba rahu.

¹³Biri gabe ram hovi lol tanogin vatu mwa du hurira gabe ram ron̄ avoana i ram lai ḡoḡoe gin samsamwara. Take avoana mwa hav garagusi te alolora; ram binihi mwasigi n̄an, i ram hovi dagai la mahavana gabe mwa lol ron̄ora.

¹⁴Biri gabe ram hovi lol ḡauli mwa du hurira gabe ram ron̄ avoana, take kalkaliana mai rosomiu mai doronivanan vigohoi ram mai alura i ram haravuinira, i mwasira ram hav metua te dum.

¹⁵Biri gabe ram hovi lol mwasin tano mwa du huri ira hei gabe ram ron̄ avoana i ram ḡoḡoi ḡoroe gin mwasigi i lolotavuha, i ram du wasigi vaivotu ram bwae.”

¹⁶“Atatu si hav tumus te bulu vuvuri gim dabwaḡoroe gin disi sage gim daua aten bata. Take vi taua la mwasin tanona, be sinombu rav gita gigitana batena ram haroro.”

¹⁷“Havanau tehe mwa dahuliana vi lai bisirainia lol ute melmelo, i havanau tehe mwa hoḡoi ḡoroana, vi habweana i vi laiana vai lol gigita.”

¹⁸“Giv gitaḡoro kunhanigi gim roron̄tai; bwatuna ihei gabe non ginau abena huba, God vi lai mulei ginau rituai lalainia, take ihei gabe non ginau sigai, God vi lai dagai ninia havanau kolo be mwa binihia be mwa haḡoe huba.”

¹⁹Haḡe ratahin Jisas mai ira tuana ram mai huria, take ram hav mai te dum sosoria bwatuna sinombu ivusi.

²⁰Haḡe atatu vwate mwa bevea lalai Jisas be, “Ratahimwa mai ira tuamwa ram du avare ram doron be ramen gitago.”

²¹Take Jisas mwa bevea lalai sinombu be, “Ratahiku mai ira tuaku kera gabe ram ron̄ avoana non God i ram dabea.”

²²La gubwen̄ vwate Jisas mwa ḡalo la waḡa vwate maira non roron̄tai mwa bevea lalainira be, “Tai van tuhi vai haltavalun numbu gaivua.” Haḡe ram bano.

²³Haḡe batena be ram rovo, Jisas mwa maturu. Haḡe vilehi n̄an lan̄ wasi mwa hivo lol numbu gaivua i waḡa mwa bavora mwa utu wai be men moru.

²⁴Haḡe non roron̄tai ram mai huri Jisas ram bamatae, ram bevea be, “Ratahigi, Ratahigi! Mwa abena be tamen mate!” Haḡe Jisas mwa domare mwa borotai lan̄i mai rebu; i mwa daro mulei.

²⁵Haḡe mwa bevea lalainira non roron̄tai be, “Nomiu binihimasigi garagusi behe?” Take kera ram dan̄an̄a i ram matagu, i ram avo mau ginira ram bevea sibora be, “Hava atatu geki? Gabe mwa borotai lan̄i, mai rebu, i ram ron̄ silona!”

²⁶Haḡe Jisas maira non roron̄tai ram rovo rahurahu vai lol utuhin vanua Kerasa, gabe mwa dogo haltavalun numbu gaivua batoi Kalili.

²⁷Batena Jisas mwa bute aute, i mwa habwe atatu vwate nin bwatutun vanua, vui hantai ram lolia. Kea mwa hav sagasaga tehe mahavan n̄ava huba i mwa hav togo tehe lol imwa, take lol malan̄ara atat mate.

²⁸Haḡe mahavana gabe mwa ḡita Jisas mwa haharigi amare i mwa hovi hurinia, mwa bevea gin silo gaivua be, “Jisas Nitun God Holomare Hae! Havanau gom doronia niniau? Nam navohigo be, gosav lol te ḡagarasiau!”

²⁹Mwa bevea kungeki bwatuna be Jisas nu hora lua vui hantai be men bwihavare ninia. Mahavana ivusi vui hantai mwa lol maragainia, gaituvwa n̄an be mwa bauhi wasiana na bwalagena mai limana gin gaotalai, be vi to vauhi, kea vi roto gaotalai i vui hantai vi lagoinia vai lol vanua vuroi.

³⁰Haḡe Jisas mwa hudalinia be, “Ihamwa ihei?” Haḡe kea mwa bwaliua be, “Ihaku be ‘Vatugi Gaivua,’ ” bwatuna be vui hantai ivusi ran haroro alolona.

³¹Haḡe vui hantai mwa hudali Jisas be sihav hora te dagainira vai lol banoi roro.

³²Aia vatugin boe ivusi ram huhua la malḡiḡin vusi. Haḡe vui hantai kera geki ram hudali mamaragai Jisas be vi mahin̄ainira vai lol vatugin boe, haḡe mwa hora luara.

³³Ram bwihavare nin atatu i ram haroro lol boe, i boe duluai gea ram rovo viluslusi vai la matavwen bahara sa bwabwa i ram burere vai lol numbu gaivua ram mwinu.

³⁴I kera gabe ran gitaḡoro boe, ram ḡita ginau gabe nu loli ram romaragai ram bavatui roroi lol bwatutun vanua mai vanua ririgi daldalisia.

³⁵Haḡe Sinombu ram ban be ramen gita ginau gabe nu loli. I batena ram botui Jisas, ram habwe atatu kea gabe vui hantai ran mwalue ninia mwa do ata hurin bwalagen Jisas, nu sagasaga; i binihina mwa davuha mulei; i kera duluai ram matagu.

³⁶Haḡe kera gabe ran gitae ram bevea lalai sinombu kun hanigi nu varahu atatu gea.

³⁷Haḡe sinombu duluai lol vanua kera gea ram hudali Jisas be vi vis dagai bwatuna kera ram matagu maragai. I Jisas mwa ḡalo mulei la waḡa i mwa ban dagai.

³⁸Atatu kea gabe vui hantai ran mwalue ninia mwa hudali Jisas be, “Mahin̄a ba nav mai maigo.” Take Jisas mwa hora dagainia, mwa bevea be,

³⁹“Tabagil mulei vai la vanuamwa ba bev lua hano gabe God nu lolia lalainigo.” Haḡe atatu gea mwa lago sivi bwatutun vanua gea mwa bevuri huri havanau gabe Jisas mwa lolia lalainia.

⁴⁰Batena Jisas nu tabagilu mulei vai haltavalun numbu gaivua, sinombu ram laiḡoḡoe, bwatuna be ran tu ram hohovia.

⁴¹Haḡe atatu vwate ihana Jaerus mwa botu; kea lavoa vwate ata lol imwa tataro, mwa hivbwaubwau hurin bwalagen Jisas mwa hudalinia be men van vai lol imwana,

⁴²bwatuna be nituna daulato voragaituvwa, tauluna han̄vul domwan gairua, mwa abena be men mate. Batena be Jisas mwa lago, sinombu gaivua ram la biviria dalisia.

⁴³Haḡe vavine vwate alolora sinombu daga rovrovo mwa lolia taul han̄vul domwan gairua, mwa hav mosi te dum; kea nu tavwe ira dokta gin non homu duluai take ihei vwate mwa hav varahu te dumwia.

⁴⁴Kea mwa mai lol davolan sinombu atagun Jisas i mwa sibweri ḡereḡeren gaisagana, haḡe daga rovrovo mwa mosi.

⁴⁵Jisas mwa hudaligi be, “Ihei mwa sibweriau?” Take kera duluai ram bisigai, haḡe Pita mwa bevea be, “Ratahigi sinombu ivusi ram dalisigo ram bivirigo.”

⁴⁶Take Jisas mwa bevea be, “Atatu vwate mwa sibweriau huri nam ron̄ batoia be muramura mwa mwalue niniau.”

⁴⁷Haḡe vavine mwa ḡitae be mwa iloana huba, i mwa mai gin mataguana, i mwa hivbwaubwau huri bwalagen Jisas la lolmatan sinombu, kea mwa bev seserainia huri hano mwa sibweria i kunhanigi mwa rahu darihou.

⁴⁸Haḡe Jisas mwa bevea lalainia be, “Nituku, nom binihimasigi garagusi mwa barahugo, van lol tamwata.”

⁴⁹Batena Jisas mwa avo, gita horata vwate mwa mai nin imwan lavoa, mwa bevea lalainia be, “Nitumwa nu mate, gosav mom lol te bidoi Vagahi.”

⁵⁰Ta Jisas mwa ron̄ dumwia i mwa bevea lalai Jaerus be, “Gosav matagu tehe; gov binihimwasigi n̄ano, i kea vi rahu.”

⁵¹Batena be Jisas mwa botu la imwa, mwa hav mahin̄a tehe be atatu gaituvwa vi haroro bul maia alolon imwa, take Pita, Jon mai Semes mai taman naturigi i ratahina n̄an.

⁵²Kera duluai ram dei i ram ron̄ mwahantai huri naturigi. Haḡe Jisas mwa bevea be, “Gisav dei tehe, naturigi mwa hav mate tehe--kea mwa maturu n̄ano!”

⁵³Take ram manuhia bwatuna ram iloe be daulato nu mate.

⁵⁴Jisas mwa lai limana i mwa bevea amare be, “Tomare nituku!”

⁵⁵Haḡe rahuna mwa mai mulei i kea mwa domare darihou; haḡe Jisas mwa bevea lalainira be rav lai ginaganiana lalainia.

⁵⁶Haḡe tamana mai ratahina ram dan̄an̄a maragai, take Jisas mwa bisigai ginira be rasav vevea te lalai ihei huri ginau gabe nu lolia.