Read Hano Luk 9 Bible Online

Luk 9 - Hano bible

Luk 9

¹Haḡe Jisas mwa ware ira roron̄tai han̄vul domwan gairua vai utegaituvwa, i mwa lai muramura mai roron̄o lalainira be rav hora lua vui hantai duluai i rav varahu harova.

²Haḡe mwa hora luara be rav toretore huri Rahuan Gara gabe God mwa Ratahigi alolona, i be rav lol barahu ira harova.

³Mwa bevea lalainira be, “Gisav haḡo te havanau lol nomiu lagoana: gisav haḡo te gaisaga sa nomiu tan̄ sarisarigi gisav haḡo te ginaganiana sa mwane vaivotu be gairuan gaisagamiu.

⁴Halabehe tehe ram lai ḡoḡo kimiu, giv togo lol imwa gea vai votu be giv lin̄ bwatutun vanua gea;

⁵halabehe tehe be sinombu ram hav lai te ḡoḡo kimiu, giv derai bwatutun vanua gea i giv darudaruai kaburai taniavun bwalagemiu huri dovon̄ana lalainira.”

⁶Haḡe ira roron̄tai ram domare ram ban sivi vanua duluai ram doretore huri Roroi Tavuha, i ram lol barahu sinombu vataha ute.

⁷Haḡe Herod kea lavoa Kalili, mwa ron̄ ginau duluai gabe mwa loli, binihina mwa n̄ala huria, bwatuna atatu rituai ram bevea be, Jon Garuhisabuga nu tomare mulei nin mateana.

⁸I kera rituai ram bevea be Elaija mwa bisirai, i rituai be vwate ninira atatun vevsera ata tuai mwa domare mulei vai lol rahuana.

⁹Haḡe Herod mwa bevea be, “Nan tav roto bwatun Jon huba; take ihei geki gabe nam mom ron̄ roroi huria?” I kea mwa lol ron̄oe maragai be vi gita Jisas.

¹⁰Haḡe ira hala ram dabagilu mulei i ram bevea lalai Jisas ginau duluai gabe nu loli. Haḡe kea mwa laira ram ban dagai mau ginira vai la bwatutun vanua mwa huiana be Betsaeda.

¹¹Batena be sinombu ram ron̄oe ram huria. Kea mwa lai ḡoḡora; i mwa avo lalainira huri rahuan gara gabe God mwa Ratahigi ḡoro non sinombu alolona, i mwa lol barahu irahei gabe ram hiḡe rahuana.

¹²Baten be alo mwa abena be men roro, ira roron̄tai han̄vul domwan gairua ram mai abena ram bevea lalainia be, “Nu tavuha be gov hora dagai sinombu be ramen vano vai lol vanua ririgi mai ute loloara gabe ram dogo dalis ute uhu be rav lai dum ginaganiana i rav habwe tanon maturuva; bwatuna ute uhu vanua vuroi.”

¹³Ta Jisas mwa bwaliura be, “Kimiu sibomiu giv lai ginaganiana lalainira.” Haḡe ram bwaliua be, “Kamai gam haḡo bereti gailima mai ige gairua n̄ano. Matu gom doron be gai van be bol ginaganiana huri sinombu duluai uhu?”

¹⁴(Ira atamwani duluai kun vasan̄vul valima.) Haḡe Jisas mwa bevea lalai non roron̄tai be, “Giv vevea lalai sinombu be rav togo ata la tatan̄ana kun n̄avul gailima la tatan̄ana gaituvwa.”

¹⁵Ataguna be ira roron̄tai ram lol vuvuria,

¹⁶kadogaha Jisas mwa lai bereti gailima gea mai ige gairua, i mwa dada vai amare, mwa lai avoan avkari hurira lalai God, mwa biha borara, i mwa laira lalai non roron̄tai be ramen betea lalai sinombu.

¹⁷Haḡe sinombu duluai ram ḡania havava ram ḡubwa, i non roron̄tai ram haraḡoḡo mamarahan ginaganiana gabe dorena ran hav gan te vuvuria, ram hogon bamasiri gete han̄vul domwan gairua.

¹⁸Gubwen̄ vwate Jisas mwa dataro gahena, non roron̄tai ram mai abena, haḡe mwa hudalinira be, “Sinombu ram bevea be inau ihei?”

¹⁹Haḡe ram bwaliua be, “Rituai ram bevea be giḡo Jon Garuhisabuga, rituai be giḡo Elaija, rituai ram bevea be atatun vevsera vwate ata tuai mwa domare mulei vai lol rahuana.”

²⁰Jisas mwa hudalinira be, “Matu hanigi huri kimiu, gim beveau be ihei?” Haḡe Pita mwa bwaliua be, “Giḡo Kraes non God.”

²¹Haḡe Jisas mwa bisigai ginira gin avoan wasi be rasav seserai te ginau uhu lalai ihei dolua.

²²I mwa bev rahurahuinia be, “Inau Nitun Atatu mwa du be nav ron̄ḡagarasi i ira bwatmetua maira muai tataroi, maira vagahin silo rai varihaiau. Kera rai wehiau nai mate, take atagun gubwen̄ gaitolu God vi lol domare muleiau.”

²³Haḡe mwa bevea lalainira duluai be, “Be ihei mwa doron be vi huriau wani gea vi derai non doroniva sibona, vi haḡo domarei non volovolo vataha gubwen̄ ba huriau.

²⁴Be ihei mwa doron be vi varahu rahuna sibona, wani gea vi lin̄ kaburai rahuna huriau, vi habwea.

²⁵Matu atatu vi lai ginau duluai lol ureure geki, ta kea vi rihu holhole vi ron̄ ḡagarasi, ke vi lai dum havanau ginia? Sigai!

²⁶Be atatu mwa busbusi giniau mai noḡu silo vagahi kunia mulei inau Nitun Atatu nav busbusi ginia mahavana gabe nav mai lol noḡu ginau sarisari mai non Tata mai nora enjel sabuga.

²⁷Nam bev mwasigi lalai kimiu be atatu rituai teti rasav mate te radu vai votu rav gita Rahuan Gara Gabe God mwa Ratahigi ḡoro non sinombu alolona.”

²⁸Wik gaituvwa atagun ginau kera geki be nu vevera, Jisas mwa lai Pita, Jon, mai Semes bul maia vai la vusi huri tataro.

²⁹Haḡe mahavana gabe mwa dataro, gitanan lolmatana mwa dori, i gaisagana ram abwaga kun dodo maita.

³⁰Haḡe darihou atatu gairua ramuru avo bul maia. Atatu kera geki Moses mai Elaija,

³¹raru visirai lol sarisari atamare i ramuru bevuri bul mai Jisas huri be kun hanigi vi lol seserai doroniva non God gin mateanana Jerusalem.

³²Pita maira non buluana ram maturu maragai take ram dol mamata, i ram ḡita sarisarin Jisas i atatu gairua gabe ramuru du bul maia.

³³Mahavana gabe ramuru ban dagai nin Jisas, Pita mwa bevea lalainia be, “Ratahigi nu tavuha be tav togo teti. Gatol vi halevai valdogi gaitolu vwate hurigo, vwate huri Moses, i vwate huri Elaija.” (Ta kea mwa hav ilo te hano mwa bevea.)

³⁴La mahavana be mwa avo radu ten lan̄ mwa bisirai i mwa malḡorora; haḡe ira roron̄tai ram matagu gin tenlan̄i gabe mwa haravuinira.

³⁵Haḡe ram ron̄ avoana lol ten lan̄ gea mwa bevea be, “Geki haḡea nituku gabe nan gita luae--giv ron̄oe!”

³⁶Atagun silo gea ram dol ḡita Jisas gahena. Non roron̄tai ram hav vev te ginau gaituvwa lalai ihei lol mahavan gea, huri ginau ran gitae.

³⁷Haḡe gubwen̄ dolua ram dabagilu nin vusi, i sinombu gaivua ram bisogari bul mai Jisas.

³⁸Atatu vwate mwa ulo lol sinombu be, “Vagahi! Nam hudali maragainigo huri nituku voragaituvwa be gov gitae!

³⁹Batena be vui hantai mwa bora aluna i mwa haharigi darihou amare, mwa matmateivula i busona mwa mwalue nin bwan̄ona. Mwa ron̄ ḡagaras ḡaoḡao i mwa ririhai be men derainia!

⁴⁰Nam hudali nom roron̄tai be ramen hora luae, ta ram hav lol te dumwia.”

⁴¹Jisas mwa bwaliua be, “O kimiu ata garigi nomiu binihimasigi sigai i gim bahala maragai! Nav togo mai kimiu vain̄ava kunhanigi? Nav haḡo mai kimiu vain̄ava kunhanigi?” Haḡe mwa bevea lalai tamana be, “Lai nitumwa vai abeku.”

⁴²Batena be naturigi mwa mai, vui hantai mwa bohainia vai ata i mwa matmatei-vula. Jisas mwa borotai vui hantai, i mwa barahu naturigi, vuvuri mwa lai muleinia lalai tamana.

⁴³Haḡe sinombu duluai ram dan̄an̄a gin muramura non God. Batena sinombu ram dan̄an̄a radu huri ginau duluai gabe Jisas nu lolira; kea mwa bevea lalai non roron̄tai be,

⁴⁴“Giv havan̄ bweromiu ba lai ḡoḡo hano be nai vevea! Mwa abena be vi lin̄iau inau Nitun Atatu vai lol limara atatu.”

⁴⁵Take non roron̄tai ram hav lai te dum binihiva huria. Mwa dahulinia ninira huri be rasav ron̄ te batoia, i kera mulei ram matagu be ramen hudalinia huri binihiva ata lol avoana geki.

⁴⁶Haḡe ira roron̄tai ram biavoavo ginira huria be ihei ninira vi vora lavoa alolora.

⁴⁷Jisas mwa ilo nora binihiva, haḡe mwa lai naturigi vwate mwa daria hurinia,

⁴⁸haḡe mwa bevea lalainira be, “Be ihei tehe mwa lai ḡoḡo naturigi uhu lol ihaku, mwa lai ḡoḡoau; i ihei tehe mwa lai ḡoḡoau, mwa lai ḡoḡo wani gabe mwa horau. Huri be ihei tirigi alolomiu, kea haḡea tomuai alolomiu.”

⁴⁹Jon mwa av lua, mwa bevea be, “Ratahigi, gam ḡita atatu vwate nu hora lua vui hantai lol ihamwa, i gam du ḡoroe be sihav lol te lalaḡova gea, bwatuna kea mwa hav vora te bul mai gida.”

⁵⁰Jisas mwa bevea lalainira non roron̄tai be, “Gisav lol te ḡoroe, bwatuna be ihei tehe be mwa hav varihai te kimiu kea bul mai kimiu.”

⁵¹Batena gabe mwa abena gin gubwen̄ gabe Jisas vi hae mulei alolona, kea mwa binihi tuhi be vi hae vai Jerusalem.

⁵²Haḡe mwa hora non horata be rav van amua, i ram bano vai lol vanua vwate Samaria be ramen lol vatuvwai huria.

⁵³Take sinombu ata aia ram hav lai te ḡoḡoe, bwatuna nu iloana be vi hae vai Jerusalem.

⁵⁴Batena non roron̄tai gairua Semes mai Jon ramuru ḡita ginau uhu, ramuru bevea be, “Ratahigi, gom doron be gamen hudaligi huri gabi be men himai nin amare ba oda kaburainira?”

⁵⁵Ta Jisas mwa ban burigai mwa du ḡorora;

⁵⁶haḡe Jisas mai non roron̄tai ram ban vai la vanua dolua.

⁵⁷Haḡe la mahavana gabe ram lago, atatu vwate mwa bevea be, “Nav hurigo vai halabehe tehe be gov lago.”

⁵⁸Jisas mwa bevea lalainia be, “Vwiriu turu malan̄ara abena, i manu mulei inogira abena, take inau Nitun Atatu tanoḡu nu sigai huri maturuva sa mabuana.”

⁵⁹I kea mwa bevea lalai atatu dolua be, “Huriau.” Take atatu gea mwa bevea lalainira be, “Ratahigi nan van huba ba davi tamaḡu.”

⁶⁰Jisas mwa bwaliua be, “Lin̄ atatmate ba ran tavi nora atatmate. Giḡo vano ba doretore huri rahuan gara gabe God mwa Ratahigi ḡoro non sinombu alolona.”

⁶¹Haḡe atatu dolua mulei vwate mwa mom bevea be, “Nav hurigo Ratahigi; take gov mahin̄aiau be nav van ba bev noḡu vituleiana lalai ira havaku.”

⁶²Jisas mwa bwaliua be, “Ihei, tehe mwa dau bwatuna be men gelgeli i mwa ḡarere burigai ḡaoḡao kea nu hav dadariha tehe be vi lalaḡo huri rahuan gara gabe God mwa Ratahigi ḡoro non sinombu alolona.”