Read Hano Jon 1 Bible Online

Jon 1 - Hano bible

Jon 1

¹Amua nin bwatun ureure, Avoana nu togo huba, kea nu togo mai God, i kea kun God.

²Nin bwativuna radui avoana nu togo mai God huba.

³God nu lol ginau duluai ginia; ginau vwate lol tauva nu hav tauana te dagai ninia.

⁴Avoana uhu kea bwatun rahuana, i rahuana geki mwa lai gigita lalai atatu duluai.

⁵Haḡe gigita mwa ḡigita lol ute meto, ta ute meto mwa hav tu te ḡoro dumwia.

⁶God nu hora non horata vwate, ihana Jon,

⁷kea nu mai be men vev luae lalai sinombu huri gigita geki, huribe atatu duluai rav ron̄ roroi huria ba binihimwasigi.

⁸Kea sibona nu hav vora te gigita; ta nu mai n̄an be men vevsera huri gigita.

⁹Geki haḡea mwasin gigita, gigita uhu mwa mai lol ureure i mwa ḡigitai atatu duluai.

¹⁰Avoan mwa dogo lol ureure, i God nu tau ureure ginia, take ureure mwa hav gita te batoia.

¹¹Kea nu mai lol mwasin vanuana, take non sinombu sibona ran hav lai te ḡoḡoe.

¹²Ta kera rituai gabe ran lai ḡoḡoe, ram binihimwasiginia; i mwa lolira ram mai gi ira nitun God mwasigi.

¹³Ran hav mai tehe gi ira nitun God hurin alen̄an ureure, kun gabe, naturirigi ram bora nin ira tamara lol ureure geki; ta God sibona mwa doron be vivora Tamara.

¹⁴Haḡe Avoana mwa bora atatu, mwa masiri gin hogoi i mwasigi, i mwa dogo mai gida. Tam ḡita sarisarina, sarisari gabe nu laia kun gabe Nitun vora gaituvwa non Tamana.

¹⁵Jon nu avo huria. Nu vev luae be, “Geki haḡea wani gabe nan avo huria nan vevea be, ‘Kea vi mai ataguku, ta kea lavoa niniau, bwatuna kea nu togo amua nam siv vora.’ ”

¹⁶Kea mwa lol bamasiri gida duluai gin non hogoi tavuha, i mwa lai lalan̄an vatavuha vatvataha gida.

¹⁷God nu lai Silo sivi Moses, take God mwa lai hogoi i mwasigi sivi Jisas Kraes.

¹⁸Atatu vwate mwa hav gita te radui God. Nituna vora gaituvwa, gabe kea kun God sibona i mwa dogo hurin Tamana, kea mwa seserainia lalai gida.

¹⁹Ira tomuai ḡoro ata Jius nin Jerusalem ram hora ira tataroi maira ata la varan Livae vai aben Jon, ram hudalinia be, “Giḡo ihei?”

²⁰Jon mwa hav busbusi tehe be men vwaliura, take mwa bev lua didininia mwa bevea be: “Nam hav vora te Kraes.”

²¹Haḡe ram hudalinia be, “Matu giḡo ihei? Giḡo Elaija?” Take Jon mwa bwaliura be, “Sigai, nam hav vora te Elaija.” Haḡe ram hudali muleinia be, “Giḡo Atatun Vevsera?” Take mwa bwaliura be, “Sigai.”

²²Haḡe ram bevea lalainia be, “Kunia vevea lalai kamai be giḡo ihei. Bwatuna be gav lai avoan vwaliu mulei lalainira be ran hora kamai. Take giḡo sibomwa gom bevego be ihei?”

²³Jon mwa bwaliura gin avoana non atatun vevsera Aesaia mwa bevea be: “Inau ‘silon wani gabe mwa ulo la vanua vuroi be: Giv lol bavtutui halan Ratahigi huri non lagoana!’ ”

²⁴Ira horata, gabe ira Varise ran horara,

²⁵ram hudali Jon be, “Be giḡo gom hav vora te Kraes sa Elaija sa Atatun Vevsera, huri hano gom garuhisabuga?”

²⁶Jon mwa bwaliura be, “Nam garuhisabuga gin wai, take atatu vwate mwa du bul mai kimiu gim hav iloe tehe.

²⁷Kea mwa mai ataguku, take inau siboku nam hav dadariha tehe be nav tugu gaon non sus.”

²⁸Ginau geki nu loli Betani, haltavlun wai Jodan batoi halan al tavwaga, lol ute gea be Jon mwa garuhisabuga aia.

²⁹Haḡe gubwen̄ dolua Jon mwa ḡita Jisas mwa mai huria, mwa bevea be, “Kea ha kahaḡa be Nitui Sipsip bilan God, gabe mwa lai dagai vuron ureure!

³⁰Wani haḡe uhu be nan vevea huria be, ‘Atatu vwate vi mai ataguku, ta kea lavoa niniau, bwatuna nu togo amua inau nam siv vora.’

³¹Nan hav iloe tehe be kea vivora atatu kunhanigi, take nan mai nam garuhisabuga gin wai huribe men lol seserai wani gea lalai sinombu ata Israel.”

³²Jon mwa bev luae be: “Nan gita Vui nu himai nin amare kun manbona vai aluna.

³³Nam hav iloe te radu be kea haḡea, take God gabe nu horau be nav garuhisabuga gin wai nu vevea lalaiau be, ‘Gov gita wani gabe Vui vi himai aluna; kea haḡea wani gabe vi garuhisabuga gin Vui Sabuga.’ ”

³⁴Haḡe Jon mwa bevea be, “Nam gitae, i nam bevea lalai kimiu be, kea haḡea Nitun God.”

³⁵Haḡe gubwen̄ dolua Jon nu tu aia mulei mai non roron̄tai gairua,

³⁶batena be mwa ḡita Jisas mwa laḡao, mwa bevea be, “Gitae kea ha kahaḡa be Nitui Sipsip bilan God!”

³⁷Haḡe ira roron̄tai non Jon gairua ramuru ron̄ avoana geki ramuru huri Jisas.

³⁸Jisas mwa ban burigai, mwa ḡitara be ramuru huria, mwa hudalinira be, “Gumuru hiḡe havanau?” Ramuru bwaliua be, “Matu gom do behe Rabae?” (Avoana geki binihiva be “Vagahi.”)

³⁹Jisas mwa bwaliura be, “Giru mai ba ḡitae.” (Mahavana kun alo gaivasi huba atagun bobon alo.) Haḡe ramuru bano bul maia ramuru ḡita ute be mwa dogo aia, i ramuru dogo bul maia huri gubwen̄ duluai.

⁴⁰Vwate ninira gea Andru, gabe tuan Saemon Pita.

⁴¹Haḡe mwa habwe darihou tuana Saemon mwa bevea lalainia be, “Gan habwe Mesaea.” (Avoana geki binihiva be, “Kraes.”)

⁴²I kea mwa lai Saemon vai aben Jisas. Jisas mwa ḡarere mwa ḡitae i mwa bevea lalainia be, “Ihamwa Saemon nitun Jon, take vi uloinigo be Kivas.” (Geki kun iha n̄an be Pita binihiva be “Vatu.”)

⁴³Haḡe gubwen̄ dolua Jisas mwa binihia be vi vano vai Kalili. I kea mwa habwe Vilip mwa bevea lalainia be, “Mai ba huriau!”

⁴⁴(Vilip kea ata Betsaeda, bwatutun vanua be Andru mai Pita ramuru dogo aia.)

⁴⁵Vilip mwa habwe Nataniel mwa bevea lalainia be, “Gan habwe wani gabe Moses nu ravae huria lol bukan Silo i kera atatun vevsera mulei ran ravae huria. Kea haḡea Jisas nitun Josep ata Nasaret.”

⁴⁶Haḡe Nataniel mwa hudaligi mwa bevea be, “Matu ginau tavuha te dum abena be vi mwalue nin Nasaret?” Vilip mwa bwaliua be, “Mai ba gitae.”

⁴⁷Mahavana be Jisas mwa ḡita Nataniel be mwa mai huria, mwa bevea huri Nataniel mwa bevea be, “Geki haḡea mwasin ata Israel; kea atat mwasigi!”

⁴⁸Nataniel mwa hudalinia be, “Gom iloau kun hanigi?” Jisas mwa bwaliua be, “Nan gitago gon togo aten gai vik amua Vilip mwa siv uloinigo.”

⁴⁹Nataniel mwa bwaliua be, “Vagahi, giḡo haḡea Nitun God! Giḡo haḡea Ratahigi Lavoa ata Israel!”

⁵⁰Jisas mwa bevea be, “Matu gom binihimwasigi bwatuna n̄an be nam bevea lalainigo be nan gitago, gon togo aten gai vik? Gov gita ginau lalavoa ivusi ninia geki!”

⁵¹I kea mwa bevea lalainira be, “Nam bev mwasigi lalai kimiu be: giv gita mahao vi mahavan̄i i ira enjel non God rav hae i rav himai aluku, inau Nitun Atatu.”