Read Hano Jon 11 Bible Online

Jon 11 - Hano bible

Jon 11

¹Atatu ihana Lasarus, nu togo Betani, mwa haro. Betani bwatutun vanua gabe Mere mai tuana Mata ramuru dogo aia.

²(Mere haḡea geki gabe nu vurai hun wai sasasavi alun bwalagen Ratahigi i mwa man̄ira gin iluna; Mere geki haḡea be tuana Lasarus gabe mwa haro.)

³Haḡe ira hogosin Lasarus ramuru hora roroi lalai Jisas ramuru bevea be, “Ratahigi, mwasin nom buluana mwa haro.”

⁴Mahavana be Jisas mwa ron̄oe, mwa bevea be, “Lasarus mwa haro, take mwa hav vora te gin binihiva be vi mate; take huria be men seserai lua muramura non God. Harova geki, hala huri be God men lol roroai ihaku, inau nituna.”

⁵Jisas mwa dabe Mata mai tuana Mere i Lasarus.

⁶Take gaituvwa n̄an be kunia, batena be nu lai roroi be Lasarus mwa haro kea mwa dogo aia radu huri gubwen̄ gairua.

⁷Haḡe mwa bevea lalainira non roron̄tai be, “Tan tabagilu mulei vai Judia.”

⁸Haḡe non roron̄tai ram bwaliua ram bevea be, “Vagahi, mwa siv vora non̄oiha n̄an atatu ata aia ran vevea be ramen vohago; kadogaha gom lol taritari huri tabagiluana mulei vai aia?”

⁹Jisas mwa bevea be, “Mahavan alo han̄vul domwan gairua huri rani gaituvwa, kunia sa? Haḡe kunia ihei gabe mwa lago ute ran maita sihav taturai tehe, bwatuna mwa ḡita gigitan ureure.

¹⁰Take be si lago lol ute bon̄i kea vi taturai, bwatuna gigita sigai huria.”

¹¹Jisas mwa bev ginau geki vuvuri mwa avo rahurahu, mwa bevea be, “Nonda buluana Lasarus mwa maturu, take nai van ba bamatae nin maturuva.”

¹²Haḡe ira roron̄tai ram bwaliua ram bevea be, “Be kea mwa maturu, Ratahigi. Vi rahu magea.”

¹³Jisas mwa bevea gin binihiva be Lasarus nu mate, take kera ram binihia be mwa bevea huri maturuva vuroi n̄ano.

¹⁴Haḡe kunia Jisas mwa bev seserainia lalainira be, “Lasarus nu mate,

¹⁵take bwatuna kimiu nam samsamwara huri be nan hav togo te maia, huri be gimen binihimwasigi. Tan van abena.”

¹⁶Tomas (mwa uloinia be Malava) mwa bevea lalai ira roron̄tai rituai mwa bevea be, “Gida duluai tai vano mai Vagahi, huria be tai mate bul maia!”

¹⁷Mahavana be Jisas mwa botu, mwa habwea be ran Tavi Lasarus gubwen̄ gaivasi ḡoroe huba.

¹⁸Betani vai Jerusalem mahavana kun mael gaitolu n̄ano,

¹⁹i kera ivusi nin Judia ran mai be ramen gita Mata i Mere ba av durara huri mateanan hogosira.

²⁰Mahavana be Mata mwa ron̄oe be Jisas mwa mai, kea mwa bwihavare mwa ban ḡorogoro halainia, take Mere mwa dogo la imwa.

²¹Mata mwa bevea lalai Jisas be, “Ratahigi, be giḡo gos to teti hogosiku sihav mate tehe!

²²Take nam iloe be vaivotu kadogaha God vi lai te havanau lalainigo gabe gov hudalinia ginia.”

²³Jisas mwa bevea lalainia be, “Hogosimwa vi tomare vi rahu mulei nin mateana.”

²⁴Haḡe mwa bwaliu Jisas mwa bevea be, “Nam iloe be vi tomare vi rahu mulei nin mateana la nogonan gubwen̄i.”

²⁵Jisas mwa bevea lalainia be, “Inau tomarean mulei i rahuana. Ihei mwa binihimwasigiau vi rahu, gaituvwa n̄an be mwa mate;

²⁶i ihei gabe mwa rahu i mwa binihimwasigiau sihav mate tehe. Gom binihimwasigi noḡu avoana geki?”

²⁷Haḡe mwa bwaliu Jisas mwa bevea be, “Uwe, Ratahigi! Nam binihimwasigi be giḡo Kraes, Nitun God, gabe vi mai lol ureure.”

²⁸Ataguna be Mata mwa bev vuvuria kunia, mwa bano mulei mwa uloi tuana Mere ḡoḡonai, mwa bevea lalainia be, “Vagahi teti kadogaha, mwa doron be vi gitago.”

²⁹Mahavana be Mere mwa ron̄oe kungeki, mwa domare vilvilehi be men van ba ḡita Jisas.

³⁰(Jisas mwa hav votu te radu anvanua, take kea radu lol ute gabe Mata nu habwea aia.)

³¹Haḡe sinombu gabe ram do la imwa bul mai Mere, ram av durae, kera mulei ram huria mahavana be ram ḡitae be mwa domare bilvilehi mwa bwihavare. Ram binihia be kea men van lol aran mate ba dei aia.

³²Mere mwa botu aben Jisas, i mahavana be mwa ḡita dum Jisas, mwa hovi lol bwalagena, mwa bevea be, “Ratahigi, be giḡo gos togo teti, hogosiku sihav mate tehe!”

³³Jisas mwa ḡitae be mwa dei maragai, i mwa ḡitae mulei kunhanigi sinombu gabe ram dogo bul mai ira tarua uhu ram dei maragai; kunia mwa hagavira, i mwa binbinihi.

³⁴Jisas mwa hudalinira mwa bevea be, “Gin tavinia halabehe?” I kera ram bwaliua be, “Mai ba ḡitae, Ratahigi.”

³⁵Jisas mwa dei.

³⁶Haḡe sinombu ram bevea be, “Ia, gin gitae kunhanigi mwa dabea!”

³⁷Take kera rituai ram bevea be, “Matu kun be nu lol matagara ram ḡita mulei ute, huri hano mwa hav tuḡoro te Lasarus nin mateana?”

³⁸Haḡe Jisas mwa ron̄ mwahantai maragai, mwa bano vai la bwaru malan̄a gabe ran tau rebehin Lasarus alolona i ran tau ḡoro bwan̄on malan̄a gea mai vatu.

³⁹Jisas mwa bevea lalainira be, “Gin lai dagai vatu.” Mata hogosin Lasarus gabe nu mate, mwa bwaliu Jisas mwa bevea be, “Vi bon hantai maragai, Ratahigi. Gubwen̄ gaivasi huba atagun tavtavigi!”

⁴⁰Jisas mwa bevea lalainia be, “Matuke nan hav vevea te lalainigo be gov gita muramura non God, be gov binihimwasigi?”

⁴¹Haḡe ram lai dagai vatu. I Jisas mwa dada vai amare mwa bevea be, “Nam avkarigo Tata, huri be gom roron̄taiau.

⁴²Nam iloe be giḡo vataha mahavana gom roron̄taiau, take nam bevea kungeki bwatuna sinombu kerageki, huribe rav binihimwasigi be giḡo gon horau.”

⁴³Ataguna be mwa avo vuvuri kun geki, mwa ulo gin silo gaivua mwa bevea be, “Lasarus, mwalue!”

⁴⁴Haḡe kea mwa mwalue, limana i bwalagena lol gavun mateana radu, i gavuna dalis ḡoro lolmatana mwa dogo radu. Jisas mwa bevea lalainira be, “Gin tugu dagai gavu ninia, ba lin̄ia na lago.”

⁴⁵Sinombu ivusi gabe ran mai be ramen varahi ron̄ Mere ram ḡita ginau be Jisas nu lolia, i ram binihimwasiginia.

⁴⁶Take kera rituai ram dabagilu huri ira Varise i ram bev ginau gabe Jisas nu lolia.

⁴⁷Haḡe ira Varise rituai maira muai tataroi ram ḡoḡo maira Kansel ram bevea be, “Tav lol hano? Kimiu gin gita ginau dan̄an̄a gabe wani geki mwa lolira!

⁴⁸Be tav lin̄ia vi van rahurahu la hala geki, atatu duluai rav binihimwasiginia, i ira lavoa ata Rom rav lol silo be nonda Imwa Sabuga vi salan̄aian kaburai mai vanuanda!”

⁴⁹Atatu vwate alolora, ihana Kaiavas, kea haḡea Muai Tataroi lol taulu gea, mwa bevea be, “Kimiu ira taltaleana.

⁵⁰Matuke gim hav vinihi te dumwia, be nu tavuha lalai kimiu be giv lin̄ atatu vwate vi mate huri sinombu, ninia be vataha vara lol ute duluai men nogonogo?”

⁵¹Mwasigi be, mwa hav vev te ginau geki gin mwasin non avoana sibona; take huria be kea Muai Tataroi lol taulu gea, kea mwa bev serae be mwa du be Jisas vi mate huri sinombu ata Jius duluai,

⁵²i mwa hav vora te hurira n̄an, take be men haḡo bul mulei sinombu non God gabe ran visalsala gi rebehi gaituvwa.

⁵³Mwa dau bwatuna baten gea ira lavoa non ira Jius ram lol taritari be rav wehi hani Jisas.

⁵⁴Jisas mwa hav lago te lol ute gitagita lol vanua Judia, take mwa mwalue mwa bano lol ute abena gin vanua vuroi, lol bwatutun vanua vwate mwa huia gi Evrem, i aia kea mwa dogo maira non roron̄tai.

⁵⁵Haḡe taron Samsamwaran Halbisḡalau mwa sosori, haḡe sinombu ivusi ram hae nin bwatutun vanua duluai vai Jerusalem huri lol melmeloi hurin alen̄ara, be rav melmelo lolmatan God vuvuri ram siv togo huri samsamwara.

⁵⁶Haḡe kera ram hiḡe Jisas, i batena be ram ḡoḡo ute gaituvwa lol Imwa Tataro, ram hudaltali mulmuleinira ram bevea be, “Gim binihi haninia? Daga kea sihav mai te lol samsamwara?”

⁵⁷Ira muai tataroi maira Varise ran vev daua, be atatu vwate vi iloe be Jisas mwa dogo behe, take vi seseraiana lalainira, huria be rav haḡo batugehia.