Read Hano Jon 12 Bible Online

Jon 12 - Hano bible

Jon 12

¹Gubwen̄ gaiono radu huri Halbisḡalau, Jisas mwa bano vai Betani, vanuan Lasarus atatu gabe Jisas nu lol domareinia nin mateana.

²Haḡe ram lol vatuvwai ginaganiana huria aia, Mata mulei mwa bului huri rovoga; i Lasarus mulei vwate ninira gabe ram dogo la tebol mai Jisas.

³Haḡe Mere mwa lai udun bwelehun wai sasavi gabe volina nu marahi maragai, nu lol roiroiana mai hun gai bonboni, i mwa salilia la bwalagen Jisas, i mwa man̄ia gin iluna. Haḡe bonin hun wai sasasavi bonboni mwa masiri alolon imwa.

⁴Haḡe roron̄tai non Jisas vwate, Judas Iskariot, kea gabe vi sine Jisas mwa bevea be,

⁵“Matuke huri hano be wain sasasavi geki sihav saleiana tehe huri vatlegiga vasan̄vul vavudolua domwana vudoluvalima, i homu vi laiana lalai ira hiru?”

⁶Judas mwa hav avo te kungeki bwatuna be mwa binihia huri ira hiru, take bwatuna be kea susurana. Mwa haḡo tan̄an homu i vi sura dum ninia.

⁷Take Jisas mwa bevea be, “Lin̄ia na lolia! Kea vi lol havanau gabe mwa lolia huri gubwen̄i be vi taviau alolona.

⁸Ira hiru rav togo mai kimiu vataha mahavana, take inau nasav togo te mai kimiu vataha mahavana.”

⁹Haḡe sinombu gaivua ram ron̄oe be Jisas mwa dogo Betani, i ram bano aia, take ram hav van te aia bwatuna be Jisas, take be ramen gita Lasarus, gabe Jisas nu lol domareinia nin mateana.

¹⁰Haḡe kunia ira muai tataroi ram lol taritari be rav wehi Lasarus mulei,

¹¹bwatuna be alun Lasarus haḡea ira Jius ivusi ram barihainira i ram binihimwasigi Jisas.

¹²Haḡe gubwen̄ dolua sinombu gaivua gabe ran mai huri Samsamwaran Halbisḡalau, ram ron̄oe be Jisas mwa mai vai Jerusalem.

¹³Haḡe ram lai bagan rauniuniu i ram mwalue ram bano be rav visogari maia ram haharigi ram bevea be, “Uloi roron God! God vatavuhainia mwa mai la ihan Ratahigi! God vatavuhai Ratahigi Lavoa ata Israel!”

¹⁴Jisas mwa habwe don̄ki i mwa lago aluna, kun gabe ravrava Sabuga nu vevea be:

¹⁵“Gisav matagu tehe, kimiu ata Saion! Nomiu Ratahigi Lavoa geki mwa mai, mwa lago alun bwaloi don̄ki.”

¹⁶Non roron̄tai ram hav lai te batoi binihiva ata lol hano be mwa loli; take batena be Jisas nu hae mulei huri non tanon ratahigi, ram siv vinihi dumwia be ravrava Sabuga nu vev ginau geki huria i mulei be atatu ran lol ginau geki lalainia.

¹⁷Kera gabe ran tu mai Jisas mahavana be nu lol domarei Lasarus nin mateana i mwa uloi luae nin malan̄a i ram bevuri huri ginau gabe nu loli.

¹⁸Haḡe bwatuna haḡea sinombu ivusi ran mai be rav gita Jisas, bwatuna be ran ron̄oe be nu lol ginau dan̄an̄a geki.

¹⁹Haḡe ira Varise ram bevea ginginira be, “Gin gitae, tasav mom lol te dum ginau gaituvwa! Kimiu gin gitae ureure duluai mwa huria!”

²⁰Ata Krik rituai ran vano maira gabe ran vano vai Jerusalem huri tataro lol taron samsamwara.

²¹Haḡe ram bano aben Vilip (kea ata Betsaeda nin vanua Kalili) ram bevea be, “Ratahigi, gam doron be gav gita Jisas.”

²²Vilip mwa bano mwa bevea lalai Andru, i kera saraḡo ramuru ban ramuru bevea lalai Jisas.

²³Haḡe Jisas mwa bwaliura mwa bevea be, “Tarona mwa mai kadogaha huriau Nitun Atatu be God vi lol roroai ihaku.

²⁴Nam bev mwasigi lalai kimiu be: birin koni, mwa du be vi hovi lol tano ba mate, bisata vi togo gahena, ta be vi mate vwaina vivora ivusi.

²⁵Ihei tehe mwa dabe maragai rahura sibona vi rauhagainia; i ihei gabe mwa hav tabe te maragai rahuna sibona lol ureure geki, vi haḡo rahuana vai tuai.

²⁶Ihei tehe mwa doron be vi lalaḡo lalaiau vi huriau, huribe noḡu atatun rovoga rav huriau halabehe tehe nai van. I tamaḡu vi vinihi marahi ihei tehe be vi lalaḡo lalaiau.”

²⁷“Kadogaha nam n̄ala lol binihiḡu i nai vev hano? Matu namen vevea be, ‘Tata, lai dagai mahavan taro ririhai uhu mwa dumwiau’? Take bwatuna higea nan mai huria be nai vano dum lol mahavan taron ron̄ ḡagarasi geki.

²⁸Tata lol ihamwa na sarisari!” Haḡe silo mwa avo nin lol ute atamare mwa bevea be, “Nan lai tanon Ratahigi huba vai aluna, i nav lol dum muleinia.”

²⁹Sinombu gabe ram du aia ram ron̄ silo, i rituai ram bevea be bwahilo, rituai be, “Enjel vwate mwa avo lalainia!”

³⁰Take Jisas mwa bevea lalainira be, “Silo geki be mwa avo mwa hav vora te huriau, take huri kimiu.

³¹Kadogaha tarona huri ureure geki be men vevegia; i tomuai ata lol ureure geki vi vohaian kaburai.

³²Batena be vi lol domareiau nin ureure geki, nav haraḡoḡo atatu duluai huriau.”

³³(Lol mahavan avoana geki Jisas mwa bev lua halan mateana gabe kea vi ron̄ ḡagarasi alolona.)

³⁴Haḡe sinombu ram bwaliua be, “Nonda Silo mwa bevea lalai gida be Kraes vi togo vai tuai. Kunhanigi be gim bevea be vi lol domarei Nitun Atatu? Ihei geki be Nitun Atatu?”

³⁵Jisas mwa bwaliura be, “Gigita vi togo mai kimiu huri mahavana vwelvwele. Giv van rahurahu la halamiu mahavana be gigita mai kimiu, huri be ute meto sihav mai te ḡoro kimiu; bwatuna be atatu gabe mwa lago lol ute meto mwa hav iloe tehe be mwa bano vai behe.

³⁶Giv vinihi mwasigi lol gigita kunia, bwatuna gin laia, huria be giv vora atatu ata lol gigita.” Ataguna be Jisas nu vev ginau geki, mwa bwihi avare ḡoḡonai mwa hilinira.

³⁷Gaituvwa n̄an be nu lol ginau dan̄an̄a kerageki abera, ran hav vinihi te mwasiginia,

³⁸huria be havanau gabe atatun vevsera Aesaia nu vevea vi visirai, nu vevea be: “Ratahigi, ihei nu vinihi mwasigi alun roroi gan vevea? Lalai hei gabe Ratahigi mwa lol bisirai non muramura?”

³⁹Haḡe ram hav mom binihi te mwasigi, bwatuna Aesaia mulei nu vevea be,

⁴⁰“God nu lol matara ram matagaraga i nu lol binihira mwa bono, huribe matara sihav gita te ute, i binihira sihav ilo te havanau, God nu vevea be, rasav tabagilu te mulei huriau, be nav varahu muleinira.”

⁴¹Aesaia nu vev ginau geki bwatuna nu gita sarisarin Jisas i nu avo huria.

⁴²I mwasigi be, ira tomuai non ira Jius ram binihimwasigi alun Jisas, take bwatuna gabe ram matagui ira Varise, i kunia ram hav avoinia tehe be men maserasera, huribe bereva ram dau dagainira nin imwa tataro.

⁴³Kera geki ram doron maragai be atatu rav tabera lol doroniva, ninia be God si tabera.

⁴⁴Jisas mwa bevea gin silo gaivua be, “Ihei tehe mwa binihimwasigiau mwa hav vinihi te mwasigiau n̄an, take mulei alun wani gabe nu horau.

⁴⁵Ihei tehe mwa ḡitau mwa ḡita wani mulei gabe nu horau.

⁴⁶Nam mai lol ureure kun gabe gigita, huribe atatu duluai gabe ram binihimwasigiau rasav togo tehe lol ute meto.

⁴⁷I ihei tehe gabe mwa ron̄ noḡu avoana i mwa hav lol te hurinia, nasav vevegia tehe. Nan hav mai tehe, be namen vevegi ureure, take be nai varahua.

⁴⁸Ihei tehe mwa bev dagarau, i mwa hav lai te ḡoḡo noḡu avoana, atatu vwate abena gabe vi vevegia. Avoana duluai gabe nan vevera rai vevegia lol nogonan gubwen̄!

⁴⁹Nam bev mwasigi, bwatuna be nam hav avo tehe alun noḡu roron̄o siboku, take Tata gabe nu horau kea nu vev hano lalaiau be nai vevea i nav avo aluna.

⁵⁰I nam iloe be non avoana mwa lai rahuana vai tuai. Ginau gabe nam bevea, kea haḡea ginau gabe Tata nu vevea lalaiau be nai vevea.”