Read Hano Jon 14 Bible Online

Jon 14 - Hano bible

Jon 14

¹Jisas mwa bevea lalainira be, “Gisav binbinihi te lavoai. Giv binihimwasigi alun God i giv binihimwasigi mulei aluku.

²Vwavwan imwa ivusi aia lol imwan Tamaḡu, i nav vano ba lol vatuvwai ute huri kimiu. Be avoana geki sihav vora te mwasigi nasav vev te bonogainia lalai kimiu.

³Ataguna be nai vano ba lol vatuvwai ute huri kimiu. Nai mai mulei ba lai kimiu huriau siboku, huri be giv togo mulei aia be inau nam dogo.

⁴Gim ilo hala gabe mwa ban vai lol ute gabe inau nam ban aia.”

⁵Tomas mwa bevea be, “Ratahigi, gam hav ilo te ute be goi van aia. Haḡe kunhanigi be gav ilo hala be gai vot aia?”

⁶Jisas mwa bwaliua be, “Inau matanhala, mwasigi, i rahuana; atatu vwate sihav van te dum aben Tata dagai niniau.”

⁷Haḡe mwa bevea lalainira be, “Kadogaha be gim iloau, giv ilo Tamaḡu mulei, i mwa dau bwatuna haḡea kadogaha be gim iloe i gim ḡitae.”

⁸Vilip mwa bevea lalainia be, “Ratahigi, vagahi kamai gin Tata; kea n̄an gam doronia.”

⁹Jisas mwa bwaliua be, “Nam dogo mai kimiu duluai huri mahavana n̄ava huba; take gom hav iloau te radu, Vilip? Ihei tehe be nu gitau nu gita Tata. Hurihano gom bevea be, ‘Vagahi kamai gin Tata’?

¹⁰Matu gom hav vinihi te mwasigi, Vilip, be inau alolon Tata i Tata aloloku?” Jisas mwa bevea lalainira non roron̄tai be, “Avoana be nan vevera lalai kimiu, mwa hav mai te niniau, Tata, gabe mwa dogo maiau, mwa lol non rovoga sibona.

¹¹Giv vinihi mwasigiau mahavana be nam bevea be inau nam dogo lol Tata i Tata mwa dogo aloloku. Be sigai, gin vinihi mwasigi huri ginau gabe nan lolira.

¹²Nam bev mwasigi lalai kimiu be: ihei tehe mwa binihimwasigiau vi lol dum havanau gabe nam lolia, mwasigi vi lol dum ginau lalavoa ivusi liu, bwatuna gabe nam bano aben Tata.

¹³I nav lol havanau tehe gabe gim hudaligi huria lol ihaku, huribe vi lol bisirai sarisarin Tata siviau Nituna.

¹⁴Be giv hudaliau huri havanau tehe lol ihaku, nav lolia.”

¹⁵“Be gim dabeau giv ḡoḡoi noḡu leohorai.

¹⁶Nav hudali Tata, i kea vi lai Turai dolua lalai kimiu, gabe kea vi togo mai kimiu vai tuai.

¹⁷Kea haḡea vui gabe vi seserai mwasigi huri God. Ureure sihav lai te ḡoḡo dumwia, bwatuna gabe mwa hav gitae tehe, sage mwa hav iloe tehe. Take kimiu gim iloe, bwatuna be mwa dogo mai kimiu i kea alolomiu.”

¹⁸“Mahavana be nai vano, gisav togo te n̄an kunia gahemiu; nav mai mulei huri kimiu.

¹⁹Tiri ḡalia n̄an ureure sihav mom ḡitau tehe, take kimiu giv gitau; i bwatuna be nam rahu kimiu mulei giv rahu.

²⁰Mahavana be gubwen̄i gea vi mai, giv iloe be inau lol Tamaḡu i kimiu aloloku, kunia n̄an gabe inau alolomiu.”

²¹“Ihei tehe mwa ḡoḡoi noḡu leohorai i mwa dabera kea haḡea atatu gabe mwa dabeau. Tamaḡu vi tabe ihei tehe gabe mwa dabeau; i inau mulei nav tabea i nav lol bisiraiau siboku lalainia.”

²²Judas (mwa hav vora te Judas Iskariot) mwa bevea lalainia be, “Ratahigi, kunhanigi be gov lol bisirainigo sibomwa n̄an lalai kamai take sihav vora te lalai ureure?”

²³Jisas mwa bwaliua be, “Ihei tehe mwa dabeau vi ḡoḡoi noḡu silo vagahi. Tamaḡu vi tabea, i kamaru mai Tamaḡu garu vi mai huria ba dogo maia.

²⁴Ihei tehe gabe mwa hav tabeau tehe mwa hav ḡoḡoi te noḡu silo vagahi. I silo vagahi gabe gin ron̄oe mwa hav vora te noḡu, take mwa mai nin Tata, gabe nu horau.”

²⁵“Nam bev ginau geki lalai kimiu mahavana be nam dogo radu mai kimiu.

²⁶Gaituramiu gabe Vui Sabuga, kea gabe Tata vi horae lol ihaku, vi vagahi kimiu alun ginau duluai i vi lol kimiu giv vinihi dum ginau duluai gabe nan vevea lalai kimiu.”

²⁷“Tamwata haḡea ginau gabe nam derainia mai kimiu; noḡu tamwata siboku gabe nam laia lalai kimiu. Nam hav laia tehe kun gabe ureure mwa laia. Gisav binbinihi te lavoai; i gisav matagu tehe.

²⁸Gin ron̄oau nan vevea lalai kimiu be, ‘Nai vano take nai mai mulei huri kimiu.’ Be gim dabeau, gis samsamwara be nai vano huri Tata; bwatuna be kea liu niniau.

²⁹Nam dohi bev ginau geki amua vuvuri gim siv loli, huribe mahavana be vi loli ta giv binihimwasigi.

³⁰Nasav mom avo te vain̄ava mulei mai kimiu bwatuna be tomuai ata lol ureure geki mwa mai kadogaha. Kea mwa hav muramura tehe ḡoroau,

³¹take mwa du be ureure vi iloe be nam dabe Tata; bwatuna higea nam lol ginau duluai kun gabe nu vevea lalaiau.” “Gin mai, tan van nin ute geki.”