Read Hano Jon 17 Bible Online

Jon 17 - Hano bible

Jon 17

¹Mahavana be Jisas mwa bev vuvuri ginau geki, mwa ḡarere vai amare mwa bevea be, “Tata, tarona mwa mai. Gov lol roroaiau inau Nitumwa, huribe inau Nitumwa nav lol roroainigo.

²Bwatuna be gon lai muramura lalaiau huba ḡoro atatu duluai, huribe nav lai dum rahuana vai tuai lalainira gabe gon laira lalaiau.

³Rahuana vai tuai gin binihiva be atatu vi ilogo, be giḡo n̄ano God mwasigi, i be atatu ramen ilo Jisas Kraes gabe gon horae.

⁴Nan lol bisirai sarisarimwa lol ureure; i nan lol haraharai rovoga gabe gon laia lalaiau be nav lolia.

⁵Tata! Gov lol roroaiau kadogaha la lol matamwa, huri be nav roroa, nav roroa kun gabe nan togo maigo la bwativuna.”

⁶“Nam bev seserainigo lalai kera gabe gom lai luara lalaiau nin ureure. Kera bilamwa i gom laira lalaiau, i ram dabe nom avoana,

⁷i kadogaha ram iloe be ginau duluai gabe gom laira lalaiau ram mai ninigo.

⁸Nan lai roroi lalainira gabe gon laia lalaiau, i ran lai ḡoḡoe; kera ram iloe be mwasigi gon horau.”

⁹“Nam dataro hurira. Nam hav tataro te huri ureure take hurira gabe gon laira lalaiau, huri be kera bilamwa.

¹⁰Ginau duluai be noḡu kea nomwa, i ginau duluai be nomwa kea noḡu; i mwa lol bisirai sarisariku ginira.

¹¹I kadogaha nam mai hurigo; nasav mom dogo te mulei lol ureure, take kera ram dogo lol ureure. Tata Sabuga! Gov gitae be rav rahu bwatuna ihamwa nu muramura, iha gabe gon laia lalaiau, huri be rai vora gaituvwa kun gabe gidaru gaituvwa.

¹²Mahavana be nan togo maira, nan gitaḡorora be rav rahu gin ihamwa be nu muramura, iha gabe gom laia lalaiau. Nan gitaḡorora, i vwate ninira nuhav sala tehe, take atatu n̄an gaituvwa gabe nu taua be vi sala huribe ravrava Sabuga vi visirae.

¹³Haḡe kadogaha nam mai hurigo, ta nam bev ginau kera geki bwatuna nam dogo lol ureure, huribe rav lai noḡu samwarana alolora duluai i vi masiri latlate.

¹⁴Nan lai nom roroi lalainira, take ureure mwa barihainira, bwatuna be ram hav vora te bilan ureure, kunia n̄an mulei be inau nam hav vora te bilan ureure.

¹⁵Nam hav hudalinigo tehe be gov lai luara nin ureure, take nam hudalinigo higea be gov lai luara nin liman Setan.

¹⁶Kunia n̄an mulei be inau nam hav vora te bilan ureure, kera mulei ram hav vora te bilan ureure.

¹⁷Gov lolira be rav vora nomwa, be rav tu huri mwasigi; nom avoana haḡea mwasigi.

¹⁸Nan horara vai lol ureure, kunia gabe gon horau vai lol ureure.

¹⁹Nam lin̄iau siboku lalainigo bwatuna kera, huribe kera mulei, mwa du be rav lin̄ira sibora lalainigo.”

²⁰“Nam hav tataro te hurira n̄an, take mulei hurira gabe ram binihimwasigi aluku huri nora avoana.

²¹Nam dataro be kera duluai rai bul gaituvwa. Tata! Nam dataro be kera rav bulu alolodaru, kunia n̄an gabe giḡo aloloku i inau alolomwa. Nam dataro be rav bul gaituvwa, huribe ureure vi binihimwasigi be gon horau.

²²Nan lol roroainira kunia gabe gon lol roroaiau, huri be rai vora gaituvwa, kunia be giḡo i inau gaituvwa:

²³Inau alolora i giḡo aloloku, huribe rai vora gaituvwa mwasigi, be ureure men iloe be gon horau i be gom dabera kun gabe gom dabeau.”

²⁴“Tata! Gon laira lalaiau, i nam doron be rav togo maiau lol ute be nav to aia, huribe rav gita sarisariku, sarisari gabe gon laia lalaiau; huribe gon tabeau la bwativuna vuvuri mwa siv tau ureure.

²⁵Tata mwasin vavtutu! Ureure mwa hav ilogo tehe, take nam ilogo, i kera geki noḡu atatu ram iloe be gon horau.

²⁶Nan seserainigo lalainira, i nav lol rahurahuinia kunia lalainira, huria be nom lolotabetabe huriau vi togo alolora mulei, i inau mulei nav togo alolora.”