Read Hano Jon 19 Bible Online

Jon 19 - Hano bible

Jon 19

¹Haḡe Paelat mwa lin̄ Jisas lalai ira atatun bwaloana i ram bivilisia.

²Ira atatun bwaloana ram lol gaisosorin bwatuna gin ḡauli i ram daua la bwatuna; ram dau koti memea raraniga aluna,

³ram mai abena ram bevea be, “Rahuan n̄ava Ratahigi Lavoa nora Jius!” Haḡe ram daubwatuna ram rabasia.

⁴Paelat mwa bwihavare mulei mwa bevea lalai sinombu be, “Gin gitae, nav lai bwihavareinia teti lalai kimiu ba giv gitae be nam hav habwe te bwatuna be namen vevegia.”

⁵Haḡe Jisas mwa bwihavare, mai gaisosorin bwatuna i koti memea raraniga aluna. Paelat mwa bevea lalainira be, “Gin gitae! Atatu haḡea geki!”

⁶Mahavana be ira muai tataroi maira gitaḡoro huri Imwa Tataro ram ḡitae, ram haharigi ram bevea be, “Vohae vai alun volovolo! Vohae vai alun volovolo!” Paelat mwa bevea lalainira be, “Gin laia mahaḡea, ba bohae vai alun volovolo. Nam hav habwe te ginau hantai be nav vevegia huria.”

⁷Haḡe sinombu ram bwaliu muleinia ram bevea be, “Nomai silo abena be mwa bevea be kea vi mate, bwatuna be mwa bevea be kea Nitun God.”

⁸Mahavana Paelat mwa ron̄ avoana geki, mwa matagu maragai.

⁹I kea mwa haroro mulei la imwana mwa hudali Jisas mwa bevea be, “Gom mai nin behe?” Take Jisas mwa hav vwaliua tehe.

¹⁰Paelat mwa bevea lalainia be, “Matu gosav avo te maiau? Gov iloe be, Noḡu roron̄o abena be nav lin̄ derainigo i nai vohago vai alun volovolo.”

¹¹Jisas mwa bwaliua be, “Gom haḡo roron̄o ḡoroau n̄ano bwatuna be God nu laia lalainigo. I wani gabe nu lin̄iau lalainigo mwa bahala gin vuro hantai maragai.”

¹²Mahavana be Paelat mwa ron̄ avoana geki. Mwa hiḡe ron̄ hala be vi derai Jisas. Take sinombu ram haharigi mulei ram bevea be, “Be gov derainia, kea binihiva be giḡo gom hav vora te buluana non Ratahigi lavoa ata Rom! Ihei tehe gabe mwa bevea be kea ratahigi lavoa kea mwa ivwalui Ratahigi ata Rom!”

¹³Mahavana Paelat mwa ron̄ avoana kerageki, mwa lai Jisas vai avare i kea mwa domahuri la tanon vevev lol ute gabe mwa huia “Gi togotogo Vatu.” (La avoana non ira Hibru be “Kabata.”)

¹⁴Haḡe mwa abena gin abobon alo lol gubwen̄i amua Halbisḡalau. Paelat mwa bevea lalai sinombu be, “Geki nomiu Ratahigi lavoa!”

¹⁵Ram haharigi mulei vai aluna ram bevea be, “Wehia! Wehia! Vohae vai alun volovolo!” Paelat mwa hudalinira mwa bevea be, “Matu gim doron be nai voha nomiu Ratahigi lavoa vai alun volovolo?” Haḡe ira muai tataroi ram bwaliua be, “Nomai Ratahigi lavoa n̄ano Ratahigi ata Rom!”

¹⁶Haḡe Paelat mwa lin̄ Jisas lalainira be rai vohae vai alun volovolo. Haḡe kera ram lai lua Jisas.

¹⁷Kea mwa bwihavare, mwa datal non volovolo, mwa bano lol ute mwa uloinia be, “Tanon bwalan Bwatun Atatmate,” i mwa uloinia. (La avoana non ira Hibru be “Kolkota.”)

¹⁸I ram bohae vai alun volovolo aia; i ram boha atatu gairua mulei vai alun volovolo. Jisas mwa du bora lolona.

¹⁹Paelat nu rav ravrava seserai i mwa daua la volovolo, mwa bevea be, “Jisas ata Nasaret, Ratahigi Lavoa nora Jius.”

²⁰Sinombu ram basogoe, bwatuna be ute be ram bohae aia mwa hav vora te hautu nin bwatutun vanua. Ravrav seserai uhu nu ravana la avoan non ira Hibru, Rom i Krik.

²¹Haḡe ira muai Tataroi ram bevea lalai Paelat be, “Gosav ravae tehe be ‘Nora Ratahigi Lavoa nora Jius,’ take gov ravae be, ‘Wani geki mwa bevea be, Inau Ratahigi Lavoa nora Jius.’ ”

²²Paelat mwa bwaliura mwa bevea be, “Havanau be nan ravae vi tu kunia be nan ravae.”

²³Ataguna be atatun bwaloana ram boha Jisas vai alun volovolo, ram lai gaisagana ram harae la tatan̄ana gaivasi, tavihen gaitutuvwai vataha atatun bwaloana. Haḡe kera ram lai non koti mulei, gabe ran ligoe gin tavihen gavu gaituvwa ute bulbuluna sigai.

²⁴Haḡe atatun bwaloana ram bevea ginginira be, “Tasav herae tehe; take tai vohai dais i vi seserainia be ihei vi laia.” Ginau geki mwa loli be men lol ravrava Sabuga gim mwasigi: gabe mwa bevea be, “Ram hara gaisagaku vatvatahara i ram bohai dais huri noḡu koti.” I geki haḡea havanau gabe ira atatun bwaloana ram lolia.

²⁵Kera gabe ran tu sosori volovolo non Jisas ratahina, tuan ratahina, Mere tasalan Klopas i Mere Makdalen.

²⁶Jisas mwa ḡita ratahina mai roron̄tai gabe mwa dabea ram du aia; i kea mwa bevea lalai ratahina be, “Geki nitumwa.”

²⁷Haḡe mwa bevea lalai roron̄tai be, “Kea ratahimwa.” Mwa dau bwatuna lol mahavana gea roron̄tai gea mwa laia vai la imwana.

²⁸Jisas mwa iloe be kadogaha ginau duluai nu haraharai; huria be men lol bisirai ravrava Sabuga, mwa bevea be, “Nam mandou.”

²⁹Haḡe bwelehu vwate aia, nu masiri gin waen garagara; i ram ruhu bwatlumute lol waen gea, ram daua la matavwen gai, i ram hagainia vai la bwan̄ona.

³⁰Jisas mwa damuhi waen mwa bevea be, “Nu nogo!” Haḡe mwa dai bwatuna i mwa mate.

³¹Haḡe ira tomuai nora Jius ram hudali Paelat be men mahin̄ainira ba ram wehi roto bwalagera be ram dule la volovolo, i be ramen lai huri rebehira nin volovolo. Ram hudaligi huria bwatuna be geki gubwen̄i amua halbisḡalau, i ram hav doron tehe be rebehira rav tu la volovolo la gubwen̄ mambuharai, huribe gubwen̄ mambuharai gea ta gubwen̄ Sabuga.

³²Haḡe ira atatun bwaloana ram bano ram wehi roto bwalagen ira tarua gabe raru dule la volovolo mai Jisas.

³³Take mahavana be ram mai aben Jisas, ram ḡitae be kea nu mate huba, i kera ram hav wehi te roto bwalagena.

³⁴Haḡe atatun bwaloana vwate mwa derai non sari lol ḡaḡaun Jisas, i daga mai wai ram rovo ninia.

³⁵(Wani be nu gita ginau geki be nu loli mwa bevuri huria huribe kimiu mulei giv vinihi mwasigi.)

³⁶Ginau geki nu loli be ravrava Sabuga men mai gi mwasigi be, nu vevea be, “Huina vwate sihav mosi tehe.”

³⁷I ravrava Sabuga mulei vwate gabe mwa bevea be, “Sinombu rav gitae be ram saria.”

³⁸Ataguna geki, Josep gabe ata lol bwatutun vanua Arimatia, mwa hudali Paelat be si lai dum rebehin Jisas. (Josep kea roron̄tai non Jisas vwate take nu hav maserasera tehe, bwatuna be mwa matagun ira tomuai nora Jius.) Paelat mwa bevea lalainia be vi lai dum dagai rebehina, i kunia Josep mwa bano mwa lai dagainia.

³⁹Nikodimas gabe muana nu vano bon̄i be men gita Jisas, kea mulei ramuru bano mai Josep, i mwa haḡo baki vwate gabe nu masiri gin mee mai alos. Marahin baki gea kun kilo n̄avul gaitolu.

⁴⁰Haḡe ira tarua ramuru lai rebehin Jisas ramuru nubwae lol gav malumlumu mai wai sasasavi bonboni hurin alen̄ara ira Jius be ram lol vatuvwai rebehi huri tavtavigi.

⁴¹Talun gai oliv lol ute gabe ran wehi Jisas aia, i aia mulei malan̄ gara vwate gabe atatu vwate mwa hav taviana te radu alolona.

⁴²Huri be vi rani gubwen̄ mambuharai i bwatuna be bwaru malan̄a sosoria n̄an, ram dau rebehin Jisas aia.