Read Hano Jon 2 Bible Online

Jon 2 - Hano bible

Jon 2

¹Atagun gubwen̄ gairua lagiana vwate lol bwatutun vanua Kena lol vanua Kalili. I ratahin Jisas mulei aia,

²i Jisas maira non roron̄tai mulei ran warera huri lagiana.

³Batena waen mwa nogo ratahin Jisas mwa mai mwa bevea lalainia be, “Mara waen nu nogo, i waen mulei sigai.”

⁴Take Jisas mwa bwaliua be, “Gosav vev te ginau lalaiau be namen lolia. Taron noḡu lalaḡova mwa hav mai te radu.”

⁵Haḡe ratahin Jisas mwa bevea lalai ira atatun rovoga be, “Havanau be vi vevea lalai kimiu giv lolia.”

⁶Ira Jius nora silo abena huri bwaga melmeloi, bwatuna gea bwelehun wai gaiono ran tu aia, gaituvwa nu dadariha huri tovtovon wai kun lita vudolua.

⁷Jisas mwa bevea lalai ira atatun rovoga be, “Gin hogon bwelehu kera gea gin wai.” Haḡe ram hogon bamasirinira,

⁸i mwa bevea lalainira be, “Gin utu dagai wai rituai ba laia lalai wani be lavoa huri ginaganiana.” Haḡe ram lai wai lalainia,

⁹gabe nu vogi huba mwa mai gi waen, i kea mwa damuhi ron̄oe. Kea mwa hav iloe tehe be waen uhu nu mai nin halabehe (take, ira atatun rovoga gabe ran utu wai ram iloe); i mwa uloi wani gabe mwa lagi,

¹⁰mwa bevea lalainia be, “Atatu dodolua ram lai waen tavuha lalai ira tausala la bwativuna, i ataguna be ram mwin waen gaivua huba, kea mwa siv lai waen gabe nu hav tavuha tehe. Take giḡo gom dau waen tavuha vaivotu kadogaha!”

¹¹Jisas nu lol muan ginau dan̄an̄a geki Kena lol vanua Kalili; aia kea nu lol bisirai sarisarina, i non roron̄tai ram binihimwasiginia.

¹²Atagun ginau geki, Jisas mai ratahina, ira tuana maira roron̄tai ram bano vai Kapanium i ram dogo aia huri gubwen̄i rituai.

¹³Mwa sosori huba gin gubwen̄i huri Samsamwaran Halbisḡalau, Jisas mwa bano vai Jerusalem.

¹⁴Aia lol Imwa Tataro, kea mwa ḡita atatu be ram salei bilara buluki, sipsip, manu i atatu mulei gabe ram leahi homu, ram dogo la nora tebol.

¹⁵Haḡe mwa lol gao ririgi huri gai vivilisi i mwa ḡoro lua nani mai buluki mai sipsip nin Imwa Tataro, i mwa dabe burigai nora tebol be ram leahi homu i mwa ḡaburai kaburai nora homu;

¹⁶haḡe mwa bevea lalainira gabe ram salei manu be, “Gin lai dagainira nin ute geki! Gisav lol te imwan Tamaḡu gi tanon volvoligi!”

¹⁷Haḡe non roron̄tai ram binihi dum ravrava sabuga be mwa bevea be, “Noḡu doroniva huri imwamwa God, nuḡun gabi be mwa oda aloloku.”

¹⁸Haḡe ira lavoa non ira Jius ram bwaliua be, “Gov lol dum havanau dan̄an̄a be vi dovon̄ainia lalai kamai be nom mwasigi abena be gov lol ginau geki?”

¹⁹Jisas mwa bwaliura be, “Nav salan̄ai Imwa Tataro geki, i atagun gubwen̄ gaitolu nav haḡo domarei muleinia.”

²⁰Haḡe ram bevea lalainia be, “Nu lai taul n̄avul gaivasi domwan gaiono be men haḡoana na imwa geki! Kun hanigi be gov haḡo domareinia atagun gubwen̄ gaitolu!”

²¹Take imwa tataro be Jisas mwa avo aluna, kea rebehina sibona.

²²Batena be nu tomare mulei nin mateana, non roron̄tai ram binihi dumwia be nu vev ginau uhu amua, i ram binihimwasigi ravrava sabuga i havanau Jisas nu vevea.

²³Batena be Jisas mwa dogo Jerusalem lol Samsamwaran Halbisḡalau, kera ivusi ran vinihi mwasiginia batena ran gita ginau dan̄an̄a be nu lolira.

²⁴Take Jisas mwa hav vinihi te mwasiginira, bwatuna be mwa ilora duluai.

²⁵Mwa hav tu tehe be atatu dolua men vevera lalainia, bwatuna kea sibona mwa ilo ginau duluai be mwa dogo alolora.