Read Hano Jon 20 Bible Online

Jon 20 - Hano bible

Jon 20

¹Mabon̄ gaituvwa la Sande, ute meto radu, Mere Makdalen mwa bano vai aben malan̄a i mwa ḡitae be ran lai dagai vatu nin bwan̄on malan̄a.

²Haḡe kea mwa rovo vai aben Saemon Pita mai roron̄tai, gabe Jisas mwa dabea, mwa bevea lalainira be, “Ran lai dagai Ratahigi nin malan̄a, i gam hav iloe tehe be ram daua behe!”

³Haḡe Pita mai roron̄tai ram bano vai aben malan̄a.

⁴Ramuru rovo, take roron̄tai vwate mwa rovo vilvilehi nin Pita i mwa botu aben malan̄a amua.

⁵Kea mwa siolo mwa ḡita gav malumlumu be ran lulun̄ia alolona, take mwa hav haroro te vai alolon malan̄a.

⁶Haḡe Saemon Pita mwa mai ataguna, i mwa haroro rahurahu lol malan̄a. I kea mwa ḡita gav malumlumu be ran lulun̄ia alolona mwa eno.

⁷I gavu be ran vivihi bwatun Jisas ginia. Nuhav eno tehe mai gav malumlumu take nu lulun̄iana gahena.

⁸Haḡe roron̄tai gabe nu votui malan̄a amua, kea mulei mwa haroro lol malan̄a; mwa ḡitae i mwa binihimwasigi.

⁹Take ram hav ilo te batoi ravrava Sabuga radu gabe mwa bevea be kea vi tomare mulei nin mateana.

¹⁰Haḡe ira roron̄tai ram dabagilu mulei vai anvanua.

¹¹Mere mwa du mwa dei matbon̄on malan̄a avare. Mahavana be mwa dei, mwa siolo mwa ḡarere lol malan̄a

¹²i mwa ḡita enjel gairua ramuru sagasagai gaisaga maita, ramuru dogo lol ute be rebehin Jisas nu en aia, vwate la bwatuna i vwate la bwalagena.

¹³Haḡe ramuru hudalinia be, “Vavine, huri hano gom dei?” Take kea mwa bwaliura mwa bevea be, “Ran lai dagai noḡu Ratahigi, i nam hav iloe tehe be ran taua behe!”

¹⁴I kea mwa ban burigai mwa ḡita Jisas mwa du aia; take mwa hav iloe tehe be Jisas haḡea.

¹⁵Jisas mwa hudalinia mwa bevea be, “Vavine, huri hano gom dei? Matu gom hiḡe ihei?” I kea mwa binihia be bisata vuigin talu, i mwa bevea lalainia be, “Be giḡo Ratahigi gon lai dagainia, vevea lalaiau be gon taua halabehe, i nai vano ba laia.”

¹⁶Jisas mwa bevea lalainia be, “Mere!” Haḡe Mere mwa ban burigai huria mwa bevea la avoana nora Hibru be, “Raboni!” (Geki binihiva be, “Vagahi.”)

¹⁷Jisas mwa bevea lalainia be, “Gosav sibweriau tehe, bwatuna be nam hav hae te radu vai aben Tata. Take goi vano huri ira tuaku ba bevea lalainira be nam dabagilu mulei vai abena gabe Tamaḡu i Tamara, noḡu God i nora God.”

¹⁸Haḡe Mere Makdalen mwa bano mwa bevea lalai ira roron̄tai be kea nu gita Ratahigi i mwa bev luae lalainira havanau be Jisas nu vevea lalainia.

¹⁹Haḡe la Sande ute ravravi, ira roron̄tai ram ḡoḡo ute gaituvwa i ram dogo lol gatav goro, bwatuna be ram matagui ira tomuai nora Jius. Jisas mwa mai mwa du boralolora mwa bevea be, “Tamwata na togo abemiu.”

²⁰Ataguna be mwa bev avoana geki, mwa bagahira gin limana i ḡaḡauna. Ira roron̄tai ram masiri gin samwarana huri be ram ḡita Ratahigi.

²¹Jisas mwa bev muleinia lalainira be, “Tamwata na togo abemiu. Kunia be Tata mwa horau, inau mulei nam hora kimiu.”

²²I mwa mambu vai alura mwa bevea be, “Giv lai Vui Sabuga.

²³Be giv binihi kaburai vurora atatu, vurora mwa binihi kaburaiana; Tabe gisav binihi te kaburai vurora, kunia vurora sihav binihi te kaburaiana.”

²⁴Vwate nin ira roron̄tai han̄vul domwan gairua, Tomas gabe mwa (uloinia be Malava), kea sigai maira mahavana be Jisas nu mai.

²⁵Haḡe ira roron̄tai rituai ram bevea lalainia be, “Gan gita Ratahigi!” Tomas mwa bevea lalainira be, “Nasav vinihi te mwasigi vaivotu be nav gita halan duru lol limana i nav sogai bwaruruguku la halan sari lol ḡaḡauna.”

²⁶Atagun wik gaituvwa ira roron̄tai ram dogo ute gaituvwa mulei lol gatav goro, i Tomas bul maira. Gatava nu lok, take Jisas mwa mai mwa du bora lolora mwa bevea be, “Tamwata na togo abemiu.”

²⁷Haḡe mwa bevea lalai Tomas be, “Tau bihumwa teti, i gita limaḡu; vuvuri gov hagai lua limwamwa ba sogainia lol ḡaḡauku. Gov lin̄ nom binihiv gairuruai, ba binihimwasigi!”

²⁸Tomas mwa bwaliua be, “Noḡu Ratahigi i noḡu God!”

²⁹Jisas mwa bevea lalainia be, “Gom binihimwasigi bwatuna gom ḡitau? Samwarana gaivua lalai ira hei gabe ram binihimwasigi ta ram hav gitau tehe!”

³⁰Jisas nu lol ginau dan̄an̄a ivusi lolmatan non roron̄tai, take nuhav ravan te ḡoro lol buka geki.

³¹Take kera geki mwa ravana huribe giv binihimwasigi be Jisas kea Kraes, Nitun God, i be gin nomiu binihimwasigi garagusi aluna giv lai rahuana.