Read Hano Jon 5 Bible Online

Jon 5 - Hano bible

Jon 5

¹Ataguna gea, Jisas mwa ban huri nora samsamwara vwate ata Jerusalem.

²Aben Jerusalem waitogo vwate mwa do aia, sosori n̄an gin matgatavan vanua mwa huia be matgatava huri sipsip. Imwa vwate mwa do aia mai malmaluna gailima, i ute gea lol nora avoana ira Hibru ram huia be Betsata.

³Haroharogana ivusi ram eno lol malmalun imwa n̄oto gea, ira matagara, ira bwalage hantai maira ira luḡu.

⁴Gubwen̄ rituai enjel non God vi hiv lol waitogo ba sabwaria. Muan harova, be mwa hivo muana ataguna be waitogo nu sabwariana, kea mwa rahu darihou.

⁵Atatu vwate aia nu haro huri taul n̄avul gaitolu domwan gaivwelu.

⁶Batena Jisas mwa ḡitae be mwa en aia i mwa ḡita batoia be wani gea nu haro huri mahavan n̄ava huba; i mwa hudalinia mwa bevea be, “Gom doron be gov rahu mulei?”

⁷Haḡe haroharogana mwa bwaliua mwa bevea be, “Ratahigi atatu sigai teti be men tauau lol wai batena be waitogo mwa sabwariana; batena be nam lol ron̄oe be nav hiv alolona, atatu dolua mwa hiv vilvilehi amua vai alolona.”

⁸Jisas mwa bevea lalainia be, “Tomare, lai ebemwa ba lago.”

⁹Haḡe wani gea mwa rahu darihou; mwa lai ebena i mwa dau bwatuna mwa lago. Gubwen̄i gea nu vora gubwen̄ mambuharai,

¹⁰i ira lavoa non ira Jius ram bevea lalai wani gea be mwa siv rahu be, “Geki gubwen̄ mambuharai, mwa hav tu tehe, hurin nonda silo be gov tatal abemwa.”

¹¹Take mwa bwaliura mwa bevea be, “Atatu be nu varahuau, mwa bevea lalaiau be nav lai ebeku ba lago.”

¹²Haḡe ram hudalinia ram bevea be, “Wani gea ihei be mwa bevea lalainigo be gomen lol ginau kun geki?”

¹³Take wani gabe nu rahu mulei, mwa hav iloe tehe be ihei be Jisas, huri be sinombu ivusi maragai aia, i Jisas nu taleva dagai.

¹⁴Ataguna n̄an gea, Jisas mwa habwe wani gea lol Imwa Tataro haḡe mwa bevea lalainia be, “Ron̄oe, kekadogaha gom rahu mulei, i gosav mom lol te havanau hantai mulei bere ginau hantai liu gim mom dumwigo.”

¹⁵Haḡe wani gea mwa ban dagai mwa bev seserainia lalai ira lavoa non ira Jius be Jisas haḡea be nu varahua.

¹⁶Haḡe ram dau bwatuna ram bev hantai Jisas huri be nu varahu wani gea lol gubwen̄ mambuharai.

¹⁷Haḡe Jisas mwa bwaliura mwa bevea be, “Tamaḡu mwa lalaḡo vataha mahavana i inau mulei nav lalaḡo kunia.”

¹⁸Non avoana gea mwa lol binihira tomuai non ira Jius mwa wasi be rav wehia; barabe huria n̄an be nu lol n̄andu silon gubwen̄ mambuharai ta huri be nu vevea mulei be God kea mwasin Tamana, lol alen̄a gea mwa lolia ramuru dadariha mai God.

¹⁹Haḡe Jisas mwa bwaliura mwa bevea be, “Nam bev mwasigi lalai kimiu be, inau Nitun God nasav lol te dum ginau hurin binihiḡu mahaḡea, nam lol hano n̄an gabe Tamaḡu mwa lolia. Hano be tata mwa lolia inau mulei Nituna nav lolia.

²⁰Huri Tamaḡu mwa dabeau i mwa bagahiau gin ginau duluai gabe mwa lolira sibona. Kea vi vagahiau gin lalaḡov lalavoa liu nin geki i kimiu duluai giv dan̄an̄a ginia.

²¹Kun tata nu lol domarei ira atatmate i mwa lai rahuana lalainira, kunia mulei inau Nituna nav lai rahuana lalai irahei be nam doronira.

²²Tata gahena mwa hav vevegi te ihei. Kea nu lai roron̄o lalaiau be inau nav vevegi.

²³Huri be vataha atatu rav binihimarahiau kun n̄an gabe ram binihi marahi Tata. Ihei tehe be mwa hav binihi te marahiau Nitun Tata, mwa hav binihi te marahi Tata be nu horau.”

²⁴“Nam bev mwasigi lalai kimiu be, ihei tehe be mwa ron̄ noḡu avoana, i mwa binihimwasigi wani be nu horau, wani gea vi haḡo rahuana vai tuai.

²⁵Nam bev mwasigi lalai kimiu be mahavana mwa mai huba batena be ira atat mate rav ron̄ siloku, inau Nitun God, i kera be rav ron̄oe rav rahu mulei.

²⁶Kun Tata gahena kea bwatun rahuana, kunia mulei kea nu lol inau Nituna be nav vora bwatun rahuana.

²⁷I kea nu lai lalaiau roron̄o, be nav vevegi bwatuna be inau Nitun Atatu.

²⁸Gisav dan̄an̄a te ginia; mahavana mwa mai be ira atatmate rav ron̄ siloku.

²⁹I rav mwalue nin bwarura. Kera gabe ran lalaḡo tavuha rav tomare mulei i rav rahu, ta kera gabe ran lalaḡo hantai, rav tomare mulei i rav lai silo vevegi.”

³⁰“Nasav lol te dum hano gin noḡu roron̄o siboku; nam bevegi n̄an hurin hano God mwa bevea lalaiau, i noḡu silo vevegi nu vavtutu, bwatuna nam hav lol te ron̄oe be namen lol hano be nam doron, take hano gabe wani nu horau mwa doronia.”

³¹“Be inau siboku nav vevuri noḡu lalaḡova siboku, hano be nam bevea si hav laiana tehe gi mwasigi.

³²Take atatu vwate dolua gabe mwa bev ginau tavtavuha kunia huriau, i nam iloe be hano be kea mwa bevea huriau nu mwasigi.

³³Gin horara nomiu horata vai aben Jon be ramen ron̄ non avoana, i kea nu avo huri mwasigi.

³⁴Nam hav avo te kunia gin binihiva be nam doron atatu vwate be vi vora gaituraku, take nam avo kun geki liuhage huri be giv rahu.

³⁵Jon nu vora kun bulu be mwa oda i mwa ḡigita, i kimiu gin doron huri mahavan vwelvwele be gimen ron̄ mwandavuha lol non gigita.

³⁶Take inau gaituraku abena be non avoana nu muramura liu nin avoana non Jon be nu laia. Vataha lalaḡova be Tamaḡu nu laira lalaiau be nav lolira, kera haḡea ram bora gaituraku i ram dovon̄ainia haḡea be tata nu horau.

³⁷I tamaḡu be nu horau kea mulei mwa durau. Gim hav ron̄ te hohoi silona, sa gim hav gita te hohoi lolmatana.

³⁸I gim hav lai te ḡoḡo non avoana vai lol lolomiu bwatuna gim hav binihi te mwasigi wani gabe kea nu horae.

³⁹Gim hiḡehiḡe lol Ravrava Sabuga duluai huri be gim binihia be giv habwe rahuana vai tuai alolona. I ravrava sabuga kera geki gabe ram bev huri huriau.

⁴⁰Take gim hav doron tehe be gimen mai vai abeku huri be gimen rahu.”

⁴¹“Nam hav hiḡe te ute be atatu ramen sagereiau.

⁴²Ta nam iloe be kimiu atat hanigi, i nam iloe be gim hav tabe te God lol lolomiu.

⁴³Nam mai mai roron̄o non Tamaḡu take gim hav lai te ḡoḡoau, ta batena atat dolua mwa mai lol non roron̄o mau gim lai ḡoḡoe.

⁴⁴Gim doron be gimen to ba lai avoan tavtavuha nin kimiu mahaḡea sibomiu, ta gim hav lol te ron̄oe be gimen lol ginau be God sibona men ron̄ mwandavuha gin kimiu. Haḡe giv binihimwasigi dum haniniau?

⁴⁵Gisav vinihia tehe be, O kea haḡea vi vev hantai gida aben tamana. Ta Moses gabe gim dari nomiu doronhohov aluna, kea haḡea vi vevegi kimiu.

⁴⁶Be gis binihimwasigi Moses mwasigi, gis binihimwasigiau mulei bwatuna kea nu ravrava huriau.

⁴⁷Take bwatuna be gim hav binihi te mwasigi havanau nu ravae kunhanigi be giv binihimwasigi dum hano nam bevea?”