Read Hano Lalaḡova 10 Bible Online

Lalaḡova 10 - Hano bible

Lalaḡova 10

¹Atatu vwate la vanua Sisaria ihana Konilias. Kea muai ḡoro atatun bwaloana non ata Rom.

²Kea atat vavtutu vwate i kea mai tasalana i ira nituna ram ḡogonai God. Kea mulei mwa bului maragai ira hiru ira Jius i mwa dataro vataha mahavana lalai God.

³Atagun bobon alo la alo gaitolu kea mwa hueri, mwa ḡita enjel non God be mwa haroro abena mwa bevea lalainia be “Konilias”.

⁴Haḡe kea mwa ḡita mutmutai enjel gin mataguana i mwa bevea lalainia be, “Havanau, Vagahi?” Haḡe enjel mwa bwaliua mwa bevea lalainia be, “God mwa ron̄ mwa davuha gin nom tataro i nom rovoga alun lolotabetabe, i kea mwa dogo be vi vwaliugo.

⁵I kadogaha gov hora atatu rituai vai Jopa huri atatu gabe ihana Saimon Pita.

⁶Kea atatu ata lol tanon wani Saimon gabe mwa lol vataha ginau gin vinun buluki, kea mwa dogo antahi.”

⁷Haḡe enjel mwa ban dagai ninia i Konilias mwa uloi non atatun rovoga gairua mai atatun bwaloana vwate, atat vavtutu vwate gabe buluina.

⁸Kea mwa bevea lalainira huri havanau be nu loli i mwa hora dagainira vai Jopa.

⁹Gubwen̄ dolua lol mahavana be kera la hala i ram la sosori gin vanua Jopa, Pita mwa hae amare la ulun imwa abobon alo huri be men tataro.

¹⁰Haḡe maro mwa gasia i mwa doron be men gan te ginau mahavana be ram lol vatuvwai vuvuri ginaganiana, kea mwa hueri.

¹¹Kea mwa ḡita ute atamare mwa mahavan̄i i ginau mwa himai nin amare vai lol ureure i gitavanana nuḡun bwabwan̄i, i ram haḡoe la siguna gaivasi dalisia mwa himai vai lol ureure.

¹²Haḡe lalan̄an boe ram du alolon gete gea, ginau kun avua mai teltele i manu i lalan̄an vataha ginau.

¹³Haḡe silo mwa bevea lalainia be, “Pita, tomare be wehi ginau kerageki ba ḡania.”

¹⁴Take Pita mwa bwaliua mwa bevea be, “Sigai, Ratahigi. Nam hav gan te hohoi ginau be nu bibili sa nuhav tavuha tehe lol matamwa.”

¹⁵Haḡe silo mwa bev muleinia lalainia be, “Ginau be God nu lolia mwa melmelo huba gosav vev te dumwia be nu bibili sage nu hantai.”

¹⁶Ginau geki nu loli kunia vatolu vuvuri mwa lai muleinia vai lol ute atamare.

¹⁷Mahavana be Pita mwa binbinihi daligi huri non hueri, atatu gabe Konilias nu horara ram dol botui imwa, i kadogaha kera la matgatava.

¹⁸Haḡe ram dol hudaligi be, “Atatu vwate teti abena be ihana Saimon Pita?”

¹⁹Take Pita mwa lol ron̄oe radu be vi ilo binihiva ata lol hueri, haḡe Vui Sabuga mwa bevea lalainia be, “Gov ron̄oe! Atatu gaitolu teti kadogaha ram hiḡego.

²⁰Gov lol vatuvwai be hivo i gosav binbinihi te maragai huri be gomen hiv maira, bwatuna inau nam horara.”

²¹Haḡe kunia Pita mwa hiv maira mwa bevea be, “Inau haḡea atatu be gim hiḡea, i gim dol mai huri hano?”

²²Haḡe ram bwaliua ram bevea be, “Tomuai Konilias mwa hora kamai. Kea mwasin atat tavuha mwa ḡogonai God i ira Jius ram binihi marahi maragainia. Enjel non God nu vevea lalainia be vi warego vai la imwana, huribe vi ron̄ hano be mwa du be goi vevea.”

²³Haḡe Pita mwa laira vai aimwa i mwa bevea ram dogo huri bon̄i aia. Haḡe mwa ran mabon̄i kea mwa bano maira i ira binihimwasigi rituai ata Jopa ram ban bul maia.

²⁴Gubwen̄ dolua mulei ataguna kea mwa botu la vanua Sisaria, i aia Konilias maira ata la imwana duluai maira non buluana gabe nu warera ram hohovia.

²⁵I mahavana be Pita mwa du be men haroro, aia Konilias mwa bisogari maia, i mwa hiv bahudui lol bwalagena mwa dai bwatuna vai aluna.

²⁶Take Pita mwa dabe ragasia mwa bevea lalainia be “Tomare. Inau siboku atatu vuroi n̄ano.”

²⁷Pita mwa bevuri mai Konilias vaivotu ramuru haroro aia i mwa ḡitae be sinombu gaivua ram ḡoḡo.

²⁸Kea mwa bevea lalainia be, “Giḡo sibomwa gom ilo didininia be, mwa hav tu tehe be ira Jius hurin nora uloilua be ramen haroro lol imwan ira Lolobon̄i i rav bulbulu maira. Take God mwa seserainia lalaiau be nasav vev te dumwia be atatu nu bibili sage nu hav tavuha tehe.

²⁹Haḡe mahavana be gom horahora huria, nan hav mai tehe mai binihiv hara bora vwate, nam hudalinigo be gin hudaliau huri havanau?”

³⁰Konilias mwa bevea be, “Gubwen̄ gaitolu nu nogo huba la alo gaitolu atagun bobon alo nan tataro alolon imwaḡu. Haḡe nam ḡita atatu vwate n̄an darihou mwa du mai gaisaga maita ḡoro lol mataku,

³¹i kea mwa bevea lalaiau be, ‘Konilias! God mwa ron̄ nom tataro i mwa ilo nam lalaḡov tavuha huri lolotabetabe.

³²I gov hora atatu rituai vai Jopa huri atatu gabe ihana Saimon Pita. Kea atatu ata lol tanon Saimon gabe mwa lol vataha ginau alun vinun buluki, kea mwa dogo antahi.’

³³I nam hora darihou hurigo, i gom dabeau gom mai dumwi. I kadogaha gida duluai ute gaituvwa teti la lolmatan God i gam hohovi be gav ron̄ te havanau be Ratahigi mwa bevea lalainigo be gov vevea lalai kamai.”

³⁴Haḡe Pita mwa bavora mwa avo mwa bevea be, “Inau nam binihimwasigi be God mwa domuai atatu duluai la hala n̄an gaituvwa.

³⁵Ihei tehe gabe mwa ḡogonainia i mwa lalaḡo bavtutu nu tavuha n̄an lalainia, son̄o be kea hava guli.

³⁶Gim ilo roroi gabe nu horae lalai sinombu ira Jius, nu seserai lua Roroi Tavuha huri tamwata sivi Jisas Kraes, kea Ratahigi ḡoro atatu duluai.

³⁷Kimiu gim ilo ginau duluai gabe nu lol bisirainia alun Jisas Kraes lol vanua Israel, nu tau bwatuna Kalili ataguna be Jon nu toretore huri garuhisabuga. Gim iloe huri Jisas ata Nasaret be kun hanigi God mwa salil non Vui Sabuga aluna mai muramura.

³⁸Nu vano vataha ute duluai mwa lol lalaḡova tavuha, i mwa barahura gabe ram dogo vauhi halaten muramura non Vui hantai, bwatuna God bul maia.

³⁹Kamai haḡea gaitura huri ginau duluai be nu lolia la vanua Israel mai Jerusalem. Haḡe ram bevegia huri mateana, i ram bohae vai alun volovolo.

⁴⁰Take God mwa lol domareinia nin mateana atagun gubwen̄ gaitolu i mwa lol bisirainia

⁴¹mwa hav vora te lalai atatu duluai, take lalai ira gaitura gabe God nu gita luara huba, kea gin binihira be lalai kamai gabe gan gani i gan mwinu bul maia ataguna be nu tomare mulei nin mateana.

⁴²I nu vevea lalai kamai be gav toretore huri leo tavuha lalai sinombu, i mulei be gav tu gi gaitura huria be kea God nu gita luae be vi vora vevegi huri rahuana i mateana.

⁴³Haḡe ira atatun vevsera duluai ran vevea huria be, atatu duluai be ram binihimwasigi aluna vi binihi kaburai vurora alun muramura lol ihana.”

⁴⁴Mahavana be Pita mwa avo radu, Vui Sabuga mwa hivo alura duluai be ram roron̄tai non avoana.

⁴⁵Ira Jius gabe ram binihimwasigi alun Jisas Kraes, kera gabe ran mai nin Jopa mai Pita ram dan̄an̄a maragai be God mwa salil non hogoi Vui Sabuga alun ira Lolobon̄i mulei.

⁴⁶Bwatuna ram ron̄ora be ram avo la avoana dodolua i ram lol roroai God gin samwarana gaivua Pita mwa avlua mwa bevea be,

⁴⁷“Sinombu kera geki ram lai Vui Sabuga, kunia n̄an be kamai gan laia. Matu atatu te abena be rav tuḡorora be rasav lai te garuhisabuga gin wai?”

⁴⁸Haḡe kunia Pita mwa bevea lalainira be rav lai garuhisabuga la ihan Jisas Kraes. Haḡe ram hudalinia be vi togo bul maira huri gubwen̄i rituai mulei.