Read Hano Lalaḡova 12 Bible Online

Lalaḡova 12 - Hano bible

Lalaḡova 12

¹Haḡe kadogaha Ratahigi Lavoa Herod mwa dau bwatuna mwa wehi atatun uloilua rituai.

²Haḡe mwa wehi Semes gabe tuan Jon gin buan bwaloana.

³Haḡe mwa ḡitae be ira Jius ram samsamwara huria, kea mwa lol ron̄oe be vi haḡo batugehi Pita mulei. Ginau geki nu loli lol taron Samsamwaran Bereti Vatuga.

⁴I mahavana be ram haḡo batugehi Pita vuvuri ram daua lol imwa vauvauhi, i tatan̄an vatugin bwaloana gaivasi ram ḡita ḡoroe kera gaivasigi. Herod mwa lol taritari be vi taua huri nogonan vevegi lolmatan sinombu atagun Halbisḡalau.

⁵Haḡe kunia Pita mwa dogo lol imwa vauvauhi, take sinombu lol uloilua ram dataro lalai God huria.

⁶Alolon bon̄i be vi rani Herod gom lai luae vai lolmatan sinombu, Pita mwa maturu lol davolan ira gitaḡoro gairua. I ran vauhia gin gao talai gairua, i ira gitaḡoro ram matainia la gatavan imwa vauvauhi.

⁷Haḡe darihou n̄an enjel non Ratahigi mwa du darihou aia, haḡe gigita mwa ḡigitai vwavwan imwa kolo lol imwa vauvauhi. Haḡe enjel mwa rabas Pita la isibwana mwa bamatae mwa bevea be, “Tomare vilvilehi.” Haḡe gao talai mwa hovi nin liman Pita darihou.

⁸Kunia enjel mwa bevea be, “Gov sis gaomwa ba saru nom sus.” Haḡe Pita mwa lolia kunia, i enjel mwa bevea be, “Tau nom koti alumwa vuvuri gov mai ba huriau.”

⁹Haḡe Pita mwa huria vai avare nin imwa vauvauhi mwa hav iloe tehe, be ginau be enjel mwa lolia mwasigi, take mwa binihia be havanau gabe enjel mwa lolia kea hueri.

¹⁰Ramuru ḡao lol davolan muan gitaḡoro, vuvuri gairuana, i nogonana ramuru mai vai la gatav aian be mwa bwihi avare vai alolon bwatutun vanua. Haḡe gatava mwa mahavan̄i sibona hurira, i ramuru binihi avare. Ramuru hivo la hal gaivua, i enjel mwa derai Pita darihou.

¹¹Haḡe Pita mwa ḡita batoi havanau be mwa loli lalainia, mwa bevea be, “Kadogaha nam iloe be mwasigi haḡea. Be Ratahigi mwa hora non enjel be men varahuau nin muramura non Herod i nin ginau duluai be ira Jius ram hohovia be vi loli.”

¹²Haḡe Pita mwa ron̄ batoira kunia mwa bano vai la imwa Mere, gabe ratahin Jon Mak, i aia sinombu ivusi ram ḡoḡo ram dataro.

¹³Pita mwa sirisirin̄i la gatava va halavare, i atatun rovoga vwate vavin daulato ihana Roda mwa himai be vi vwaliua.

¹⁴Kea mwa ron̄ batoi silon Pita i mwa ron̄ mwa davuha maragai mwa binihi malioi be vi havan̄ gatava, kea mwa hae mwa bev muleinia be Pita mwa du avare.

¹⁵Haḡe ram bevea be gom bubuaraga. Take mwa bev mutmutainia be mwasigi. Haḡe kunia ram bwaliua be ram bevea be, “Non enjel gea.”

¹⁶Tiri ḡalia nan Pita mwa sirisirin̄i mulei. I kera ram havan̄ gatava, i mahavana be ram ḡitae ram dan̄an̄a maragai.

¹⁷Kea mwa borotainira gin limana be rav to ḡoḡonai, i kea mwa bev halana lalainira kun hanigi Ratahigi mwa lai luae nin imwa vauvauhi. Haḡe mwa bevea lalainira be, “Giv vev sera ginau geki lalai Semes mai ira binihimwasigi duluai, vuvuri mwa bwihavare mwa bano mwa dogo ute dolua.”

¹⁸Haḡe mwa ran mabon̄i gaituvwa ira atatun bwaloana ram ron̄ mwa hantai maragai, i ram hudaltali mulmuleinira be, “Pita mwa ban halabehe?”

¹⁹Haḡe Herod mwa dau avoana be rav siroe take ram hav habwea tehe. Haḡe kea mwa hudaltali ira gitaḡoro gin avoana hudaligi ivusi vaivotu be mwa datauleo be rav wehi bamatera. I ataguna geki Herod mwa derai vanua Judia i mwa hivo mwa dogo lol vanua Sisaria.

²⁰Herod mwa lolhoroi maragai sinombu ata Taea mai Saidon, i kunia ram bano lol tatan̄ana be rav gitae. Muana ram rav atatu ihana Blastas, kea gabe mwa do mwa ḡitaḡoro rovoga alolon imwan Herod be vi vano bul maira. Haḡe ram mai aben Herod ram hudalinia be vi lol tamwata lalainira, bwatuna be atatu ata la vanuara ram bol gara ginau n̄an nin vanuan ratahigi lavoa.

²¹Haḡe lol gubwen̄i gabe Herod nu tovoe, kea mwa saga raumatan gaisagana, i mwa domahuri la tanon togotogo haehae i mwa avo lalai sinombu.

²²Haḡe ram haharigi amare ram bevea be, “Mwahav vora te atatu gea be mwa avo, take god.”

²³Darihou n̄an enjel non Ratahigi mwa rabas dul Herod vai ata, bwatuna be mwa hav gogonai te God. Haḡe ulehi ram ḡan sisivi rebehina i kea mwa mate.

²⁴Kadogaha avoana non God mwa mauri i mwa lon̄ahi ute.

²⁵Haḡe Banabas mai Sol ramuru nogoi rovoga duluai ramuru dabagilu nin Jerusalem, i ramuru lai Jon Mak bul maira.