Read Hano Lalaḡova 16 Bible Online

Lalaḡova 16 - Hano bible

Lalaḡova 16

¹Pol mwa lago mulei la vanua Debe mai Listra, i atatu gabe ihana Timoti mwa dogo aia, i ratahina mulei kea ata lol uloilua, vavine ira Jius, take tamana kea ata Krik.

²Haḡe ira binihimwasigi duluai ata lol vanua Listra mai Ikoniam ram bevea be Timoti kea atatu tavuha.

³Pol mwa doron be raru vi lago bul mai Timoti, i kunia mwa dav dovon̄ana aluna. Pol mwa lolia kungeki bwatuna be ira Jius duluai be ram dogo lol ute duluai gea ram iloe be taman Timoti kea ata Kris.

⁴Haḡe mahavana be ira totolu geki ram dol botui bwatutun vanua, ram dol bev lua silo duluai gabe ira hala mai ira bwatmetua ira Jius ran vevea lalai ira binihimwasigi, i ram bevea lalainira be rav binihimwasigi silo kera gea.

⁵Haḡe uloilua duluai mwa muramuraga lol binihimwasigi garagusi, i mwa mauri vataha gubwen̄i.

⁶I kera ram dol lago lol vanua Vrijia i Kalili bwatuna be Vui Sabuga mwa hav mahin̄ainira tehe be rai vano lol vanua Esia.

⁷Haḡe mahavana be ram dol botui utuhin vanua Misia, ram lol ron̄oe be rai vano lol vanua Bitinia, take Vui non Jisas mwa hav mahin̄ainira tehe.

⁸Haḡe ram ban rahurahu vaivotu Misia i ram bano vai Troas.

⁹Alolon bon̄i gea Pol mwa hueri be ata Masedonia mwa du mwa uloinia mwa bevea be, “Mai vai teti Masedonia ba bului kamai!”

¹⁰Haḡe mahavana be Pol mwa hueri vuvuri, gam lol vatuvwai be gai vano vai Masedonia, bwatuna be gam binihia be God mwa uloi kamai be gav toretore huri Roroi Tavuha lalai sinombu aia.

¹¹Haḡe gam derai vanua Troas gam bano la waḡa vwate vai la vanua Samatres, i mwa rani gam bano vai Niabolis.

¹²I gam mwalue nin aia gam bano alolon vanua vai Vilipae, gabe bwatutun vanua huri muan ute ata Masedonia; ute gea mwa dogo halaten muramura non vanua Rom. I gam dogo huri gubwen̄i rituai aia.

¹³Haḡe lol gubwen̄ Mambuharai, gam mwalue nin bwatutun vanua i gam bano hurin balsin numbu, i aia gam binihia be daga ute gea mwa bora tanon tataro bulbulu non ata Israel be ram ḡoḡo aia.

¹⁴I vavine vwate mwa dogo mwa roron̄tai kamai kea vavine ata Tuatira ihana Lidia. Vavine geki non silo abena i mwa salei gav memea tavtavuha maragai. Lidia geki mwa ḡogonai God, i Ratahigi mwa havan̄ non binihiva be men roron̄tai havanau gabe Pol mwa bevea.

¹⁵I ataguna be kea mai sinombu duluai ata la imwana ram lai garuhisabuga, kea mwa ware kamai mwa bevea be, “Gin mai ba dogo alolon imwaḡu be gim binihia be inau atat binihimwasigi alun Ratahigi.” I kea mwa ḡaroinia alumai mwa lolia gam haroro lol imwana.

¹⁶Lol gubwen̄ vwate mahavana be gam bano vai lol tanon tataro, gam bisogari mai vavin daulato vwate, i vavine gea kea atatun rovoga gabe, vui hantai mwa dogo alolona mwa lolia be men tovtovo huri ute vainon̄oiha. Vavine geki mwa lol homu gaivua maragai huri non ratahigi aluna be ram bolia huri non avoana.

¹⁷Vavin daulato geki mwa huri Pol mai kamai, mwa haharigi amare mwa bevea be, “Atatu kera geki atatun rovoga non God holomare hae! I ram bev sera lalai kimiu be kun hanigi giv rahu!”

¹⁸Kea mwa avo kungeki huri gubwen̄ ivusi, vaivotu be Pol mwa hav ron̄ te mwandavuha ginia, i mwa ban burigai mwa bevea lalai vui hantai be, “La ihan Jisas Kraes nam bevea lalainigo be gov mwalue nin vavin daulato!” Haḡe vui hantai mwa mwalue ninia darihou.

¹⁹Haḡe non ratahigi ram ḡitae be Pol mwa duḡoro halan nora homu, ram haḡo batugehi Pol mai Sailas ram daura lol imwa ḡoḡoana huri vevegi lol ute mahavaga gaivua lol bwatutun vanua bulbulu aia.

²⁰Haḡe i ram darira lolmatan ira lalavoa ata Rom gairua i ram bevea be, “Ira Jius gairua geki, ramuru lol hantai ginau teti la bwatutun vanuanda.

²¹I nora silo vagahi huri silon vanua nu vahala alun nonda silo; bwatuna be gida tam dogo aten muramura ata Rom, i tasav dara te dumwi alun silo geki sage tasav huhui te dumwia.”

²²Haḡe vatugin sinombu gaivua ram ban burigai Pol mai Sailas. Haḡe ira lalavoa ata Rom ram hehera kaburai gaisagan Pol mai Sailas ram dalvusira.

²³I ataguna be ramuru lai gaivivilisi vuvuri, ram daura lol imwa vauvauhi, i ram av wasigi lalai ira matmatai ḡoro be rav lok batugehi wasinira.

²⁴Haḡe alun avoan wasi geki, ira matmatai ḡoro ram daura lol vwavwan imwa wasi i ram bauhi wasi bwalagera vai lol davolan bwatun gain imwa lalavoa.

²⁵Haḡe abobon bon̄i Pol mai Sailas ramuru lol iboi i ramuru dataro lalai God, i kera dodolua lol imwa vauvauhi ram roron̄tainira.

²⁶I darihou n̄an mwa sogai gaivua, i mwa rihui maragai imwa vauvauhi vaivotu bwatbwatuna ataa. Haḡe gatava duluai ram mahavan̄i, i sen ram matugu nin limara duluai lol imwa vauvauhi.

²⁷Haḡe matmatai ḡoro imwa mwa mamata mwa ḡitae be gatavan imwa duluai ran mahavan̄i, i mwa binihia be kera duluai lol imwa vauvauhi ran bwihavare; i kea mwa rau lua non buan bwaloana mwa doron be vi wehi muleinia sibona.

²⁸Take Pol mwa bato amare gin silo gaivua mwa bevea be, “E! Gosav lol te hantainigo sibomwa! Kamai duluai teti radu kadogaha!”

²⁹Haḡe matmatai ḡoro mwa ulo huri laet i atatu vwate mwa lai vilvilehi bulu, i kea mwa haroro mwa hiv bwaubwau lol bwalagen Pol mai Sailas.

³⁰Haḡe mwa lai bwihavareinira mwa bevea be, “Ira tarua, nav lol hano huri be nav rahu?”

³¹Haḡe ramuru bwaliua be, “Gov binihimwasigi alun Ratahigi Jisas, i gov rahu bul maira ata la imwai.”

³²Haḡe ram doretore huri avoana non Ratahigi lalainia maira mulei rituai gabe ram dogo la imwana.

³³Haḡe lol bon̄i n̄an gea matmatai ḡoro huri imwa vauvauhi gea mwa laira mwa bwaga bagaha halan gai vivilisi lol rebehira; i kea maira ata la imwana duluai ram lai garuhisabuga darihou.

³⁴Haḡe mwa lai Pol mai Sailas vai la imwana i mwa lai gina ganiana lalainira. I kea mai tasalana mai ira nituna ram masiri gin samwarana, bwatuna be kadogaha ram binihimwasigi alun God.

³⁵Haḡe mwa ran mabon̄i lavoa ata Rom mwa bevea lalai ira Polis be, “Giv lin̄ ira tarua raru vi vano.”

³⁶Haḡe kunia gita ḡoro huri imwa vauvauhi mwa bevea lalai Pol be, “Lavoa ata Rom mwa bevea be gav derai kimiru mai Sailas giru vi bwihi avare, i giru vi vano n̄an lol tamwata.”

³⁷Take Pol mwa bevea lalai tomuai ḡoro polis be, “Garu hav lol te ginau hantai vwate be nu vahala, take ran talvwus kamaru lolmatan sinombu i kamaru sibomaru gamuru do halaten muramura ata Rom! I ram dau kamaru lol imwa vauvauhi. I kadogaha ram siv doron be ramen hora lua kamaru dahuligi. Nu hav tavuha tehe! Ira lalavoa ata Rom sibora rav mai teti ba lai lua kamaru.”

³⁸Haḡe tomuai ḡoro ira polis mwa bevea lalai ira lalavoa ata Rom; i mahavana be ram ron̄oe, be Pol mai Sailas kera mwasin ata Rom, haḡe ram matagu.

³⁹Haḡe ram bano ram bev nora avoan hahagavi lalainira; i ram lai luara nin imwa vauvauhi, i kunia ramuru hudalinira be raru vi mwalue nin bwatutun vanua.

⁴⁰Haḡe Pol mai Sailas ramuru mwalue nin imwa vauvauhi i ramuru bano vai la imwan Lidia. I aia ramuru habwe ira binihimwasigi i ramuru avo lalainira, vuvuri ramuru bano.