Read Hano Lalaḡova 17 Bible Online

Lalaḡova 17 - Hano bible

Lalaḡova 17

¹Pol mai Sailas ramuru lago sivi vanua Amvipolis mai Apolonia, vaivotu i bwatutun vanua Tesalonaeka, gabe imwa tataro gaivua mwa dogo aia.

²Haḡe Pol mwa lolia n̄an hurin alen̄ana gabe mwa lolia tagaro, i mwa haroro lol imwa tataro. Kea mwa dogo aia huri gubwen̄ mambuharai gaitolu, mwa haḡo avoana,

³i mwa dugu halan Leo tavuha lalainira be wani Vurai vi ron̄ ḡagarasi i vi tomare mulei nin mateana. Haḡe Pol mwa bevea be, “Jisas geki gabe nam bevea lalai kimiu, kea Wani Vurai.”

⁴Haḡe atatu rituai ninira ram ron̄ batoi avoana gea ram huri Pol mai Sailas; i ira vavine tomuai rituai nin alolon ira vavine, i vatugin sinombu gaivua maragai alolora ata Krik gabe ram ḡogonai God.

⁵Take ira Jius sinera mwa hantai i ram hara ḡoḡo atat hahantai be ram lago mai taval ten lalaḡova la hal lalavoa i ram bul nora binihiv hahantai. I ram duḡoro bwatutun vanua duluai i ram momogai gatavan imwan Jason, huri be ramen habwe Pol mai Sailas ba lai bwihivareinira vai alolon sinombu.

⁶Take mahavana be ram hav habwera tehe, ram haḡo batugehi Jason mai ira binihimwasigi rituai ram ravara vai lol bwatutun vanua i ram haharigi ram bevea be, “Atatu kera geki ram lol hahantai ginau vataha ute duluai! Kadogaha ramuru mai la bwatutun vanuanda,

⁷i Jason mwa haḡo batugehira lol imwana. I kera ramuru lol salil silo non Ratahigi lavoa ata Rom, ramuru bevea be, ratahigi lavoa vwate mulei ihana Jisas.”

⁸Haḡe mahavana be ram bev avoana gea mwa lol atatu duluai aia mai ira lalavoa ram bigaigai maragai.

⁹Haḡe kunia ira lalavoa ram lol Jason mai ira binihimwasigi rituai be rav tau udui homu vi togo, gi nora tatauleo vuvuri ram siv derainira.

¹⁰Haḡe mahavana be ute mwa bon̄i, ira binihimwasigi ram hora Pol mai Sailas vai Berea. I mahavana be ramuru botu ramuru hae vai lol imwa tataro.

¹¹Sinombu aia ram samsamwara maragai huri nora avoana, liu ninira ata Tesalonaeka. Ram roron̄tai nora avoana vataha gubwen̄i gin n̄aitaiana gaivua, i ram binbinihi alun leo tavuha huri be havanau gabe Pol mwa bevea mwasigi.

¹²Haḡe kera ivusi ram binihimwasigi; ira vavin binihi marahi rituai mai ira ata Krik rituai mulei ram binihimwasigi.

¹³Take mahavana be ira Jius gabe ram dogo Tesalonaeka ram ron̄oe be Pol mwa doretore huri avoana non God Berea mulei, ram mai ram lol loḡeloḡera be rai van burigai ira tarua.

¹⁴Haḡe darihou n̄an ira binihimwasigi ram hora dagai Pol vai antahi; take Sailas mai Timoti ramuru dogo radu Berea.

¹⁵I atatu gabe ran vano mai Pol ram bano ram botu la vanua Atens, i ram dabagilu mulei vai Berea mai avoan dura nin Pol be Sailas mai Timoti raru vi mai ataguna n̄an vilvilehi.

¹⁶Mahavana be Pol mwa dogo radu Atens hohov Sailas mai Timoti, mwa ḡitae be atatu ram lol nun vatu sibora gi nora i lolona mwa biaroi maragai.

¹⁷Haḡe kea mwa haḡo avoana lol imwa tataro mai ira Jius i ira Lolobon̄i gabe ram ḡogonai God, i mulei lol ute bulbulu vataha gubwen̄i mai sinombu gabe ram la ḡao.

¹⁸Haḡe ata Kris rituai ram dogo gabe ran mataisaoga maragai la halan alen̄an nora avoana. I kera n̄an radu gea ram dogo ram biavo avo maia. Kera rituai ram bevea be, “Wani gea mwa siv lai avoana gea n̄an bonogai kunia. Mwa do mwa bev hano gea?” I atatu mulei rituai ram bevea be, “Kamai gam ron̄oe be kea mwa do mwa avo huri ira tagaro ata lol ute dodolua.” Ram do ram avo bwatuna be Pol mwa do mwa bev seserai Jisas i mwa bevea be God mwa lolia mwa rahu mulei atagun mateanana.

¹⁹Haḡe kunia kera ram lai Pol ram daria lolmatan nora kansel la bwatutun vanua, lol ute Ereopakas ram bevea be, “Gam doron be gav iloe huri silo vagahi gara geki gabe gom avo aluna.

²⁰Ginau rituai gabe gom bevea gam ron̄oe mwa lol butugai kamai, i gam doron be gav ilo binihiva ata alolora.”

²¹(Huribe kera duluai ata la vanua Atens mai ira tausala gabe ram dogo aia, ram doron be rav lai mahavana lalainira sibora ba bevea i ba roron̄tai alun ginau gara kunia.)

²²Haḡe Pol mwa du amare lolmatan Kansel mwa bevea be, “Nam ḡitae be kimiu ata Atens gim ḡogonai lalan̄an tagaro ivusi.

²³Huri be nam lago vataha bwatutun vanuamiu nam ḡita ute gabe gim ḡoḡonai aia, i nam habwe olta vwate mwa ravae aluna be, ‘Geki tanon gogonaiana alun God vwate gabe gam hav iloe tehe.’ God haḡea be gim gogonainia, son̄o be gim hav iloe tehe, i geki haḡea hano gabe nam bevea lalai kimiu.

²⁴God, be nu tau ureure i ginau duluai alolona, kea haḡea Ratahigi ḡoro amare i lol ureure, i mwa hav togo tehe lol imwa tataro huri gogonaiana gabe atatu nu lolia.

²⁵I mulei mwa hav rihai te ginau vwate, huri be gida atatu tamen lolia lalainia. Bwatuna be kea sibona mwa haḡo rahu atatu duluai.

²⁶Nin atatu n̄an gaituvwa God mwa lol luluv varan sinombu duluai la ureure ram dogo togo vataha ute. I kea n̄an gaituvwa nu lol dau tovtovon ute duluai be atatu vi togoinia vi votu kunia, i ginau duluai rav lalaḡo alolona lol taro kunia.

²⁷Kea nu lolia kun geki huribe atatu rav hiḡea, i mahavana be ram hiḡea rav habwe dumwia. Take God mwa hav togo te hautu nin atatu vwate;

²⁸kun gabe atatu vwate nu vevea be, ‘Bwatuna be tam bulu mai God n̄an gaituvwa, tav rahu dumwi, i tav lagolago i tav lol ginau duluai.’ Kunia be nomiu avoana rituai mwa bevea be, ‘Gida mulei ira nituna.’

²⁹Bwatuna be gida ira nitun God, tasav lol te nunun rebehina kun vatan̄oga mai vatlegiga sage vatu be mwa loliana gin binbinihi non atatu.

³⁰God nu ate ḡalau lalaḡova lete non sinombu mahavana be ran hav iloe te radu, take kadogaha mwa lol gida duluai la ureure be tav taleva nin nonda lalaḡova hantai.

³¹Bwatuna be nu hara vatuvwai gubwen̄i huria be vi vevegi ureure duluai gin vavtutu gin atatu gabe nu gita luae. Kea nu lai non mwasigi huri ginau geki lalai atatu duluai ginia be nu lol domarei wani gea nin mateana!”

³²I ram ron̄oe be Pol mwa avo huri tomarean mulei, kunia atatu rituai ram lolia n̄an gi sovu, take atatu rituai ram bevea be, “Gam doron be gov avo alun geki mulei.”

³³Haḡe Pol mwa domare nin ḡoḡoana.

³⁴I atatu rituai ram binihimwasigi i ram huria, atatu vwate ihana Daionisis kea vwate be nu togo lol kansel; vavine vwate mulei ihana Damaris, mai sinombu dodolua mulei rituai.