Read Hano Lalaḡova 18 Bible Online

Lalaḡova 18 - Hano bible

Lalaḡova 18

¹Ataguna geki, Pol mwa mwalue nin Atens mwa bano vai Korin.

²I aia mwa habwe ata Jius vwate ihana Avkila, gabe nu vora Pontus, i kea mwa siv mai nin Itali mai tasalana Prisila, bwatuna be Ratahigi lavoa Klodias mwa dau silo be ira Jius rav mwalue nin Rom. Haḡe kunia Pol mwa bano be vi gitara,

³ba do ba lol rovoga maira, bwatuna be kea mwa lai dum homu la rovogan imwa hauhau kun ira tuana n̄an gea.

⁴Pol mwa haḡo ḡoḡoana lol imwa ḡoḡoana vataha gubwen̄ mambuharai, Pol mwa lol ron̄oe lol non avoana be ata Krik mai ira Jius rav binihimwasigi.

⁵Mahavana be Sailas mai Timoti ramuru mai nin Masedonia, Pol mwa lai mahavana duluai alun toretore huri roroi, i mwa bev tavuhai halana lalai ira Jius be Jisas kea Kraes.

⁶Haḡe mahavana be ram ban burigainiai ram bev ginau hahantai vai aluna, kea mwa lai tagu gin nora avoana ginia be mwa darudaruai taniavu nin non koti mwa bevea lalainira be, “Be kimiu giv sala, kimiu sibomiu giv lai silo vevegi huria! Take inau sigai. I kadogaha nai vano huri Lolobon̄i.”

⁷I kea mwa derainira mwa bano vai la imwan Lolobon̄i ihana Taitus Jastas, gabe mwa ḡogonai God; imwana mwa do sosori gin imwa tataro.

⁸Krispas, gabe tomuai ḡoro imwa tataro, mai tasalana i ira nituna ram binihimwasigi alun Ratahigi; haḡe sinombu dodo lua ivusi mulei nin Korin gabe ram lai dum roroi ram binihimwasigi, i ram ḡaruhi sabuga.

⁹Alolon bon̄i vwate Pol mwa hueri i Ratahigi mwa bevea lalainia be, “Gosav matagu tehe, take gov avo vataha mahavana,

¹⁰bwatuna inau bul maigo i atatu vwate sihav lol te hantai dumwigo, bwatuna be noḡu sinombu ivusi alolon bwatutun vanua geki.”

¹¹Haḡe kunia Pol mwa dogo aia mwa bagahi sinombu gin avoana non God huri taul gaituvwa i udui.

¹²Haḡe mahavana be Kalio mwa dariana gi tomuai vevev ata Rom lol ute Akaia, i ira Jius ram ḡoḡo utegaituvwa ram haḡo batugehi Pol ram laia vai lol imwan harahara.

¹³Haḡe ram bevea be, “Atatu geki mwa lol ron̄oe be men lol sinombu be ramen vinihi mwasigi God la hala be nu hav tavuha tehe la silo!”

¹⁴Pol mwa du be men avo mahavana be Kalio mwa bevea lalai ira Jius be, “Ginau geki be vahalana huri mateana sage ginau vahala vwat kunia be nu loliana, haḡe nu vavtutu lalaiau be nav lin̄ maḡemu lalai kimiu ira Jius.

¹⁵Take ginau gea vigaigaiana huri avoana mai iha i nomiu silo sibomiu, kunia mwa du be kimiu sibomiu giv hara bavtutui nia. I nau siboku nasav vora te harahara huri ginau kunia!”

¹⁶Haḡe mwa ḡoro luara nin imwan harahara.

¹⁷Haḡe kera duluai ram haḡo batugehi Sosten gabe tomuai ḡoro imwa ḡoḡoana ram dalvusia lolmatan imwan harahara. Take ginau gea mwa hav lol te hantai binihiva non Kalio n̄an haḡea.

¹⁸Pol mwa dogo Korin mai ira binihimwasigi huri gubwen̄ ivusi, ataguna kea mwa mwalue ninira la waḡa vwate mai Avkila i Prisila vai Siria. Amua mwa siv mwalue nin Ken̄kria ram bal iluna huri tatauleo garagusi gabe nu laia.

¹⁹I mahavana be ram botu Ivisas Pol mwa derai Prisila mai Avkila. Kea mwa bano vai lol imwa tataro mwa haḡo ḡoḡoana ram biavo avo mai ira Jius.

²⁰Haḡe sinombu ram hudalinia be vi togo maira vain̄ava, take mwa hav dame tehe.

²¹I mahavana be mwa mwalue mwa bevea lalai nira be, “Be binihiva gea doroniva non God, nav tabagilu mulei huri kimiu.” Haḡe mwa mwalue dagai la waḡa vwate nin Ivisas.

²²Haḡe mahavana be mwa botu Sisaria kea mwa hae vai Jerusalem mwa ḡita sera ira binihimwasigi, i mwa siv vano vai Antiok.

²³Ataguna be mwa dogo huri mahavana vwelvwele aia, kea mwa mwalue i mwa ban sivi utuhin Kelesia mai Vrijia, mwa av dura ira binihimwasigi duluai.

²⁴Lol mahavana gea Jiu vwate ihana Apolos, gabe nu vora Aleksandria, mwa mai vai Ivisas. I kea atat muramura lol non avoana i nu vavtutu lol non binihiva huri rav rava sabuga.

²⁵Kea nu vagahi vatuvwai ana huri Halan Ratahigi, haḡe gin non samwarana non avoana i non silo vagahi nu vavtutu maragai huri halan Jisas. Take kea nu ilo garuhisabuga non Jon n̄ano.

²⁶I kea mwa dau bwatuna mwa av wasi lol non avoana alolon imwa tataro. Haḡe mahavana be Prisila mai Avkila ramuru ron̄ dumwia, ramuru lai dagainia vai la imwara, i aia ramuru bev tavuhai halana lalainia huri halan God.

²⁷Apolos mwa binihia be vi vano vai Akaea, i kunia ira binihimwasigi ata Ivisas ram binihia be rav buluia ba rav letasi lalainira binihimwasigi ata Akaea, be rav laiḡoḡoe. I mahavana be mwa botu mwa bului tavuhai ira binihimwasigi gabe sivi hogoi non God.

²⁸Bwatuna be gin non vigaigaian wasi nu haravira ira Jius lol ḡoḡoan bulbulu, i bwatuna be kea mwa bev seserai tavuhai nia be, avoana ata lol Baebol mwa bev melmeloinia be Jisas kea Kraes.