Read Hano Lalaḡova 2 Bible Online

Lalaḡova 2 - Hano bible

Lalaḡova 2

¹Mahavana be mwa botui gubwen̄in Vui Sabuga, ira binihimwasigi duluai ram ḡoḡo ute gaituvwa.

²Haḡe darihou n̄an silo gaivua nin mahao mwa datan̄i kun gabe lan̄ wasi mwa here, haḡe mwa hogon bamasiri lolon imwa duluai gea be ram du alolona.

³Haḡe ran gita ginau kun gabe memean gabi tabwalue mwa lon̄ahi ute, i vataha atatu alolora gea mwa leahi lol non binihiva gin avoan dodolua.

⁴Haḡe kera duluai ram masiri gin Vui Sabuga, i ram dau bwatuna ram avo gin avoan dodolua, kun gabe Vui Sabuga mwa lolira be rav avo.

⁵Haḡe ira Jius ran tu Jerusalem, atatun tataro kera geki ran mai vataha bwatutun vanua la ureure.

⁶I mahavana be, ram ron̄ silo geki, vatugin sinombu gaivua duluai ram ḡoḡo bulbulu. I kera duluai ram samwara maragai, bwatuna be vataha atatu mwa ron̄ ira binihimwasigi be ram avo la mwasin nora avoana.

⁷I kera duluai ram dan̄an̄a gaivua gin binihi lalan̄a ram haharigi amare ram bevea be, “Atatu kera geki ram avo kungeki kera n̄an ata Kalili!

⁸Matu ke kunhanigi, be gida duluai teti tam ron̄ora ram avo la mwasin nonda avoana ata la vanuanda?

⁹Gida ata Patia, Media mai Elam, nin Mesopotamia, Judia, Kapadosia, nin Pontus mai Esia,

¹⁰nin Vrijia i Pamvilia, nin Ijip mai udun Libia sosori Sairini, kamai rituai ata Rom,

¹¹ira Jius mai ira Lolobon̄i mwa lai ḡoḡora duluai ute gaituvwa, i tavalumai kera ata Krit mai Arabia, take kamai duluai gam ron̄ora be ram avo la mwasin nomai avoana huri ginau gaivua be God nu lolia!”

¹²Haḡe ram dan̄an̄a gin binihiv lalan̄aga, ram hudaltalinira sibora ram bevea be, “Matu ke! Havanau geki?”

¹³Take kera rituai ram lol sovui ira binihimwasigi ram bevea be, “Kera geki ram mwin wai taltale.”

¹⁴Haḡe Pita mwa du amare, kea mai ira hala han̄vul domwan gaituvwa, mwa dau bwatuna mwa avo lalai sinombu gin silo gaivua mwa bevea be, “Kimiu ira Jius i kimiu duluai gabe gim dogo Jerusalem, giv roron̄taiau i nai vev ginau duluai geki lalai kimiu be kunia.

¹⁵Sinombu kerageki ram hav mwin te wai taltale, kun gabe gim bevea, mwa siv vora alo gaisivo mabon̄i.”

¹⁶Take geki ginau gabe atatun vevsera Joel nu vevea huria mwa bevea be,

¹⁷God mwa bevea be, “La nogonan gubwen̄ nav salil noḡu Vui Sabuga alun atatu duluai. I ira nitumiu atamwani mai ira vavine rav seserai noḡu roroi. Ira nitumiu mwalmwalaḡelo rav hueri, i nomiu bwatmetua rav gita maturubore.

¹⁸Mwasigi noḡu atatun rovoga mulei atamwani mai ira vavine, nav salil noḡu Vui Sabuga lol gubwen̄i, kera gea i rav seserai lua noḡu roroi.

¹⁹I nav lol tagaro lol mahao amare i ginau dan̄an̄a lol ureure ataa. I aia vivora daga, gabi mai ahu dodoga;

²⁰i alo vi metoga, i vula vi vogi vi memea kun daga, vuvuri gubwen̄ samsamwara i gubwen̄ tavuha non Ratahigi gim siv mai.

²¹Haḡe ihei tehe vi lua huri Ratahigi vi rahu.”

²²“Kimiu ira Jius, giv roron̄tai avoana geki! Jisas ata Nasaret, kea atatu gabe God nu lol seserainia lalai kimiu huba be kea sibona nu horae. God nu lol seserai ginau geki gin tagaro i dovon̄a i ginau dan̄an̄a gea be God nu lai muramura lalainia be vi lolia lalai kimiu.

²³Gin mwasin non taritari, God nu vinihi daua be Jisas vi lin̄ia lalai kimiu, i gim wehia ginia be gim lin̄ia la limara atat bwatigoro ram bohae vai alun volovolo.”

²⁴Take God nu lol domarei muleinia nin mateana, i mwa ribwesia gin non muramura, bwatuna be mateanana sihav rihu te maragai ninia.

²⁵Bwatuna be Deved nu vevea huria, mwa bevea be, “Nam ḡita Ratahigi, kea bul maiau vataha mahavana, kea sosoriau i nasav matagu tehe.

²⁶Haḡe kunia nam masiri gin samwarana, i noḡu avoana ran masiri lol samwarana. I mwasigi be inau atatu vuroi n̄an, take noḡu doronhohov mwa du wasigi,

²⁷bwatuna be gosav derai te dum atmateku vi togo lol ureure nin ira atat mate; i gosav lin̄ te dum nom atatun rovoga binihimwasigi be rav boboga lol bwaru.”

²⁸Giḡo gon huhui matanhala lalaiau huri rahuana, i giḡo maiau, nav samwara gin samwarana.

²⁹“Ira tuaku, nai vev didininia lalai kimiu huri tamanda Ratahigi Lavoa Deved. Kea nu mate ran tavinia i bwaruna mwa en teti mai gida vai votu garigi.

³⁰Kea atatun vevsera, i nu ilo hano gabe God nu tatauleo lalainia huria. God nu lol tatauleo garagusi vwate lalainia be vi lol ata la varan Deved vwate vivora Ratahigi Lavoa, kun Deved sibona.”

³¹Deved nu gita ginau vwate be vi visirai i mwa avo mwa bevea be, Mahavana be mwa bevea be, “God sihav lin̄ te rebehin vui be vi togo lol rebehira gabe ran mate, rebehina sihav boni tehe be men boboga, kea mwa avo huri Wani Vurai gea, gabe kea nu tomare mulei nin mateana.”

³²God nu lol barahu wani gea Jisas huba nin mateana, i kamai duluai haḡe gam seserai luae huri ginau gea.

³³God nu lol domareinia vai amare huba, be vi togo la mwatuana. God Tamanda nu lai Vui Sabuga lalainia huba, kun gabe nu tatauleo huba huria lalainia tuai. I ginau duluai gea be gim du gim ḡitae, i gim ron̄oe, kea rovoga non Vui Sabuga duluai gabe Jisas mwa laia lalai kamai.

³⁴Deved gea, nu hav hae tehe lol ute atamare, take kea mahaḡea nu vev avoana gea be, God holomare hae mwa bevea lalai noḡu Ratahigi be: Gov togo la mwatuaku huriniau, ba hohovi.

³⁵Nav tau nom ivwalu kun gabe tanon vavarahin bwalagemwa.

³⁶“Haḡe sinombu duluai ira Jius rav iloe mwasigi be, Jisas geki gabe gin vohae vai alun volovolo, kea mwasigi atatu gabe God nu taua, Ratahigi i Wani Vurai.”

³⁷Mahavana be sinombu ram ron̄ avoana geki nora binihiva mwa lalan̄aga maragai ram bevea lalai Pita mai ira hala rituai, ram bevea be, “Ira tua tav lol hano?”

³⁸Haḡe Pita mwa bwaliura mwa bevea lalainira be, “Vatvataha atatu nin kimiu duluai vi vinihi leahi nin vurona duluai i vi lai garuhisabuga lol ihan Jisas Kraes Wani Vurai, huri be vuromiu duluai vi binihi kaburaiana, i giv lai hogoi non God, Vui Sabuga.

³⁹Bwatuna be hogoi non God, nu loli lalai kimiu mai ira nitumiu, i lalai ira hei gabe ram dogo hautu i kera duluai gabe Ratahigi nonda God mwa uloi nira huria.”

⁴⁰Haḡe Pita mwa avo lalainira alun mwasigi gin avoana wasi mwa bevea lalainira be, “Giv hiḡe rahuana sibomiu nin silo vevegi be mwa hivo alun atat hantai kera geki.”

⁴¹I kera ivusi ram binihimwasigi avoana geki i ram lai garuhisabuga, kera duluai kun vasan̄vul vatolu mwa lai ḡoḡora ute gaituvwa lol gubwen̄i gea.

⁴²Haḡe kera ram huhui ginau duluai geki nin ira hala, i ram bulu ute gaituvwa lol mahavan gina ganiana i tataro.

⁴³Ira hala ram lol ginau dan̄an̄a ivusi i tagaro ivusi maragai, i kera duluai ram matagu maragai.

⁴⁴Haḡe ira binihimwasigi ram bulbulu rahurahu lol alen̄ara i ram hara bilin̄ai nora vataha ginau batvatahara.

⁴⁵Ram salei nora vataha ginau vuvuri ram lai homu ram harae batvatahara gaitutuvwai.

⁴⁶Vataha gubwen̄i ram ḡoḡo ute gaituvwa vataha tatan̄ana lol Imwa Tataro, i ram ḡan gara ginau ute gaituvwa lol imwara gin samwarana i lolo tavuha,

⁴⁷ram lol roroai God, ram bulu mai nora samwarana la doroniva non sinombu. Haḡe vataha gubwen̄i Ratahigi mwa hara atatu rituai buluira la vatugi gaituvwa ira hei gabe ran rahu.