Read Hano Lalaḡova 20 Bible Online

Lalaḡova 20 - Hano bible

Lalaḡova 20

¹Haḡe ataguna be avoana mwa hivo ata, Pol mwa uloi ira binihimwasigi ute gaituvwa mwa bev non vitulei lalainira i mwa av durara. Haḡe mwa derainira mwa bano vai Masedonia.

²I kea mwa bano lol ute ivusi i mwa av dura sinombu alun avoana ivusi. Vuvuri mwa mai vai Akaia,

³i mwa dogo aia huri vula gaitolu. Kea mwa lol vatuvwai be vi vano vai Siria i mwa habwea be ira Jius ram binihia be rav wehia; i kunia mwa binihia be vi vano mulei vai Masedonia.

⁴Haḡe Sopata, gabe nitun Berehas nin vanua Perea kea mulei mwa bano bul maia; i kera gaivua mulei nin Tesalonaeka ramuru huria Aristaikas mai Sekandas; Kaias nin Debe; Taikikas mai Trovimas nin ute vwate Esia; mai Timoti.

⁵Kera geki ram ban dotomua ram hohov kamai Troas.

⁶Gam mwalue la waḡa nin Vilipae atagun Samsamwaran Bereti Vatuga, haḡe gubwen̄ gailima ataguna gam botui nira la vanua Troas, i gam dogo aia wik gaituvwa.

⁷La Sarere ute ravravi gam ḡoḡo ute gaituvwa huri gina ganian bulbulu. Haḡe vi rani Pol gim bano, i kunia kea mwa avo mai sinombu ute ravravi vaivotu abobon bon̄i.

⁸Haḡe kandel ivusi lol vwavwan imwa be gam ḡoḡo aia.

⁹Take mwalaḡelo vwate ihana Iutikas mwa dogo la windo, i mahavana be Pol mwa avo vain̄ava mwa ban abobon bon̄i. Iutikas mwa daibwatihi mwa maturu maragai vaivotu be mwa hovi nin gaitolun rum amare mwa hiv mwa bora lol tano. Haḡe ram lai luae, take nu mate huba.

¹⁰Take Pol mwa hivo mwa sara bolvolo aluna mwa avin̄ai wasinia, mwa bevea be, “Gisav ron̄ te mwahantai, kea mwa rahu radu!”

¹¹Haḡe kea mwa hae mulei lol vwavwan imwa amare, mwa biha bereti mwa ḡania. Haḡe mwa avo maira vaivotu alo mwa hae, kea mwa siv vano ninira.

¹²Kera ram lai mulei mwalaḡelo gea vai la vanua ara, mwa rahu huba, i kera ram ron̄ mwa davuha maragai huria.

¹³Haḡe gam bano la waḡa vwate vai la vanua Asos, huri be gav lai Pol aia, kea nu vano aute.

¹⁴I mahavana be mwa habwe kamai Asos, gam laia la waḡa gam bano vai Mitilin.

¹⁵Haḡe gam mwalue nin aia, i mwa rani gam siv votu la vanua Kios. I gubwen̄i rituai ataguna, gam mai vai la vanua Samos, i mwa rani ataguna gam siv votu la vanua Miletas.

¹⁶Pol mwa binihia be vi ḡao avare aben vanua Ivisas, huri be sihav sabwelei te mahavana lol vanua Esia. Kea mwa bilvilehi be vi votu Jerusalem be si dumwi, gim siv vora gubwen̄ Pentikos.

¹⁷Pol mwa hora avoana nin Maelitas vai Ivisas, mwa hudali ira bwatmetua lol uloilua aia be vi gitara.

¹⁸I mahavana be ram botu kea mwa bevea lalainira be, “Gim iloe huri mahavana duluai be nan togo mai kimiu, nin muan gubwen̄i be nan votu lol vanua Esia.

¹⁹Nam lol rovoga kera gea bwatuna be inau atatun rovoga n̄an vuroi non nonda Ratahigi, be binihiḡu mwa do tirigi. I vataha mahavana mataruaku mwa rovo huri kimiu. I vataha mahavana taro lalaiau nu hav tavuha tehe, bwatuna be ira Jius ram dari halana be rav lol hantaiau.

²⁰Gom iloe be nam hav haḡo te dau havanau be vivora buluiana lalainigo, kunia be nam doretore i nam bagahi huria lol ute bulbulu i la imwamiu.

²¹Lalai ira Jius mai ira Lolobon̄i be rav van burigai nin vurora lalai God i rav binihimwasigi alun nonda Ratahigi Jisas.

²²I kadogaha nai vano vai Jerusalem, i nam hav ilo te havanau be vi loli lalaiau aia. Take nam lin̄ian siboku la muramura non Vui Sabuga.

²³Nam iloe n̄ano be lol bwatutun vanua duluai, Vui Sabuga mwa lol bisirainia lalaiau be nav togo lol imwa vauvauhi i nav ron̄ ḡagarasi.

²⁴Take nam binihi rahuku kun be ginau vuroi n̄an vwate lalaiau siboku; ita noḡu doroniva n̄ano be tatan̄an lalaḡova be inau alolona mai noḡu rovoga gabe Ratahigi Jisas nu horau huria vi hara harai, be nav seserai Roroi Tavuha huri hogoi non God.”

²⁵“Nan vano vataha ute duluai abemiu, nam doretore huri Ute Ratahigi non God. I Kadogaha nam iloe be vwate nin kimiu sihav mom ḡita te muleiau.

²⁶Haḡe bwatuna gea nam bev luae lalai kimiu lol gubwen̄ garigi; be ihei tehe vi sala, mwa hav vora te bwatuna inau.

²⁷Huri be nam hav sigi te dum ginau vwate gin kimiu gabe mwa du be nai vevea, take nav seserai ginau duluai gabe God mwa doronia.

²⁸Giv gita ḡoro kimiu sibomiu, i giv gita ḡorora gabe Vui Sabuga nu taura la limamiu. Kimiu giv vora radaiḡoro huri uloilua non God, gabe kea nu lolia huria sibona sivi mateanan Nituna.

²⁹Nam iloe be, la mahavana be nai vano, viriu turu rav mai atagumiu ba ḡan n̄oton̄oto sipsip.

³⁰Tarona vi mai be atatu rituai n̄an mulei alolomiu rav tentene ba domuai letei ira binihimwasigi be rav hurira.

³¹Giv gita ḡoro maragai bwatuna be, nan vagahi kimiu duluai huri taul gaitolu i mataruaku mwa rovo huri kimiu bon̄i i rani.”

³²“I kadogaha nam lin̄ kimiu ta aten muramura non God i gin avoana huri non hogoi, gabe vi lol kimiu giv mauri wasigi, i vi lai lalai kimiu vatavuha God mwa laia huri non sinombu.

³³I nau nam hav doron te vatlegiga non atatu mai vatan̄oga i gaisaga.

³⁴Kimiu sibomiu gim iloe be nam lol rovoga hahavwani gin limaḡu gairua kera geki huri vataha ginau be inau maira be gam lol rovoga ute gaituvwa gam doronia.

³⁵Nam lol seserai hala duluai lalai kimiu huri rovoga hahavwani la hala geki be tav buluira gabe ram rihu holhole, i gin vinihi dum avoana be Ratahigi Jisas Sibona nu vevea be, ‘Samwarana liu huri ginau be gom hogoinia ninia be atatu mwa hogosigo ginia.’ ”

³⁶Mahavana be Pol mwa avo vuvuri, mwa sisiabwau bul maira ram dataro.

³⁷Kera duluai ram dei maragai ram rimrimia i ram bev vitulei lalainia.

³⁸Kera ram ron̄ mwahantai liu bwatuna be nu vevea lalainira be rasav mom ḡita te mulei nai. Haḡe ram hivo bul maia la waḡa.