Read Hano Lalaḡova 22 Bible Online

Lalaḡova 22 - Hano bible

Lalaḡova 22

¹“Ira tuaku mai ira tata, giv ron̄oau mahavana be nam bev lua noḡu avoana lalai kimiu!”

²I mahavana ram ron̄oe be mwa avo lalainira la avoana ata Hibru, ram buhiga ram do ḡoḡonai; i mwa bev rahu rahui nia mwa bevea be:

³“Inau Jiu, nan vora Tasas la vanua Silisia, take nam hamai vai teti Jerusalem bwatuna nan sikul aben Kamaliel. I nan lai silo vagahi wasi alun Silo non ira sibida, i nan lin̄iau siboku lalai God la hala gea kun kimiu n̄au haḡea be gim du teti garigi.

⁴Nan vevegi atatu huri mateana be rau lalaḡo n̄an haḡea kun geki la halan Kraes. Nau haḡo batugehi atamwani mai ira vavine nam daura lol imwa vauvauhi.

⁵Haḡe ira muai Tatoroi maira duluai lol Kansel rai vev dumwia be nam bev mwasigi. Lol mahavana gea nan lai nora letasi be ran ravae lalai ira Jius la vanua Damaskas, i nam bano aia la hala gea be nav haḡo batugehi atatu kera geki ba bauhira gin sen ba lai muleinira vai Jerusalem ba dau silo vevegi alura.”

⁶Pol mwa bevea be, “Mahavana be nam mai sosori vanua Damaskas, abobon alo gigita sarisari mwa himai nin mahao mwa haraviau.

⁷I nam hovi vai lol tano nam ron̄ silo mwa bevea lalaiau be, ‘Sol, Sol! Huri hano gom lol ḡagarasiau?’

⁸‘I nam hudaligi be, Giḡo ihei, Ratahigi? I kea mwa bevea lalaiau be, I nau Jisas ata Nasaret gabe gom lol ḡagarasiau.’

⁹Haḡe atatu be ram huriau ram ḡita gigita, take ram hav ron̄ te dum avoana be mwa avo maiau.

¹⁰I nam hudaligi be, ‘Matu nav lol hano Ratahigi?’ Haḡe Ratahigi mwa bevea lalaiau be, ‘Tomare ba bano vai lol vanua Damaskas, i aia vi vev ginau duluai lalainigo be God mwa doroniva be gov lolia.’

¹¹Haḡe nam matagaraga bwatuna sarisari gigita gaivua, i ira noḡu buluana ran haḡo limaḡu ram domuaiau vai Damaskas.”

¹²“Lol bwatutun vanua gea atatu vwate ihana Ananias, gabe mwa binihimwasigi God maragai i mwa dabe nonda Silo, i ira Jius be ram dogo aia ram binihi marahinia.

¹³Kea nu mai abeku mwa du kunia huriniau mwa bevea be, ‘Tua Sol, gita ute!’ Mahavana gea darihou nam ḡita ute, i nam ḡitae.”

¹⁴Haḡe mwa bevea be, “God non ira sibida mwa uloi luago be gov ilo non binihiva, i be gov gita mwasin non atatun rovoga vavtutu, i be gav ron̄oe sibomwa be vi avo lalainigo gin mwasin silona.

¹⁵Huri be giḡo goi vora gaitura huria ba bev seserainia lalai sinombu duluai huri havanau gabe gon gitae i gon ron̄oe.

¹⁶Matu kadogaha gomom hohovi huri hano? Tomare ba lai garuhisabuga i vi bwaga kaburai vuromwa ginia be gov tataro lalainia.”

¹⁷“Nam dabagilu mulei vai Jerusalem, i mahavana be Nam dataro lol imwa Tataro,

¹⁸i Nam hueri, Ratahigi mwa bevea lalaiau be, ‘Goi vilvilehi ba mwalue nin Jerusalem bwatuna be sinombu aia rasav dara tehe alun nom avoan dura huriau.’

¹⁹I nam bwaliua be, ‘Ratahigi,’ ‘Ram ilo didininia be nan vano lol imwa tataro nam haḡo batugehira i nam wehira gabe ram binihimwasiginigo.

²⁰I mahavana be Stivin nom gaitura ram wehi bamatea, inau siboku aia i nan gita didinigi mateanana, i nan gita ḡoro gaisagara be ran wehia.’

²¹Ratahigi mwa bevea lalaiau be ‘Vano,’ bwatuna Inau nav horago vai hautu huri ira Lolobon̄i.”

²²Haḡe sinombu ram roron̄tai Pol vaivotu mwa bev hara harai non avoana; take ataguna ram dau bwatuna ram haharigi ram bato amare ram bevea be, “Gin lai dagainia! Ba wehi bamatea! Nuhav tavuha tehe be vi mom dogo!”

²³Haḡe ram bwegu ram haharigi ram bulbulai gaisagara vai amare i ram ḡaburai taniavu vai amare.

²⁴Haḡe tomuai ḡoro atatun bwaloana non ira ata Rom mwa dau leoi non atatu be rav lai Pol vai alolon vwavwan imwa wasi, haḡe mwa bevea be rav talvusia huri be ramen habwe seserai be huri hano ira Jius ram bwegu i ram haharigi amare kungeki vai aluna.

²⁵Take mahavana be ram bauhi batugehia be rav talvusia. Pol mwa bevea lalai tomuai be mwa du aia ḡorora be, “Mwa du alun silo lalainigo be gov wehi atatu be mwa dogo aten vilak ata Rom, be mwa hav lolian te ron̄o radu huri hava te vahalana hantai?”

²⁶I mahavana be tomuai mwa ron̄ avoana geki mwa bano vai aben tomuai ḡoro atatun bwaloana mwa hudalinia mwa bevea be, “Gom lol havanau? Wani gea mwa dogo aten Vilak non ata Rom!”

²⁷Haḡe tomuai ḡoro atatun bwaloana mwa bano vai aben Pol mwa hudalinia mwa bevea be, “Vevea lalaiau be, mwasigi be giḡo gom dogo aten Vilak ata Rom?” Pol mwa bwaliua be, “Uwe, mwasigi.”

²⁸Haḡe tomuai ḡoro atatun bwaloana mwa bevea be, “Inau nam bora atatu kunia bwatuna nan volia gin homu gaivua.” Pol mwa bwaliua be, “Take inau nam bora atatu kunia bwatuna be tamaḡu, kea mwa dogo aten Vilak ata Rom.”

²⁹Haḡe darihou n̄an kera be ran tu be rav hudali Pol gin avoan hudaligi ram bis dagai ninia; haḡe tomuai ḡoro atatun bwaloana mwa matagu maragai huri be mwa iloe kadogaha be Pol kea ata Rom, i mulei bwatuna be kea haḡe nu vauhi Pol gin Sen.

³⁰Haḡe tomuai ḡoro atatun bwaloana mwa doron be vi habwe lua mwasigi alun havanau be ira Jius ram bevegi Pol aluna, i mwa rani kea mwa lai lua sen nin liman Pol i mwa bevea lalai ira muai tataroi mai ira kansel duluai be rav ḡoḡo. Haḡe kea mwa lai Pol mwa daria lol matara duluai.