Read Hano Lalaḡova 25 Bible Online

Lalaḡova 25 - Hano bible

Lalaḡova 25

¹Gubwen̄ gaitolu ataguna be Vestas mwa lai tanon tomuai, kea mwa mwalue nin Sisaria vai Jerusalem,

²i aia ira muai tataroi mai ira tomuai non ira Jius ram bevegi Pol gin tenteneana. Ram hudali Vestas be

³vi buluira vi derai Pol rav laia vai Jerusalem, huri be ran tau avoana be rav wehia ḡoro hala.

⁴Take Vestas mwa bwaliura mwa bevea be, “Pol mwa dogo lol imwa vauvauhi la vanua Sisaria, i inau siboku nav tabagilu mulei vai aia darihou n̄ano.

⁵Giv mahin̄ai nomiu tomuai rav hae vai Sisaria bul maiau ba bev te avoana be ran habwea vai aluna, mandevai nu lol te ginau hantai vwate.”

⁶Vestas mwa dogo radu huri gubwen̄ gaivwelu mwa botu han̄vulu radu bul maira vuvuri mwa siv hae vai Sisaria. Haḡe mwa rani kea mwa domahuri lol tanon vevev i mwa hudaligi be rav lai haroroi Pol huri vevev.

⁷Haḡe mahavana be Pol mwa haroro, ira Jius gabe ram mai nin Jerusalem ram du dalisia ram dau bwatuna ram dau avoan wasi vai aluna, gabe nuhav vavtutu tehe be vi harana.

⁸Take Pol mwa avo huria sibona mwa bevea be: “Nam hav lol te bahal ginau vwate alun Silo non ira Jius, sage vai alun imwa Tataro sage vai alun Ratahigi ata Rom.”

⁹Take Vestas mwa doron be ira Jius ramen binihi tavuhainia, i kunia mwa hudali Pol mwa bevea be, “Matu gom samsamwara be goi vano vai Jerusalem huri be nai vevegi nom avoana aia alun ginau kera geki?”

¹⁰Pol mwa bevea be, “Noḡu avoana Ratahigi sibona vi vevegia. Nau hav lol te ginau vahala vwate lalai ira Jius, i giḡo gom ilo didininia sibomwa.

¹¹Take be nam lol salil silo, i nam lol ginau hantai be nu dadariha be nai mate la nogonana, nam hav hudaligi tehe be nav rov maragai ninia. Take be mwasigi sigai huri vevegi be rav taua vai aluku, kunia atatu sigai be vi lin̄iau lalainira. Inau nav hudaligi mulei Ratahigi n̄an vi vevegi noḡu avoana.”

¹²Haḡe Vestas mwa avo vuvuri lalainira non gaitura, mwa bevea be, “Giḡo gom doron be goi van ba ḡita Sisa, i kea nu tavuha n̄ano.”

¹³Atagun gubwen̄i rituai be nu nogo huba, Ratahigi Lavoa mai Benis ramuru mai vai Sisaria be raru vi gita Vestas.

¹⁴Haḡe ram dogo aia huri gubwen̄i rituai, Vestas mwa bev halan rahun Pol lalai ratahigi lavoa mwa bevea be; “Atatu geki be Vilikis nu taua lol imwa vauvauhi;

¹⁵i mahavana be nam bano vai Jerusalem, ira muai tataroi non ira Jius mai ira bwat metua ram dul avoana vai aluna i ram hudaliau be nai vevegia.

¹⁶Take nam bev luae lalainira be, ‘Mwa hav vora te alen̄amai ata Rom be gav lin̄ atatu vi vano n̄an kunia la limara be ram dul avoana vai aluna. Muana mwa du be vi tu lolmatan non ivwalu, i vi lai mahavana lalainia be vi lai non avoana kun nora avoana.

¹⁷I mahavana be ram mai teti nam lol rovoga vilvilehi maragai, i mwa rani nam domahuri lol tanon ḡoḡoana i nam hudaligi be rav lai atatu gea vi haroro.

¹⁸Haḡe non ivwalu ram du amare, take ram hav tul te avoana vai aluna huri vahalan hantai vwate be inau nam binihia be si vora kunia.’

¹⁹Take avoana ram avo aluna huria n̄an be Pol nu vigaigai maira huri nora binihimwasigi alun God, i huri atatu be Jisas, gabe nu mate, take Pol mwa bevea be kea nu rahu.

²⁰Nam hav ilo te maragai halana n̄an haḡea huri ginau geki, i bwatuna gea nam hudali Pol be kea mwa samsamwara huria be vi vano vai Jerusalem huri be nan vevegi non avoana aia alun ginau kera geki.

²¹Take Pol mwa hudaligi mulei be ratahigi n̄an vi vevegi non avoana i kea vi togo aten gitaḡoro. Haḡe bwatuna gea nam dau avoana be vi gitan ḡoro vaivotu be nav horae huri Ratahigi Lavoa.”

²²Haḡe Akiriba mwa bevea lalai Vestas be, “Nam doron be nav roron̄tai wani geki siboku.” Haḡe Vestas mwa bwaliua be, “Gov roron̄tainia vaigogo.”

²³Haḡe mwa rani, Ratahigi Lavoa Akiriba mai Benis ramuru mai vai lol ute be raru men roron̄tai avoana non atatu aia. Haḡe ira tomuai non ira atatun bwaloana, i ira atat lalavoa rituai aia ram lol samsamwarai Ratahigi lavoa hurin silon vanuara. Haḡe Vestas mwa bevea lalai non atatu be rav lai Pol vi haroro.

²⁴Haḡe Vestas mwa bevea be. “Ratahigi Lavoa Akiriba maira duluai be ram dogo teti uhu gaha mai gida: Gin gita wani geki gabe ira Jius duluai gabe ram du teti mai Jerusalem ran tau avoana huria lalaiau. Kera duluai ram haharigi i ram bato amare ram bevea be, sihav mom dogo tehe take vi mate.

²⁵Take nam hav habwe te ginau hantai vwate be nu lolia, huria be vi vevegi bamatea aluna. I mahavana be kea sibona mwa hudaligi mulei be Ratahigi Lavoa n̄an vi vevegia, i nam binihia be nav horae.

²⁶Take nasav vev te dum avoana vwate be nu dadariha aluna sa non lalaḡova lalai Ratahigi Lavoa. Haḡe bwatuna gea nam laia vai teti abemiu i liu hage giḡo Ratahigi Lavoa Akiriba! huri be ataguna be gov tau vuvuri non avoana ta ginau abena be nav ravae.

²⁷Huri be nam ḡitae be nu vahala lalaiau huri be namen hora atatu vwate vai lol imwa vauvauhi vuroi kunia be avoan melmelo vwate sigai huria be vi vevegia.”