Read Hano Lalaḡova 26 Bible Online

Lalaḡova 26 - Hano bible

Lalaḡova 26

¹Akiriba mwa bevea lalai Pol be, “Nu tavuha be gov avo hurigo sibomwa kadogaha.” Haḡe Pol mwa hagai limana amare mwa bevea be:

²“Ratahigi Lavoa Akiriba! Inau nam binihia be nu tavuha maragai lalaiau garigi huri be namen tu lol matamwa sibomwa ba avo huri ginau duluai be ira Jius ram bevegiau huria,

³i giḡo sibomwa gom ilo tavuhai silon vanuan ira Jius mai vigaigaiana. Nam hudalinigo be gov roron̄tai gin ron̄mwan̄ava.”

⁴“Ira Jius duluai ram ilo tavuhai rahuku, nu tau bwatuna be inau mwalaḡelo vaivotu garigi. Kera ram ilo didini rahuku kun hanigi nan togo lol rahuku duluai, take la bwativuna la mwasin vanuaḡu i la vanua Jerusalem.

⁵Kera ram iloe huba i rai vev dumwia be mwasigi bwatuna be mahavana be inau naturigi radu nan togo lol tata n̄an binihimwasigi gea be ira Varise.

⁶I kadogaha nam du teti huri vevegi bwatuna be nam dau noḡu doronhohov mwa du alun tatauleo non God lalai ira sibida,

⁷i geki ginau n̄an haḡe gea be varan sinombu han̄vul domwan gairua ran hohovi be rav laia, mahavana be ran gogonai God bon̄i i rani, nora doronhohov nu tu aluna be rav laia, Ratahigi Lavoa Akiriba, bwatuna be inau nam dau noḡu doronhohov mwa du kunia, ira Jius ram hiḡe vahalana aluku!

⁸Huri hano kimiu be gim dogo teti kadogaha gim hav binihi te mwasigi be God nu lol domarei atatu mwa rahu nin mateana?”

⁹“Tuai gea, inau nan gitae be nu vavtutu be nav lol ginau be nu vavtutu be vi tuḡoro ihan ata Nasaret gea Jisas.

¹⁰Geki ginau be nan lolia lol vanua Jerusalem. Nan lai roron̄o liu ira muai tataroi i nan tau sinombu non God ivusi lol imwa vauvauhi; i mahavana be mwa bevegira huri mateana, inau mulei nam dame huria.

¹¹Vaivusi nan vevegira lol imwa tataro gaivua, i nan lol ron̄ora be rav tugu nora binihimwasigi garagusi. Nan lol horoi maragainira, i nam bano vai lol bwatutun vanua dodolua be namen lol ḡagarasira.”

¹²“Bwatuna geki ira muai tataroi ran lai roron̄o i muramura lalaiau be nai vano vai Damaskas.

¹³Ratahigi Lavoa Akiriba, ginau geki nu loli la hal gaivua vai Damaskas, nan gita sarisari gaivua nu sarisari liu sarisarin alo, mwa himai nin mahao mwa sarisari dalisiau maira be ram huriau.

¹⁴Kamai duluai gam hovi vai lol tano, i nam ron̄ silo mwa avo lalaiau la avoana ata Hibru be, Sol, Sol! Huri hano gom loliau kun geki? Gom lol hantainigo sibomwa, giḡo kun buluki be ram wehia mwa ḡari gai be ram wehia ginia?

¹⁵I nam hudaligi be, ‘Giḡo ihei Ratahigi?’ Haḡe Ratahigi mwa bevea be ‘Inau Jisas be gom lol bonogaiau.’

¹⁶Take gov tomare ba du amare. Nam bisirai lalainigo huri be nav uloi luago gi noḡu atatun rovoga. I giḡo haḡea goi vev luae lalai atatu huri noḡu visiraiana lalainigo garigi i havanau gabe nav seserainigo huri ginau be vi mai atagu.

¹⁷Inau nav lol bisirainigo lalai sinombu ata Israel; lalai ira Lolobon̄i gabe nav horago vai alolora.”

¹⁸“Giḡo haḡea gov havan̄ matara, i gov lai luara nin ute meto vai lol gigita i nin muramura non Setan huri God, huri be gin nora binihimwasigi garagusi aluku vi binihi kaburai vurora i rav lai dum tanora mai ira atat gita lua non God.”

¹⁹“Haḡe kunia, Ratahigi Lavoa Akiriba, inau nan hav daha te hueri gabe nu mai lalaiau nin amare.

²⁰Muana Damaskas mai Jerusalem i la vanua Judia duluai mai ira Lolobon̄i, nan toretore be rav binihi leahi nin vurora i rav tabagilu huri God i rav lol ginau be vi gigilainia be rav vinihi leahi.

²¹Bwatuna haḡea geki be ira Jius ram haḡo batugehiau mahavana be inau lol imwa Tataro gaivua, i ram lol ron̄oe be rav wehiau.

²²Take God mwa buluiau, i kunia nam du teti nam lai noḡu avoana lalai sinombu duluai, atatu kolo vaivotu atatu gaivua. I ginau gabe nam bevea kea n̄an haḡea be ira atatun vev sera mai Moses ran vevea be vi loli:

²³be Mesaea vi ron̄ gagarasi, i kea muan atatu be vi tomare nin mateana, be vi seserai gigita huri varahuva lalainira ira Jius mai ira Lolobon̄i.”

²⁴Haḡe mahavana be Pol mwa avo huria sibona kun geki, Vestas mwa haharigi aluna mwa bevea be, “Giḡo taltaleana, Pol! Nom hiḡehiḡe huri iloute gaivua mwa loligo gom daltale!”

²⁵Pol mwa bwaliua be, “Inau nam hav taltale tehe, Ratahigi Lavoa! Inau nam avo gin mwasigi.

²⁶Ratahigi Lavoa Akiriba mwa bevea be! Nav avo lua dum lalainigo bwatuna be giḡo gom ilo didini ginau duluai geki. Nam ilo didininia be gom ilo didinini n̄oto n̄otora, bwatuna be ginau geki mwa hav loli te lol ute dahuligi vwate.

²⁷Ratahigi Lavoa Akiriba, matu gom binihimwasigi alun ira atatun vevsera? Nam ilo didininia be gom binihimwasigi nira!”

²⁸Akiriba mwa bevea lalai Pol be, “Lol mahavana vwelvwele tiri geki gom doron be gov loliau nai vora atatun uloilua?”

²⁹Pol mwa bwaliua mwa bevea be, “Mahavana vwelvwele sage n̄ava, take noḡu tataro lalai God be giḡo i kimiu duluai gabe gim roron̄taiau garigi giv vora kuniau, i nam hav doron tehe be giv vora atat vauvauhi!”

³⁰La mahavana gea Lavoa gea mai tomuai ata lol Kavman, mai Benis mai atatu dodolua mulei be ran tu, ram domare,

³¹ram bano, i ram avo mwa ginginira sibora ram bevea be, wani gea nu hav lol te ginau hantai vwate huri be nu dadariha be vi mate sage vi vauhi huria.

³²Haḡe Akiriba mwa bevea lalai Vestas be, mwa ḡitana be wani geki sihav lai te non avoana lalai Ratahigi Lavoa, nu tavuha be tav derai nia.