Read Hano Lalaḡova 27 Bible Online

Lalaḡova 27 - Hano bible

Lalaḡova 27

¹Haḡe mahavana be ram dau avoana be gai vano vai Itali, ram dau Pol maira rituai be ram dogo lol imwa vauvauhi la liman tomuai ḡoro atatun bwaloana vwate ihana Julias. Kea tomuai ḡoro atatun bwaloana vudolua be ram uloinia be, “Vatugigi non tomuai Kavman.”

²Haḡe waḡa vwate mwa mwalue nin Adramitiam mwa mai, i mwa du be vi mwalue ba bano vai lol vanua Esia. I gam bano alun waḡa gea. Haḡe ata Masedonia vwate bul mai kamai tanona Tesalonaeka kea ihana Aristakas.

³Haḡe mwa rani gam botu la vanua Saidon. Julias mwa davuha mai Pol i mwa lin̄ia be vi hivo vi gitara non buluana huri be rav lai te dum hano be mwa doronia lalainia.

⁴I gam mwalue nin aia mulei, take bwatuna be lan̄i mwa here son̄tai kamai, kunia gam bano haltavalun vanua gea Saipras, la tahi mate.

⁵I gam bano bora sinen tahi Silisia mai Pamvilia i gam botui ute Maera la vanua Lisia.

⁶Haḡe tomuai ḡoro atatun bwaloan mwa habwe waḡa vwate ata Aleksandria be vi vano vai Itali, i mwa dau kamai aluna.

⁷I kunia gam rovo ḡoḡonai huri gubwen̄i ivusi. Haḡe waḡa mwa lago dedeorai kunia vaivotu gam mai avare nin vanua Nidas. Kadogaha lan̄i mwa here wasigi ḡoro kamai i gam hav hae te dum aute. Haḡe gam rovo huri vanua Krit. I gam liliu la hin̄oi gaivua gea ihana Salmon. Kadogaha gam rovo haltavalun vanua gea,

⁸gam dogo sosori gin ute aute, take mwa hantai radu lalai kamai. Haḡe gam botui ute ram uloinia be Vwavwanhao Tavuha, sosori gin bwatutun vanua Lasea.

⁹Gam du lol ute gea vain̄ava vaivotu mwa hantai maragai ḡoro kamai be gasav mwalue te dumwi, bwatuna be taron siritano. Haḡe Pol mwa bev sera avoana geki lalainira mwa bevea be:

¹⁰“Kimiu, nam ḡitae be vi hantai maragai la halada geki tam du. I vataha ginau duluai la waḡa rai vano kaburai, mai waḡa geki, i bisata rahun atatu mulei vi nogo.”

¹¹Take tomuai ḡoro atatun bwaloana mwa do mwa roron̄tai kapten ata la waḡa, mai wani gabe wagana gea. I kea mwa hav tai bwero te maragai huri avoana non Pol.

¹²Take vwavwan hao be waḡa gea mwa du aluna nuhav vora te vwavwan hao tavuha huri taron ute hohoga. Bwatuna be taro gea taron siritano. Haḡe bwatuna gea, tavalun sinombu gaivua mwa doron be vi mwalue nin ute gea, vai la vwavwan hao dolua Vinikis be vi dumwi. Geki vwavwan hao dolua vwate la vanua Krit, vwavwan hao gea halan waḡa daldali la n̄olin vanua mai bwatun vanua. I waḡa mwa hili tavuhai alolona lol taron ute hohoga.

¹³Haḡe lan̄i kolo mwa domare nin tavalun vanua, i kera ram binihia be nora taritari rav lol dumwia, haḡe ram rav lua aḡe i ram rav gabani i gam mwalue. Haḡe gam rovo n̄an aute hurin vanua Krit.

¹⁴Haḡe mwa hav vora te n̄ava lan̄i rarasi mwa mwalue mwa bora alun vanua.

¹⁵Haḡe lan̄i mwa bora alumai i mwa ririhai be gav ari burigai waḡa ba vi en bavtutu hurin lan̄i. Haḡe gam dogo kunia lan̄i mwa herei kamai gam bano.

¹⁶Kadogaha gam ḡao lol davolan vanua kolo Koda la n̄olin vanua. I aia gam hen hili kolo, i gam dau tavuhai botu mwa eno. Take atatun rovoga la waḡa ram lol rovoga hahavwani

¹⁷be ramen ram hae aten waḡa ba bauhi waswasinia be waga sihav rihu tehe. Haḡe ram matagu maragai, bwatuna be avare nin vanua Libia, tahi nu hav roro tehe. Kera ram binihia be bisata rav hae dum aute aia. Haḡe bwatuna gea ram lin̄lin̄ gabani mwa himai ata, i lan̄i mwa lai waḡa mwa hae sibona.

¹⁸Haḡe lan̄i gaivua mwa here wasi vaivotu mwa rani ram bohai kakaburai vataha ginau ata la waḡa vai lol tahi.

¹⁹Haḡe mwa rani mulei ram mom bohai kaburai vatahanan waḡa mulei vai lol tahi.

²⁰Huri gubwen̄ ivusi mulei gam hav gita te dum one bon̄i gam hav gita te dum visiu lol mahao. Lan̄ wasi gea mwa here ḡaoḡao, i gam hav tau te nomai doronhohov dum huria n̄an haḡea be gav rahu.

²¹Mahavana mwa n̄ava huba atatu ram hav gan te ginau, Pol mwa du amare mwa bevea be, “Kimiu duluai. Be gis ron̄ noḡu avoana duluai la bwativuna, kunia tasav derai te vanua Krit, i bisata si tavuha liu. I ginau hahantai geki sihav dum te gida, i tasav lol te sabwelei vataha ginau ata la waḡa.

²²Kadogaha nam bevea lalai kimiu be, gisav matagu tehe. Atatu vwate sihav salai te dum rahuna; take waḡa n̄an gaituvwa vi momoga.

²³Bwatuna be kahabon̄i enjel non God be nu horau i nam ḡogonai nia nu visirai abeku,

²⁴mwa bevea be, ‘Pol gosav matagu tehe! Take goi vano ba du lolmatan Sisa. I God mwa samsamwara be vi varahu rahura be gim lago bulu.’

²⁵Haḡe bwatuna gea, kimiu duluai gisav matagu tehe. Inau nam binihimwasigi alun God, be ginau duluai vi visirai kun gabe enjel nu vevea lalaiau.

²⁶Take muana lan̄i geki vi herei waḡada vaivotu be vi hae vai aute la vanua vwate.”

²⁷Bon̄in lan̄i han̄vulu domwan gaivasi gam lago dadaligi kunia lol mahavan tahi gaivua mwa uloinia be tahi Mediterenian. Haḡe abobon bon̄i ata la waḡa ram binihia be gam sosori gin vanua.

²⁸Haḡe ram bohai gao mai marahina ram dov teten tahi ram habwea be teten tahi n̄avan n̄avul gairua; tiri ḡalia n̄an ram lol muleinia kunia take n̄avan n̄avul gairua radu.

²⁹Haḡe kunia ram matagu maragai bereva waḡa gim hae la garoi vatu, kunia ram lin̄ aḡe gaivasi mulei atagu, i ram dataro huri be ute men rani.

³⁰Haḡe atatun waḡa ram lol ron̄oe be ramen romaragai nin waḡa; haḡe ram lin̄ botu hurin lolmatan waḡa i ram lol denteneinia kun be ramen lin̄ aḡe mulei rituai la lolmatan waḡa.

³¹Take Pol mwa bevea lalai tomuai ḡoro atatun bwaloana mai ira atatun bwaloana be, “Ira atatun rovoga ata la waḡa be rasav togo tehe la waga, gisav rahu tehe.”

³²Haḡe ira atatun bwaloana ram dara n̄andu gaon botu i ram derainia mwa bano.

³³Amua bwatun tahi mwa siv magorosi Pol mwa bevea lalainira be rav gan ginau: mwa bevea lalainira be, “Gim dogo huri gubwen̄ han̄vulu domwan gaivasi kadogaha, i mahavan n̄ava duluai gea gim hav gan te ginau.

³⁴Nam bevea lalai kimiu kadogaha be giv gan ginau, be gim doron be giv rahu. Nam bev mwasigi be ilu vwate nin bwatumiu sihav mwalue tehe.”

³⁵Atagun avoana geki Pol mwa lai bereti rituai mwa lai avkari lalai God huria la lol matara, mwa biha borae, i mwa dau bwatuna mwa gania.

³⁶Haḡe binihira mwa wasi, i kera duluai ram ḡan ginau.

³⁷Kamai duluai be gam dogo lol waḡa vudolu varua vena n̄avul gaibitu domwan gaiono.

³⁸Ataguna be ram ḡan ginau vava ram ḡubwa, ram lai lua bakin vulaoa ram bohai kaburainira vai lol tahi huri be waḡa vi en n̄an vuroi kunia.

³⁹Mahavana be mwa ran mabon̄i, ira atatun rovoga ata la waḡa ram hav ilo te vwavwan hao gea take ram ḡita batoi rurun̄a mai one i ram binihia be si dumwi waga si hae aute dum aia.

⁴⁰Haḡe ram dara n̄andu ira aḡe i ram dataruru aia, i ram dugu gao be mwa haḡo batugehi sitia. Haḡe ram rav domarei gabani lolmatan waḡa, huri be lan̄i vi herei waḡa i gav rovo rahurahu vai aute.

⁴¹Take waḡa mwa son̄tainia lol one i mwa du mwa malin̄i dedeorai; haḡe lolmatan waḡa nu ḡata lol one i mwa hav rihu tehe dumwi, i mahavana gea navo mwa momogai hantai boron waga.

⁴²Haḡe ira atatun rovoga ata la waḡa ram daritari be rai wehi kaburainira be ram dogo aten gao vauvauhi huria be kera rav ḡari vai aute ba rov maragai.

⁴³Take nora tomuai mwa doron be vi varahu Pol, i kunia mwa du ḡoro nora binihiva. Take mwa bevea lalai atatu be ram ḡari dumwi be rav burere vai lol tahi ba ḡari vai aute.

⁴⁴Haḡe mwa bevea lalai atat dodolua be rav haḡo buli sage tavihen waḡa vwate be nu mavora huba, vuvuri rav hamai atagu. I la hala gea kamai duluai gam botu dum lol one, I atatu vwate mwa hav mate tehe.