Read Hano Lalaḡova 3 Bible Online

Lalaḡova 3 - Hano bible

Lalaḡova 3

¹Gubwen̄ vwate la alo gaitolu atagun bobon alo. Pita mai Jon ramuru bano be raru men tataro la mahavan tarona.

²Haḡe aia atatu vwate mwa luḡu huri rahuna duluai, mwa dogo la Matgatava be nu Hari mwa ulo. Haḡe ram dataloe vataha gubwen̄i vai la matgatava huri be vi ura homu nin sinombu be ram haroro vai lol Imwa Tataro.

³La mahavana be mwa ḡita Pita mai Jon be ramuru haroro, mwa hudaligi be raru vi lai te ginau lalainia.

⁴Haḡe ramuru ḡita mamaragainia, Pita mwa bevea lalainia be, “Gita kamaru.”

⁵Haḡe mwa ḡitara i binihina be raru vi lai te ginau daga lalainia.

⁶Take Pita mwa bevea lalainia be, “Homu sigai abeku, take nav lai havanau lalainigo gabe noḡu abena, la ihan Jisas Kraes ata Nasaret nam bevea lalainigo be tomare ba lago.”

⁷Haḡe mwa haḡo limana la mwatuana mwa rav domareinia. Haḡe kunia bwalagena mwa wasi dari hou,

⁸i kea mwa burere mwa du wasigi, i mwa dau bwatuna mwa lago dedeorai. Haḡe mwa haroro lol Imwa Tataro bul maira i kea mwa lago mwa burere mwa uloi roron God.

⁹Haḡe sinombu aia ram ḡitae be mwa lago mwa uloi roron God,

¹⁰i mahavana be ram ḡita batoia be kea haḡea uraura gana be nu togo la Matgatava be nu Hari, kera ram dan̄an̄a maragai huri ginau gabe nu loli lalainia.

¹¹Haḡe bwatuna be sinombu ram dan̄an̄a maragai, ram mai aben Pita i Jon lol ute mwa uloinia be malmalun imwan Solomon.

¹²Mahavana be Pita mwa ḡita sinombu, mwa bevea lalainira be, “Kimiu ira Jius, huri hano be gin dan̄an̄a huri ginau geki, i gim ḡita mamaragai kamaru? Matu gim binihia be gamuru lol ginau geki gin nomaru muramura sage nomaru roron̄o sibomaru, gamuru lol wani geki mwa lago.

¹³God non Ebraham, Aisak, Jekob, i God non ira sibida, nu lai mwasin non roron̄o, lalai non atatun rovoga Jisas. Take gim lin̄ia gin roron̄o, i gim bev dagarae lolmatan Paelat, vaivotu ataguna Paelat mwa bihinia be vi ribwesia.

¹⁴Kea nu sabuga i nu vavtutu, take gim bev dagarae, vuvuri gim hudali Paelat be vi ribwes hantain lalaḡo lalai kimiu.

¹⁵Haḡe kunia gim wehi atatu gabe mwa domua huri rahuana, take God mwa lol domareinia atagun mateana, i kamai haḡea gaitura huri ginau geki.

¹⁶Geki Haḡea muramura ata lol ihan Jisas gabe mwa lai muramura lalai luḡu geki. I havanau gabe gim ḡitae i gim iloe mwa loli gin binihimwasigi garagusi lol ihana, gin binihimwasigi garagusi alun Jisas n̄ano be mwa lolia mwa rahu kun gabe gim ḡitae kadogaha.”

¹⁷“Ira tuaku, nam iloe be havanau gabe kimiu mai ira nomiu tomuai gin lolia lalai Jisas, bwatuna n̄an be gin hav iloe tehe.

¹⁸God nu vev serae tuai lalai ira atatun vevsera be Wani Vurai gabe kea vi horae, vi ron̄ ḡagarasi, i non avoana mwa mai gi mwasigi la hala geki.

¹⁹Nu vevea be giv binihi leahi i giv tabagilu huri God, huri be vi binihi kaburai vuromiu. Be giv lolia kunia,

²⁰mahavana huri rahuana lol vui vi mai nin God, i kea vi hora Jisas gabe Wani Vurai gabe nu gita luae huba huri kimiu.

²¹I kea vi togo lol ute atamare vaivotu tarona vi mai huri ginau duluai be vi lol garainia, kun gabe God nu vev serae sivi non atatun vevsera be ran togo tuai.”

²²“Bwatuna be Moses mwa bevea be, ‘Ratahigi gabe nomiu God vi hora atatun vevsera lalai kimiu, kunia be mwa horau, i wani gea vivora atatu vwate nin kimiu sinombu. I mwa du be giv tabea lol ginau duluai be mwa bevea lalai kimiu be giv lolia.

²³Haḡe ihei tehe gabe mwa hav tabe te atatun vevsera gea, vi hara borae nin sinombu non God i vi lol kaburainia.’

²⁴Take ira atatun vevsera gabe ram lai dum roroi lol taron Samuel i kera duluai ataguna, kera mulei ataguna ram vevsera havanau gabe mwa loli lol gubwen̄ garigi.

²⁵Haḡe tatauleo non God sivigi non atatun vevsera mwa mai huri kimiu, i kimiu mulei gim bulu alolon silo gabe God nu lolia mai ira sibimiu. Kun gabe nu vevea lalai Ebraham mwa bevea, ‘Nai vatavuhai sinombu duluai la ureure sivi varamwa.’

²⁶Haḡe kunia God mwa gita lua non atatun rovoga i mwa horae muana lalai kimiu, be vi vatavuhai kimiu ginia be mwa lol kimiu duluai ihei mwa dabagilu nin vurona sibona.”