Read Hano Lalaḡova 5 Bible Online

Lalaḡova 5 - Hano bible

Lalaḡova 5

¹Take atatu vwate ihana Ananias mai tasalana Savaera, ramuru salei tavalun nora vataha ginau.

²Take alun doronira non tasalana kea mwa haḡo dahuli udun homu huria sibona i mwa lai doren homu lalai ira hala.

³Haḡe Pita mwa bevea lalainia be, “Ananias, huri hano be gom lin̄ Setan be men tomuainigo i mwa loligo gom saruruhi Vui Sabuga, ginia be gom haḡo udun homu gabe gon laia nin udun bilamwa?

⁴Amua gom siv salei nom vataha ginau, ginau gea nomwa sibomwa, i ataguna be gom saleinia homu nomwa. Huri hano gom binihia be gov lol ginau kunia? Gom hav ruruhi te atatu, take gom ruruhi God!”

⁵Mahavana be Ananias mwa ron̄oe kunia, mwa hovi darihou mwa mate, i atatu duluai gabe ram ron̄oe ram matagu maragai.

⁶Haḡe ira mwalmwalaḡelo ram haroro ram nubwa rebehina i ram lai bwihavareinia ram davinia.

⁷Haḡe atagun mahavan aowa gaitolu, tasalana mwa haroro take mwa hav ilo te havanau be nu siv loli.

⁸Haḡe Pita mwa hudalinia mwa bevea be, “Vevea lalaiau be geki haḡea tovtovon homu be giḡo mai ahoamwa giru laia nin udun bilamiru vataha ginau?”

⁹Haḡe kunia Pita mwa bwaliua be, “Hurihano giḡo mai ahoamwa gumuru binihia be giru vi ruruhi God? Atatu be ran tavi ahoamwa la matgatava kadogaha, i rav tatalogo mulei vai avare kunia.!”

¹⁰I kea mwa hovi darihou mwa bora ata mwa mwaruruhi. Haḡe ira mwalmwalaḡelo ram haroro ram ḡitae be nu mwaruruhi ram datal bwihavareinia i ram davinia hurin ahoana.

¹¹Haḡe ira binihimwasigi mai atatu dodolua mulei be ram ron̄oe ram matagu maragai.

¹²Ginau dan̄an̄a ivusi mai tagaro be ira hala ram lolia lalai sinombu. Haḡe ira binihimwasigi ram ḡoḡo ute gaituvwa lol malmalun imwan Solomon.

¹³Atatu vwat sigai avare dagai nin tatanan̄a gea be men bulu maira, son̄ be sinombu ram sagera.

¹⁴Take sinombu gaivua mwa haroro vai lol vatugigi-i tatan̄an sinombu gaivua, atamwani i vavine ram binihimwasigi alun Ratahigi.

¹⁵Alun lalaḡova gabe ira hala ram lolia, sinombu bwihavarei ira harova vai lol buton̄in vanua la hala ram daura la bata i lol ebe huri be nunuan Pita vi ḡao alun rituai mahavana kea mwa laḡao.

¹⁶Haḡe vatugin sinombu gaivua ram mai nin vataha bwatutun vanua dalis Jerusalem, ram lai ira hei gabe ram haro i kera gabe vui hantai alolora ram rahu duluai.

¹⁷Haḡe ira muai Tataroi mai nora buluana rituai halatera, nin ira Sadusi, lolora mwa hantai maragai gin ira hala, i kunia ram binihi tuhi be ramen lol ginau vwate.

¹⁸I kera ram haḡo batugehi ira hala ram daura lol imwa vauvauhi.

¹⁹Take baten gea bon̄i, enjel non Ratahigi mwa havan̄ gatavan imwa vauvauhi, mwa domuai bwihavarei ira hala, mwa bevea lalainira be, “Gin van lol Imwa Tataro gaivua ba bevea lalai sinombu duluai huri rahuan gara.”

²¹Haḡe ira hala ram dabe avoana non enjel, ram haroro mabon̄ gaituvwa ram dau bwatuna ram bagahi. Haḡe ira muai Tataroi maira rituai ram uloi ḡoḡora bwat metua nin ira Jius huri ḡoḡoan gaivua, i kera ram hora avoana vai lol imwa vauvauhi huri ira hala be rav laira vai abera.

²²Take mahavana be atatun bwaloana ram bisirai n̄an vuroi, ram hav habwe te ira hala lol imwa vauvauhi. Haḡe kunia ram bano ram lai mulei avoana lalai ira Kansel ram bevea be,

²³“Mahavana be gan votu lol imwa vauvauhi, gam ḡitae be gatava nu lok wasinia, i ira matmatai ḡoro duluai aben matgatava, take mahavana be gam havan̄ gatava, gam habwea be atatu sigai alolon imwa.”

²⁴Mahavana be ira muai Tataroi mai ira muai ḡoro Imwa Tataro ram ron̄ ginau geki, ram binbinihi maragai be havanau mwa loli lalai ira hala.

²⁵Haḡe atatu vwate mwa haroro mwa bevea lalainira be, “Giv ron̄oe! Atatu be gin taura lol imwa vauvauhi kera lol Imwa Tataro uhugaha ram bagahi sinombu!”

²⁶Haḡe tomuai mwa ban mai non atatu mwa lai mulei ira hala. Take ram hav vwirihira tehe, bwatuna be ram matagu be bere vai sinombu ram bohara.

²⁷Haḡe ram lai ira hala vai lol ute be ira Kansel ram ḡoḡo, haḡe ira muai Tataroi ram hudaltalinira ram bevea be,

²⁸“Gan lai avoan wasi lalai kimiu be gisav mom bagahi tehe lol ihan atatu geki, take giv gitara havanau gabe gim lolia! Gim bavatui nomiu silo vagahi Jerusalem duluai i gim doron be gimen lol kamai be gamen tomuai mwasigi huri non tomarean mulei.”

²⁹Pita mai ira hala rituai ram bwaliura be, “Gov tabe God, take gosav tabe te atatu.

³⁰God non ira sibida nu lol domarei Jisas nin mateana ataguna be giv wehia i gim bohae vai alun volovolo.

³¹God nu lol domareinia vai la mwatuana kun gabe Tomuai i Varahu, be vi lai lalai sinombu ira Jius mahin̄ana huri tanon binihi leahi i, vi tugu kaburai vurora.

³²Kamai haḡea gaitura huri ginau kera geki kamai mai Vui sabuga, gabe hogoi non God lalai irahei gabe ram dabea.”

³³Haḡe mahavana be kera ata alolon Kansel ram ron̄ avoana geki, lolora mwa horo maragai, ram ron̄oe kun be rai vevegi ira hala huri mateana.

³⁴Take vwate alolora kea Varise ihana Kamaliel, kea vagahin Silo i sinombu ram binihi marahi maragainia, kea mwa du amare lolmatan Kansel. Haḡe mwa bevea lalai ira gitaḡoro be rav lai ira hala vai avare.

³⁵Haḡe mwa bevea lalai Kansel be, “Kimiu ira Jius, giv gitaḡoro havanau be gim lolia lalai atatu kera geki.

³⁶Gim binihi dumwia nu visirae gubwen̄ vwate huba, i nu vevea be kea vivora atat lavoa vwate, i atatu kun vudolu vavasi ram bulu huba maia. Take nu wehiana, i non atatu duluai ram bisalsala, i non lalaḡova mwa mate kaburai.

³⁷Ataguna gea, Judas kea ata Kalili mwa bisirai lol taron sensas, i nu haḡo sinombu gaivua ram huria, take kea mulei ran wehia, i non atatu ram bisalsala.

³⁸Haḡe bwatuna geki nam bevea lalai kimiu be, gisav lol ke ginau vwate lalai atatu kera geki. Giv derainira! Be havanau gabe ram daritari i ram lolia, binihin atatu nan vuroi, vi mataltala,

³⁹take be mwa mai nin God, gisav muramura ke dum ḡorora. I giv iloe sibomiu be gim bwalo mai God!” Haḡe kunia Kansel mwa huri avoan dura non Kamaliel.

⁴⁰Haḡe ram uloi ira hala ram haroro mulei, i ram dalvusira, i ram borotainira be rasav mom avo ke mulei alun ihan Jisas, i ram hora dagainira.

⁴¹Mahavana be ira hala ram bwihavare, ram samsamwara, bwatuna be God vi vev dumwia ke ram dadariha be rav ron̄ ḡagarasi bwatuna Jisas.

⁴²Haḡe vataha gubwen̄i lol Imwa Tataro i lol imwan vataha atatu ram doretore, i ram bagahi rahurahu i Roroi tavuha non Jisas Wani Vurai.