Read Hano Lalaḡova 7 Bible Online

Lalaḡova 7 - Hano bible

Lalaḡova 7

¹Haḡe muai Tataroi mwa hudali Stivin mwa bevea be, “Matu avoana geki mwasigi?”

²Take Stivin mwa bwaliua mwa bevea be, “Ira tuaku mai ira Tata, giv roron̄taiau! Amua tamanda Ebraham nu siv vano be men togo Heran, God sarisari nu visirai lalainia Mesopotamia

³i mwa bevea lalainia be, ‘Gov lin̄ derai varamwa mai vanuamwa duluai ba bano vai la vanua be nav huhuinia lalainigo.’

⁴I kea mwa derai vanua duluai i mwa bano vai Heran. Haḡe ataguna be taman Ebraham mwa mate, God mwa lolia mwa dagara vai lol ute be gom dogo aia kadogaha.

⁵God mwa hav lai te ḡigilai tavihen tano vwate lalai Ebraham be vivora mwasin nona, sigai len̄len̄a vaivotu be tavihen tano vwate men tovoe, take God nu tatauleo be vi laia lalainia, i vivora nona mai ira varana duluai. Lol mahavana be God nu lol tatauleo geki, Ebraham nuhav bava te ira nituna.

⁶Geki avoana be God nu vevea lalainia mwa bevea be, ‘Ira varamwa duluai rav togo gi tausala la vanua dolua, i aia rav togo gi atatun rovoga tavwe sigai i rav lol bwarebwarera la hala hahantai huri taulu vudolu vavasi.

⁷Take nav lai silo vevegi lalai nora ratahigi gabe ram lol rovoga lalainira, i ataguna gea rav mwalue nin vanua gea rav to teti ba ḡogonaiau.’

⁸Kunia God mwa lai tavdovon̄ana lalai Ebraham gi dovon̄an tatauleo. Haḡe Ebraham mwa dav dovon̄ara alun Aisak wik gaituvwa ataguna be mwa bora, i Aisak mwa dav dovon̄ana alun nituna Jekob, i Jekob mwa dav dovon̄ana alun ira nituna han̄vulu domwa gairua, gabe vara roroa ata la ira sibida.”

⁹“Haḡe ira nitun Jekob sinera mwa hantai huri tura Joseb i ram saleinia vai Ijip be vivora turin rovoga vuroi tavwe sigai. Take God maia

¹⁰i mwa lai luae nin ute hantai be nu dumwia. Lol mahavana gabe Joseb mwa bisirai aben ratahigi lavoa ata Ijip, God mwa lai alen̄ tavuha mai muramura lalainia, i ratahigi lavoa mwa lol Joseb mwa bora ratahigi tomuai ḡoro vanuana duluai vaivotu imwan ratahigi lavoa sibona.

¹¹Haḡe maro gaivua mwa dum vanua Ijip mai Kenan, i sinombu ram ron̄ ḡagarasi maragai. Kunia ira sibimai ram hav habwe te dum gina ganiana,

¹²haḡe Jekob mwa ron̄oe be koni abena Ijip kea mwa hora ira nituna, gabe mwa bora ira sibida la muan nora vanoana.

¹³La gairuan nora vanoana Joseb mwa lol seserainia lalai ira tuana, i ratahigi lavoa ata Ijip mwa siv iloe huri ira tuan Joseb.

¹⁴Haḡe Joseb mwa hora roroi huri tamana Jekob, mai ira varana duluai kera kun n̄avul gaibitu domwan gailima, be rav mai duluai vai Ijip.

¹⁵Haḡe Jekob mwa bano vai Ijip i mwa dogo aia vaivotu mwa mate kea mai ira nituna.

¹⁶Lol mahavan mateana rebehira mwa laian mulei vai lol vanua Sekem, ram davi rebehira lol ute gabe Ebraham nu volia gin homu vwate nin varan Hamoro.”

¹⁷“Mahavana mwa sosori huri tatauleo gabe God nu lolia lalai Ebraham, haḡe nomai sinombu mwa mauri maragai lol vanua Ijip.

¹⁸Haḡe la nogonana ratahigi lavoa vwate gabe mwa hav ilo te Joseb mwa domua lol vanua Ijip.

¹⁹Kea mwa dogo mwa domuai letei varana i mwa lol ḡagarasira, i mwa ḡai maira be rav tau dagai ira nitura avare nin vanua, huri be rav mate.

²⁰Lol mahavana haḡea geki naturigi Moses gabe nu hari maragai mwa bora. Haḡe ram ḡita ḡoroe la vanua huri vula gaitolu,

²¹i mahavana be ram dau dagainia avare nin vanuana, nitun ratahigi lavoa vavin daulato mwa ḡitaḡoroe kun be mwasin nituna.

²²Haḡe ram bagahia gin avoan mataisao ata Ijip duluai, i kea mwa mai gi atat gaivua lol non avoana i lalaḡova.”

²³“Lol mahavana be taulun Moses mwa n̄avul gaivasi, kea mwa hiḡe halan ira Jius be kunhanigi ram domuainira.

²⁴Mahavana be mwa ḡita dum ira Jius vwate be ata Ijip mwa lol ḡagarasia, kea mwa bano darihou mwa botui ira Jius mwa wehi kaburai ata Ijip.

²⁵Moses mwa binihia be non sinombu rav gita batoia be God vi lalaḡo maia huri be kea vi ribwesira, take ram hav gita te batoia.

²⁶Haḡe mwa rani kea mwa ḡita ira Jius gairua be ramuru bwalo, i kea mwa doron be vi lol tamwata lol davolara. Haḡe mwa bevea lalainira be, ‘Ira tarua, giru vi ron̄oe, kimiru ira Jius saraḡo, huri hano be gumuru bwalo kungeki?’

²⁷Haḡe vwate alolora gabe mwa hantai maragai lalainia mwa sogai dagai Moses. I mwa bevea lalainia be, ‘Ihei mwa loligo be gomen vora lavoa ba domuai kamaru?

²⁸Matu gom doron be gomen wehiau kun ata Ijip be gon wehia ninovi?’

²⁹Moses mwa ron̄ dumwia kunia kea mwa rov maragai nin Ijip mwa bano mwa dogo la vanua Midian. Haḡe nituna gairua ramuru bora aia.”

³⁰“Ataguna be tau n̄avul gaivasi mwa nogo, enjel vwate mwa bisirai aben Moses lol memean gabi be mwa onda ute vono lol vanua vuroi sosori vusi Saenae.”

³¹Moses mwa dan̄an̄a maragai gin ginau be mwa ḡitae, i mwa ban sosori ute vono be men gita tavuhainia. Take mwa ron̄ dum silon Ratahigi mwa bevea be,

³²“Inau God non ira sibimwa, God non Ebraham, Aisak, mai Jekob.” Moses mwa birururu gin mataguana i mwa hav gita te dum ute.

³³Haḡe Ratahigi mwa bevea lalainia be, “Gov lai lua nom sus bwatuna be ute be gom du aia Imwa Tataro.

³⁴Nan ḡita tomuai hantai mai ron̄ ḡagarasi non noḡu sinombu lol vanua Ijip. Nan ron̄ dum nora ron̄ ḡagarasi i haharigiana, i nam himai be nav ribwesira nin gao vauvauhi. Gov mai kadogaha i nav horago vai Ijip.”

³⁵“Moses kea haḡea atatu gabe ira Jius ran vev dagarae, ram bevea be, ‘Ihei mwa loligo be gomen lavoa ba domuai kamai.’ Moses kea haḡea be God nu horae be vi tomuai bwihavarei sinombu gin buluiana non enjel gabe nu visirai abena lol mahavana be ute vono nu onda.

³⁶Kea nu tomuai lua sinombu nin Ijip, i nu lol ginau dan̄an̄a tagaro lol vanua Ijip, i lol tahi memea, vuvuri taulu n̄avul gaivasi lol vanua vuroi.”

³⁷Moses haḡea atatu gabe nu vevea lalai sinombu ira Jius be, “God vi hora atatun vevsera lalai kimiu, kunia gabe nu horau, wani gea vivora vwate nin kimiu sibomiu.

³⁸Atatu gea kea haḡea gabe nu togo bulbulu mai sinombu ira Jius lol vanua vuroi, kea bul mai ira sibida aia i mai enjel gabe nu avo maia la vusi Saenae, i nu lai avoan rahu non God be vi ḡao aluda kadogaha.”

³⁹“Take ira sibida ran varihai didi dabea, ran sogai dagainia ram binihia be rav vano mulei vai Ijip.

⁴⁰Haḡe kunia ram bevea lalai Eron ram bevea be, ‘Gov lol ira tagaro rituai be rav tomuai gida. Tam hav iloe tehe be havanau mwa dum wani gea be Moses, gabe nu lai lua gida nin Ijip.’

⁴¹Mahavan taro haḡe gea be ram lol nun vatu kun lolmatan buluki atamwani, i ram dataroi lalainia, vuvuri ram lol samsamwara alun binihi marahi huri ginau gabe ram lolia sibora.”

⁴²Haḡe kunia God mwa ban burigainira i mwa lolira be rav gogonai visiu lol ute atamare, kun gabe nu ravae lol buk nin ira atatun vevsera mwa bevea be, “Sinombu ira Jius! Gim hav tataroi tehe lalaiau ginia be gim wehi ginau rahu huri taul n̄avul gaivasi lol vanua vuroi.

⁴³Imwan god Molek n̄an gea imwa hauhau be gim haḡoe, i nunun Revan, nomiu god be visiu, ginau kera gea nun vatu gabe gin lolia be giv gogonainia. I kunia nav hora kimiu vai alolon silo vevegi hal tavalun Babilon.”

⁴⁴“Ira sibida ran haḡo imwa hauhau huri rebehin God bul maira lol vanua vuroi. Nu loliana kun gabe God nu vevea lalai Moses.

⁴⁵I Ataguna, ira sibida gabe ran lai imwa hauhau nin ira tamara, ram haḡoe bul maira mahavana be ram bano bul mai Josua i ram lai lua vanua nin varan sinombu gabe God nu hora luara huri be ram banvano maragai. I mwa dogo aia vaivotu lol gubwen̄in Deved ratahigi lavoa.

⁴⁶Kea nu lai muramura nin God i mwa hudali God be vi lai lalainia tanon togotogo huri God non Jekob.

⁴⁷Take Solomon haḡea nu haḡo imwa lalainia.”

⁴⁸“Take God Holomare hae mwa hav togo tehe lol imwa gabe tanon liman atatu, kun gabe atatun vevsera ran vevea be,

⁴⁹Ute atamare noḡu tanon togotogo, i ureure tanon vavarahin bwalageku. Hava imwa gabe giv haḡoe huriau? Tanoḡu behe be nav togo aia?

⁵⁰Matu inau siboku nan hav lol te ginau kerageki.”

⁵¹“Kimiu ira binihi lalan̄a. Stivin nu vev rahurahuinia be, ‘Lolomiu kun ira len̄len̄aga, i bweromiu mwa bora huri avoana non God! Kimiu gingin ira sibimiu, kimiu mulei gim du ḡoro Vui Sabuga.’

⁵²Matu atatun vevsera vwat sigai be ira sibimiu ran hav vev te hantainia? Ran wehi ira horata non God, gabe nu vevea huri maiana non mwasin non atatun rovoga vavtutu. I kadogaha gim bevegia i gim lol ḡagarasia.

⁵³Kimiu haḡea be gin lai silo non God (leo horai) gabe nu laiana himai nin ira enjel, take gim hav tabea te radu.”

⁵⁴Haḡe mahavana be kera lol kansel ram roron̄tai Stivin, lolora mwa biaroi maragai ram ḡan livora huria gin lolhoro.

⁵⁵Take Stivin mwa masiri gin Vui Sabuga, mwa dada vai lol ute atamare i mwa ḡita sarisarin God i Jisas mwa du la mwatuana God.

⁵⁶Mwa bevea be, “Gitae! Nam ḡita ute atamare mwa mahavan̄i i nitun atatu mwa du la mwatuan God.”

⁵⁷Haḡe ram haharigi ram sin̄ohi bwerora gin limara. I ram rovo vatuvwa vai aluna,

⁵⁸ram bohainia vai avare nin bwatutun vanua, i ram bohae gin vatu. Kera gabe ram du gi gaitura ram derai gaisagara la liman mwalaḡelo ihana Sol.

⁵⁹Kera ram boha Stivin mahavana mwa ulo huri Ratahigi mwa bevea be, “Ratahigi Jisas gov laiḡoḡo atmateku.”

⁶⁰Kea mwa sisiabwau mwa haharigi gin silo gaivua mwa bevea be, “Ratahigi! Gosav vului te nora bwatigoro.” Kea mwa bev avoana geki i mwa mwaruruhi.