Read Hano Lalaḡova 9 Bible Online

Lalaḡova 9 - Hano bible

Lalaḡova 9

¹Lol mahavan taro geki Sol mwa lin̄ derai kaburai alen̄ana ata amua be mwa wehi atatu i mwa lol ḡagarasira gabe ram huri Ratahigi. Mwa bano vai aben ira Muai Tataroi,

²i mwa hudaligi huri letasi be vi seserai muai tataroi alolona huri be vi laia vai lol imwa tataro non ira Jius Damaskas, huri be si habwe te dum atatu rituai gabe ram huri malelen Ratahigi, kea vi haḡo batugehira atamwani sage vavine, i vi lai muleinira vai Jerusalem.

³Haḡe mahavana be Sol mwa mai sosori bwatutun vanua Damaskas, darihou n̄an gigita gaivua nin mahao mwa sarisari aluna i dalisia duluai.

⁴Kea mwa hovi vai lol tano i mwa ron̄ silo mwa bevea lalainia be, “Sol, Sol! Hurihano gom lol hantai lalaiau kunia?”

⁵Sol mwa hudalinia mwa bevea be, “Giḡo ihei Ratahigi?” Silo mwa bwaliua be, “Inau Jisas gabe gom lol hantai lalaiau.”

⁶“Take tomare ba bano vai la bwatutun vanua, i vi vev hano lalainigo be mwa du be gov lolia.”

⁷Haḡe atatu be ram lago bul mai Sol ram barahidu, ram hav vev te avoana vwate, ram ron̄ dum silo n̄ano take ram hav gita te atatu gaituvwa.

⁸Sol mwa domare nin tano mwa bugeri matana, take mwa hav gita te dum ute. Haḡe ram haḡo limana ram domuainia vai Damaskas.

⁹Haḡe kea mwa dogo huri gubwen̄ gaitolu mwa hav gita te dum ute, i lol mahavana gea mwa hav gan te dum ginau i mwa hav mwin te wai.

¹⁰Haḡe atat binihimwasigi vwate Damaskas ihana Ananias. Kea mwa hueri, i Ratahigi mwa bevea lalainia be, “Ananias!” i kea mwa bwaliua be, “Inau geki, Ratahigi.”

¹¹Haḡe Ratahigi mwa bevea lalainia be, “Gov lol vatuvwai ba bano vai la bwatutun vanua mwa do bavtutu banaia, i gov hudaligi lol imwan Judas huri atatu ata Tasis ihana Sol. Kea mwa dataro

¹²i lol non hueri kea nu gita atatu ihana Ananias mwa haroro, mwa dau limana aluna huri be kea vi gita mulei ute.”

¹³Ananias mwa bwaliua mwa bevea be, “Ratahigi, atatu ivusi ram bevea lalaiau huri atatu geki i huri ginau hahantai duluai gabe nu lolia lalai nom sinombu Jerusalem.

¹⁴I kea nu mai vai Damaskas mai roron̄o nin ira muai tataroi be vi haḡo batugehira be ram ḡogonainigo.”

¹⁵Ratahigi mwa bevea lalainia be, “Vano, bwatuna be nan uloinia be vi lalaḡo lalaiau, be vi seserai ihaku lalai ira Lolobon̄i i ira ratahigi lavoa i sinombu ira Jius.

¹⁶I inau siboku nav seserai lalainia ginau duluai be kea vi ron̄ ḡagarasi ginia huriau.”

¹⁷Haḡe Ananias mwa bano mwa haroro lol imwa be Sol mwa dogo alolona, i mwa dau limana aluna. Haḡe mwa bevea lalainia be, “Tuaku Sol, Ratahigi mwa horau i kea Jisas sibona gabe nu visirai abemwa la hala mahavana be gon mai vai Teti. Kea mwa horan huribe gov gita ute mulei i gov masiri gin Vui Sabuga.”

¹⁸Haḡe darihou n̄an ginau kun garin ige mwa hovi nin matan Sol, i kea mwa ḡita mulei ute. I kea mwa du amare i mwa lai garuhisabuga

¹⁹i ataguna be kea mwa ḡan ginau, non muramura mwa dabagilu mulei. Sol mwa dogo huri gubwen̄i rituai mai ira binihimwasigi Damaskas.

²⁰Kea mwa bano vai lol imwa tataro gaivua mwa doretore mwa bevea be Jisas kea nitun God.

²¹Kera duluai gabe ram ron̄oe ram dan̄an̄a maragai, i ram hudaligi ram bevea be, “Matu mwa hav vora te kea gabe nu togo lol vanua Jerusalem i mwa wehira gabe ram ḡogonai wani gea Jisas. I mwa hav vora te kea mulei be nu mai vai teti la hala be men lai sinombu ba ban mulei maira vai aben ira muai tataroi?”

²²Take Sol mwa muramuraga lol non toretore i mwa seserainia mwa melmelo be Jisas kea haḡea Wani Vurai, haḡe ira Jius gabe ram dogo Damaskas ram hav vwaliu te dumwia.

²³Gubwen̄ ivusi nu nogo huba, ira Jius ram ḡoḡo bulbul ram daritari huri halana be rav wehi Sol.

²⁴Take ram seserai nora taritari lalainia. Haḡe ram matai ḡoro matgatavan bwatutun vanua bon̄i i rani huribe rai wehia.

²⁵Take bon̄i vwate atatu non Sol ram laia ram lin̄ia sivi imwa lol lulu vwate alolon gete vai ata.

²⁶Sol mwa bano vai Jerusalem i mwa lol ron̄oe be vi bulu mai ira hala. Take kera ram hav vinihi te mwasigi be kea hala vwate, i kera ram mataguinia.

²⁷Haḡe Banabas mwa mai mwa buluia i mwa laia vai aben ira hala. Kea mwa bevea lalainira huri halana be kunhanigi Sol nu gita Ratahigi la hala i mulei be Ratahigi nu avo lalainia. I mulei kea mwa bevea lalainira be kunhanigi Sol mwa muramuraga be men toretore lalainira lol ihan Jisas lol vanua Damaskas.

²⁸Haḡe kunia Sol mwa dogo maira i mwa lago lol vanua duluai Jerusalem, i mwa muramuraga lol non toretore la ihan Ratahigi.

²⁹Kea mwa dogo mwa avo mai ira Jius, ram lol ron̄oe be ramen wehia.

³⁰Mahavana be ira binihimwasigi ram iloe huri hala geki, ram lai Sol vai Sisaria i ram hora dagainia vai Tasis.

³¹Haḡe kunia uloilua Judia duluai, Kalili mai Samaria ram dogo lol tamwata. Haḡe uloilua mwa mauri doratora gin buluiana non Vui Sabuga, kun gabe mwa dogo gin binihi marahi alun Ratahigi.

³²Pita mwa lagolago lol vanua ivusi Samaria, i lol gubwen̄i vwate kea mwa bano be men varahi ron̄ sinombu non God be ram dogo Lida.

³³I aia kea mwa habwe atatu vwate ihana Aeneas gabe rebehina nu mate, i kea mwa hav tomare tehe nin batana huri taul gaivwelu.

³⁴Haḡe Pita mwa uloinia mwa bevea be, “Aeneas, Jisas Kraes mwa barahugo. Tomare ba lol tavuhai niniamwa.” Haḡe Aeneas mwa domare darihou.

³⁵Haḡe sinombu gabe ram dogo Lida mai Saron ram ḡitae, i ram dabagilu mulei huri Ratahigi.

³⁶Lol vanua Jopa vavine vwate ihana Tabita, kea binihimwasigi vwate (Ihana la avoana ata Krik be Dokas, binihiva be Dia). Lol mahavan rahuna duluai nu lalaḡo tavuha i mwa bului ira hiru.

³⁷Haḡe mahavana gea kea mwa haro maragai vaivotu be mwa mate. I ram ḡaruhi rebehina i ram daua lol vwavwan imwa va halamare.

³⁸Vanua Jopa nuhav vorate hautu nin vanua Lida, haḡe ira binihimwasigi lol vanua Jopa ram ron̄oe be Pita mwa dogo la vanua Lida i ram hora atatu gairua lalainia mai roroi ramuru bevea be, “Gov hagav kamai ba mai huri kamai.”

³⁹Haḡe Pita mwa lol vatuvwai i mwa bano maira. Mahavana be kea mwa botu, ram laia vai lol vwavwan imwa va halamare, i aia ira bwero duluai ram haravuinia ram dei i ram bagahia gin soti duluai mai koti gabe Dokas nu ligora mahavana gabe nu rahu.

⁴⁰Haḡe Pita mwa hora dagainira vai avare nin vwavwan imwa, i kea mwa sisiabwau mwa dataro haḡe mwa ban burigai huri rebehina mwa bevea be, “Tabita, tomare!” Haḡe mwa bugeri matana, i mahavana be mwa gita Pita, kea mwa domare.

⁴¹Pita mwa rarau mwa rav domareinia. Haḡe mwa uloi ira binihimwasigi mai ira bwero mwa lai muleinia lalainira, kea mwa rahu.

⁴²Haḡe rorona mwa lon̄ahi vanua duluai Jopa, i sinombu ivusi ram binihimwasigi alun Ratahigi.

⁴³Pita mwa dogo huri gubwen̄ ivusi mulei lol vanua Jopa mai Saemon, kea gabe mwa lol vataha ginau alun vinun buluki.