Read Hano Rom 1 Bible Online

Rom 1 - Hano bible

Rom 1

¹Nin Pol, atatun rovoga non Kraes Jisas. God nu uloiau be nai vora non hala i nu gita luau be nai vev lua Roroi Tavuha.

²God nu tatauleo huri Roroi Tavuha tuai sivi ira atatun vevsera, kunia be nu ravana lol Ravrava Sabuga.

³Roroi tavuha kea huri Nitun God, Jisas Kraes. Nu kun atatu, kea nu vora nin varan Deved. Take sivi muramura non Vui Sabuga kea nu gita luae gi nitun God huribe God nu lolia mwa domare mulei nin mateana, kea Jisas Kraes nonda Ratahigi.

⁵Sivi Kraes, God nu lai rovoga non ira hala, be vi tomuai atatu lol ute duluai be rav binihimwasigi i rav ron̄oe.

⁶Geki mulei huri kimiu be gim dogo Rom, be God nu uloi kimiu be giv binihimwasigi alun Jisas Kraes.

⁷Lalai kimiu duluai Rom gabe God mwa doron kimiu i nu uloi kimiu be giv vora ira non atat sabuga: Noḡu tataro, be God, tamanda, mai Jisas Kraes, raru vi tau hogoi i tamwata be vi togo mai kimiu.

⁸Muana nam doron be nav vevea be nam hav vev te tabeana lalai noḡu God sivi Jisas Kraes huri kimiu duluai, bwatuna be sinombu duluai lol ureure ram avoi nomiu binihimwasigi garagusi.

⁹Inau nam lol rovoga non God mai ira noḡu binbinihi be namen vev lua Roroi Tavuha non nituna, mwa iloe be inau tagaro nam bev kimiu

¹⁰vataha mahavana nam dataro. Nam hudali God be vi mahin̄aiau be nav mai dum abemiu, geki vi loli hurin non doroniva.

¹¹Nam doron maragai be nav gita kimiu, i nav lai ira hogoi tataroi rituai lalai kimiu be vi lol kimiu giv tu wasigi.

¹²Nam binihia be, nam doron be tav bului gida mai binihimwasigi garagusi be tam do maia. Nomiu binihimwasigi garagusi vi buluiau, i noḡu binihimwasigi garagusi vi bului kimiu.

¹³Ira tuaku, nam doron be giv iloe be, nan lol taritari vaivusi be nav mai abemiu, take ginau geki mwa hav dumwi tehe. Nam doron be nav mai bwatuna be nav bului kimiu be giv mauri lol vui kunia be nan bului ira vara dagai nin varan Israel.

¹⁴Noḡu rovoga lalai atatu n̄oto ata Krik i kera be ram hav vora te ata Krik, atat mataisao i kera be ram hav vora te atat mataisaoga.

¹⁵Kea haḡea huri hano nam doron be nav toretore la Roroi Tavuha lalai kimiu Rom.

¹⁶Nam hav busbusi tehe gin Roroi Tavuha, huri be kea haḡea muramura be God nu lolia be men varahu sinombu be ram binihimwasigi nu varahu ira vara ira Jius muana, i mulei nu varahu kera be varate ira vara vai Israel.

¹⁷Roroi Tavuha mwa bagahi kun hanigi God mwa lol atatu mwa bavtutu maia sibona be mwa dau bwatuna i mwa nogo mai binihimwasigi garagusi. Ravrava Sabuga mwa bevea be, “Kera be ram bavtutu mai God huri be ram binihimwasigi garagusi, kera rav habwe rahuana.”

¹⁸God mwa seserai lua non lol horo nin ute atamare lalai ira vui son̄son̄o duluai i hal lete be sinombu ram lolia. Mai nora vui son̄son̄o sibora be ram rahu maia ram dahuli mwasigi.

¹⁹God mwa seserai lua non lol horo bwatuna be non mataisao rituai nu lolian melmeloi lalainira. Uwe, God nu vagahia sibona lalainira.

²⁰Ginau rituai huria be atatu rasav gita te dumwia gin matara sibora non muramura mai ira ginau duluai be ram lolia i God. Take nin bwatun tauva huri ureure ginau kerageki mwa iloan maron̄ron̄oi gin hano be God nu lolia. Bwatuna gea, avoana non atatu mulei vwat sigai be rav vevea.

²¹Kera ram ilo God, ta ram hav uloi te roroainia sage ram bev nora tabeana lalainia. Nora binbinihi mwa hantai. Binihira mwa dadaloiga i nu masiri gin ute bon̄i.

²²Ram bevea be kera ran mataisaoga, take ram mai gi taltaleana.

²³God sihav mate te dum gubwen̄ vwate, take ram hav tataro te lalainia, ram ban ram dataro lalai ira nunvatu be gida atatu tam lolira, kun manu, ira ginau rahu, mai teltele.

²⁴Bwatuna be ram lol ginau kerageki, God mwa lin̄ira i mwa lolira ram huri nora hala vuroga, ram doroni n̄ano be rav lol ginau hantai. Kea haḡea mwa lolira ram buroga gin bwatigoro, ram lol bwarebware rebehira mai tuara dodolua.

²⁵Ram hav vinihi te mwasigi God ram binihia be mwa dentene. Ram ḡogonai i ram lol hano be God nu lolia ninia be rav uloi roroai ihan Ratahigi nonda God vai tuai vai tuai! Amen.

²⁶Bwatuna be sinombu ran lol ginau kerageki, God mwa bisdagai ninira i mwa lin̄ira ram lol ginau busbusi be ram doron be rav lolia. Ira vavine ram lin̄i be ram bulu mai ira atamwani i ram dau bwatuna ram bulu mai ira vavine.

²⁷La hala n̄an gea, ira atamwani ram lin̄i be ram bulu mai ira vavine i ram doro doron muleinira. Ira atamwani ram lol ginau busbusi mulei ginginira, i lol rebehira ram lai silo vevegi huri nora hala lete.

²⁸Sinombu ran hav vinihia tehe be mwa du maragai be rav ilo mataisao mwasigi non God. I God mwa bisdagai ninira i mwa mahin̄ainira be rav haḡo nora binihiv taltale sibora i be rav lol ginau be mwa du be rasav lolia tehe.

²⁹Kera ran hogon bamasirira gin lalan̄an vuro duluai, kun hala lete, bugurana, atat varihai, ran masiri gin binbinihi hantai, wehi bamat atatu, bwaloana, tenteneana, i ram binihi hantai ira tuara. Ram hun̄ahun̄a

³⁰i ram bev avoan hantai ginginira sibora. Ram hav doron te God. Ram lol bwarebware ira tuara i ram lol avoan dentene ginginira sibora. Ram hiḡe hala be rav lol bwarebware ginau. Ram hav tabe te tamara i ratahira.

³¹Kera ram hav lai te dum binbinihi tavuha, ram hav huri te nora tatauleo, ram hav doron te atat dolua, i ram hav hagav te dum atatu.

³²Ram iloe huba be God vi vevegi atatu be ram lol alen̄a geki, be vi mate huria, take ram lol rahurahui alen̄a gea. Hage ninia gea, kera ram ron̄ mwandavuha n̄ano be ramen bului atatu be ram do ram lol alen̄a kunia.