Read Hano Rom 13 Bible Online

Rom 13 - Hano bible

Rom 13

¹Kimiu duluai mwa du be giv huri silon ira tomuai ḡoro. Atatu vwate sihav tomuai tehe, havava God n̄an vi lai muramura lalainia huri tomuai, i kadogaha atatu vwate sihav tomuai tehe be God mwa hav lai te muramura radu lalainia.

²I kera be ram daha vai alun ira tomuai ḡoro kera haḡea ram daha alun havanau be God mwa bevea. I kera rav lai mulei silo vevegi alura sibora.

³Kera be ram bavtutu lolmatan God rasav matagun te ira tomuai; kera n̄ano be ram bahala rav mataguinira. Ke kimiu gim doron be gisav matagun te ira tomuai? Haḡe giv lol alen̄ vavtutu, i kera rav uloi roroai kimiu.

⁴Ira tomuai haḡea ram bora turin rovoga non God be rav bului kimiu. Take kebe gov lol alen̄ lete, kea haḡea gov matagu. Kea mwa hav haḡo te irubwi n̄an vuroi kunia; kea mwa bora turin rovoga non God huria be vi vevegi kera be ram lol alen̄ lete.

⁵I gov lol ron̄oe be gov gogonai ira tomuai ḡoro, vorate huria n̄an be rav vevegigo, take huria be gon iloe be kea alen̄ vavtutu.

⁶Geki mulei huri hano gim bol homu. Ira tomuai ram lol rovoga non God i ram lai taro huri nora rovoga.

⁷Giv vol nomiu homu duluai i havanau be gin laia. Kebe gin lai te lalan̄an homu, giv volia. Giv lai binihi marahi i silo gogonai lalai nira duluai.

⁸Gisav lai te ginau non atatu n̄an vuroi kunia, vaivotu be giv laia gin binihi marahi gingin kimiu, bwatuna be atatu be mwa binihi marahi atat dodolua kea haḡe mwa dabe ira silo duluai.

⁹Silo mwa bevea be, “Gisav lol te vuro la halan lagiana. Gosav wehi te bamat atatu. Gosav sura tehe. Gosav doron te ginau non atat dodolua.” Ira avoana duluai geki mai rituai mulei binihivanana n̄an gaituvwa i geki silo gaituvwa n̄ano: “Gov binihi marahi tuamwa kunia n̄an be gom binihi marahinigo sibomwa.”

¹⁰Lolotabetabe mwa hav varihai te tuana, i lolotabetabe mwa dabe silo duluai.

¹¹Giv lol ginau kera geki bwatun be gim ilo didini taro haḡe geki be tam dogo alolona. Kadogaha taro vwate huri kimiu be giv mamata nin nomiu maturuva, bwatuna be kadogaha tarona be God vi varahu gida mwa sosori nin taro be gida tan siv binihimwasigi.

¹²“Bon̄i” mwa bwelvwel gim nogo, “Rani” mwa sosori gin gida. I gida tav lin̄ ginau ata lol ute meto i tas lai vatahanan bwaloana ata lol gigita.

¹³Tav togo la alen̄ vavtutu, kun atatun ute rani. Ta sav la te bulbulu huri mwinmwin daltale huri ginau hantai. Atamwani mai atamwani rasav lol te bwatigoro ginginira sa vavine mai vavine. Bwaloana visigai mai binbinihi hantai.

¹⁴Take gov sagago mai ratahigi Jisas Kraes i gov vinihi malioi vuro be gom lolia hurin binihimwa sibomwa.