Read Hano Rom 16 Bible Online

Rom 16 - Hano bible

Rom 16

¹Nam bevea lalai kimiu huri vavin tavuha Vibi, be nu bului lol imwa tataro Ken̄kria.

²Nam hudalinigo be gov dame aluna la ihan ratahigi la hala be atat non God rav lolia. Gov buluia lol hano be mwa do ririhai huria, huribe nu buluiau mai sinombu dodolua mulei ivusi.

³Giv lai noḡu avoan laiḡoḡo lalai Prisila i Akwila, be raru lol rovoga maiau lol ihan Kraes Jisas,

⁴i ramuru lol vatuvwai be raruvi lin̄ rahura sibora be raru men varahuau. Nam lai avoan avkari lalainira, i ira uloilua gabe ira Lolobon̄i mulei ram lai nora avoan avkari lalainira.

⁵I nam bev avoan helheloi mulei lalainira be ram mai vai la imwara. Avoan helheloi mulei lalai tuaku Epenetas, be nu vora muan atatu lol vanua Esia be nu huri Kraes.

⁶Avoan helheloi mulei lalai Mere, be nu lol rovoga hahavwani huri kimiu.

⁷Avoan helheloi mulei lalai Andronikas i Junia, ira havaku, gabe rav togo vauhi maiau. Kera raru vora atatu be ira hala ran ilo tavuhainira. Kera raru vora atat binihimwasigi non Kraes vuri mwa sivora inau.

⁸Avoan helheloi lalai Ampliatas, tuaku lol ihan ratahigi.

⁹Avoan helheloi lalai Abanas, nu lol rovoga maiau huri Kraes. I avoan helheloi mulei lalai buluana Stakis.

¹⁰Avoan helheloi mulei lalai Apeles, be rav haḡo ron̄oe i ram habwe mwasigi be mwa dabe Kraes. Avoan helheloi mulei lalainira n̄oto be ram du la imwan Aristobolas.

¹¹Avoan helheloi mulei lalai Herodion, ata la vanua maiau. Avoan helheloi mulei lalainira be ram dogo lol imwan Nasisas be ram lol rovoga non God.

¹²Avoan helheloi mulei lalai Trivena i Trivosa, ira vavine gabe ran lol rovoga hahavwani huri God. Avoan helheloi lalai buluana Pesis, kea gabe nu lol rovoga hahavwani mulei huri God.

¹³Avoan helheloi mulei lalai Ruvas, kea raumatan atatu lolmatan God, i lalai ratahina, be nu vora ratahi lalaiau mulei.

¹⁴Avoan helheloi lalai Asingkritas, Vlekon, Homes, Batrobas, Hemas, i ira tuaku duluai be ram dogo maia.

¹⁵Nam Lai avoan helheloi Vildokas, i Julia, Nereas i tuana vavine, i Olimpas, i lalai atat non God duluai maira.

¹⁶Giv lol avoan helheloi geki i giv bulbultagai. Uloilua non Kraes duluai Ram hora nora avoan helheloi lalai kimiu.

¹⁷Ira tuaku, nam hudali kimiu be giv gita ḡoro hurira be ram lol atatu be ramen vigaigai ginginira, i ram lol hantai binihimwasigi garagusi non atatu. Kera ram hae la mwasin silo vagahi gabe gin huhuinia, i giv togo dagai ninira.

¹⁸Atatu kunia ram hav lol te rovoga non Ratahigi Kraes ta ram lol ginau n̄ano be mwa hurin nora doroniva. Ram avo la avoan ravravwega i avoan lulumwu be ramen ḡalira be ram hav ilo te ginau lete.

¹⁹Atat binihimwasigi n̄oto ram ron̄oe be gim lol gogonai, i nam ron̄ mwandavuha bwatuna kimiu. Ta nam doron be kimiu giv mataisaoga huri hano be nu tavuha i giv melmelo nin hantai.

²⁰God gabe nu lai tamwata i si hav vora te n̄ava, kea vi raharahai ḡalau Setan aten bwalageda. Hogoi tavuha non Ratahigi God Vui Sabuga vi togo mai kimiu.

²¹Timoti gabe nu lol rovoga maiau, mwa hora non avoan helheloi, i Lusias mulei, Jeson, i Sosipata, i ira havaku.

²²Inau Tetias, i nam rav avoana non Pol nam hora noḡu avoan helheloi lalai kimiu lol ihan ratahigi.

²³Kaias mwa mahin̄aiau mai uloilua duluai be gam dogo lol imwana. Kea mulei mwa hora non avoan helheloi lalai kimiu, kunia mulei Erastas, gabe mwa ḡita ḡoro homu lol bwatun vanua lavoa aia, i tuada Kotas.

²⁵Tav uloi roroai ihan God gabe vi lol dumwigo gov wasi lol binihimwasigi garagusi gin Roroi Tavuha gabe nu vevea lalai atatu i huri roroi huri Jisas Kraes. Roroi huri Kraes kea ginau hili gabe mwa dahuliana huri taul ivusi huba ta kadogaha mwa loliana mwa iloana.

²⁶Nu loliana mwa melmelo sivi ravrava nin ira atatun vevsera. I hurin avoan wasi non God, be mwa dogo vai tuai mwa loliana lalai ureure duluai huribe kera rav binihimwasigi i rav gogonainia.

²⁷I lalai God n̄ano be nu mataisaoga, kea gaituvwa n̄ano sivi Jisas Kraes vai tuai vai tuai. Amen.