Read Hano Rom 2 Bible Online

Rom 2 - Hano bible

Rom 2

¹Mandovai gim binibe gomen vevegi atat dolua, kea gam bahala. La mahavana be gom bevegira, kea gom bevegi mulei hantainigo sibomwa, huribe gom lol ginau n̄an kunia be kera ram lolira.

²God vi vevegi irahei be ram lol ginau den̄keten̄ke i tam iloe be non vevegi nu vavtutu.

³Gom bevegira be ran vuroga, ta giḡo mulei gon vuroga. Gom binibe gon dadariha be gov vano dagai nin silo vevegi non God?

⁴Kea nu tavuha i nu maḡemu lol alen̄ana, mwa hohovigo be gomen leahi, ta gom binihi bahivoi non togonai. Bisata gom hav gita te batoia be God mwa lol tavuhainigo be gomen leahi alen̄amwa i rahumwa.

⁵Ta kimiu gim bwatwasiga ta gim hav doron te didi leahi, i gim lol mulei vevegi wasi alumiu la gubwen̄i be kea vi lol lua non lolhoro. La gubwen̄i gea atatu n̄oto rav gita mwasin vevegi non God.

⁶God vi lol tavuha i vi vevegi atatu n̄oto vi hurin hano be ram lolia.

⁷Atatu rituai, be ram lol rahurahui ginau tavuha, rav togo huri lalaḡova non God, huri binihi marahi, i huri rahuana be nogonana sigai. God vi lai lalainira rahuana vai tuai.

⁸Ta atatu rituai ram binihi sagera. Ram barihai didi huri mwasigi i ram huri lete. God vi lai lalainira non vevegi i lolhoro.

⁹Vi lai hal hantai i ron̄ḡagarasi lalainira be ram lol hantai lalainira ira Jius i lalainira mulei be ram hav vora te ira Jius.

¹⁰Ta vi lai sarisari, sine togonai, i tamwata lalainira duluai be ram lol bavtutu lalainira ira Jius i lalainira mulei be ira vara dodolua nin Israel.

¹¹God mwa bevegi atatu duluai la hala gaituvwa.

¹²Atatu be ram hav haḡo te silo, i ram buroga rav vano, kunia be ram hav haḡo te silo. I kunia mulei kera gabe ram haḡo silo i ran vuroga, God vi vevegira vi hurin silo.

¹³Kunia be gim ron̄ silo, mwa hav lol te atatu be ramen vavtutu la lolmatan God. Kera n̄ano be ram ḡogonai silo, kera haḡea ran vavtutu maia.

¹⁴Kera gabe ira Lolobon̄i, ram hav haḡo te silo, ta ram habwea mwa maron̄ron̄o be ramen lol hano gabe silo mwa bevea, kea silo lalainira sibora.

¹⁵Ram lol seserainia be alolora ram ilo havanau nu vavtutu i nu lete, kunia be silo mwa avo huria. Ram lolia kunia mwa seserainia la nora lalaḡova i alen̄ara. Gubwen̄ rituai binihira mwa bevea lalainira be ram lol ginau lete, i gubwen̄ rituai binihira mwa bevea lalainira be ram lol bavtutu.

¹⁶Ginau n̄oto kerageki rav loli lol gubwen̄i be God, sivi Jisas Kraes, vi vevegi binihiv dahuligi non atatu. Roroi Tavuha gabe nam doretore huria mwa bev ginau kerageki.

¹⁷Kun hanigi hurigo? Gom uloinigo be Jiu. Gom do wasi la silo non Moses i gom av ravravwega be gom do sosori God.

¹⁸Gom binibe gom ilo hano be God mwa doronia be gov lolia. Huribe silo gea mwa bagahi kimiu huba, i kimiu gim binibe gim ḡita lua alen̄ vavtutu.

¹⁹Gom binibe hiḡo haḡea gitaḡoro non ira matagara i gaibula non atatu be ram dogo lol ute meto.

²⁰Gom binibe gov vagahi atat dadaloiga gin hano be nu vavtutu i gov vagahi ira naturirigi. Gom haḡo silo, i gom binibe gom ilo ginau n̄oto i gom haḡo mwasigi duluai.

²¹Gom bagahi atat dodolua, i ke huri hano be gom hav vagahigo tehe sibomwa? Gom bevea lalai atat dodolua be rasav sura tehe, ta hiḡo gom sura.

²²Gom bevea be rasav surai te tasalan atat dolua, i ke hiḡo gom surai tasalan atat dodolua. Gom hav doron te ira nun vatu, ke hiḡo gom sura lol tanon nora tataro.

²³Gom av ravravwega huri silo non God. Take gom lol busbusi lolmatan God be gom hav huri te non silo?

²⁴Kunia be ravrava sabuga mwa bevea be, “Bwatun be kimiu ira Jius, kera be ira Lolobon̄i ram avo bwarebware vai la ihan God.”

²⁵Kebe giv huri Silo, nomiu tav dovon̄a binihivanana vi vora abena. Kebe gom hav huri te Silo, kea mwa du kun be tav dovon̄a sigai radu lalainigo.

²⁶Be Lolobon̄i vwate mwa hav tav te dovon̄ana i mwa huri Silo, God mwa ḡitae kun be ran tav dovon̄ana sa sigai?

²⁷Ira Lolobon̄i rav vev bahivoi kimiu ira Jius huribe gim n̄andu Silo son̄o be ran tav dovon̄amiu. Take kera ram ḡogonai Silo len̄len̄a be ran hav tav te dovon̄ara.

²⁸Huribe rahumwa kun be hiḡo Jiu i tav dovon̄amwa mwa hav loligo tehe kun be mwasin Jiu.

²⁹Atatu be mwasin Jiu n̄ano kebe mwa bora ira Jiu alolona, mwasin tav dovon̄a mwa loliana alolomwa gin Vui Sabuga, vorate gin silo be mwa ravana. Atatu kunia mwa lai avkari nin God, ninia be vi laia nin atatu vuroi.