Read Hano Rom 3 Bible Online

Rom 3 - Hano bible

Rom 3

¹Ke kunhanigi ira Jius kera nora ginau rituai be atat dodolua nora sigai? Mwasin ginau te rituai huri tav dovon̄a?

²Uwe, mwasigi, mwa du lol hala duluai. Ginau be mwa du maragai haḡe geki: God mwa binihimwasigi ira vara ira Jius mai non vagahi.

³Kebe ira Jius ram hav binihi te marahinia, kea vi tuḡoro God nin ginau be mwa datauleo huria?

⁴Sigai! God vi garoinia vi vev mwasigi vi vut be sinombu duluai rav tentene. Kunia be ravrava sabuga mwa bevea be: “Giḡo gov maserasera huri mwasigi lol taro be ram bevegigo, tagaro giḡo gom haravira.”

⁵La mahavana be tam lol hala lete, kea mwa maserasera be God nu vavtutu. Ke tav vev dumwia be God kea nu lete be vi vevegi gida? (Inau nan avo kunia be atatu ras avo.)

⁶Sigai! Kebe God sihav vevegi te dum gida, kea sihav vevegi te dum ureure.

⁷Atatu vwate men vevea be, “Kebe nam dentene, mwa melmelo be mwa lai sarisari lalainia, bwatuna be noḡu tenteneana mwa seserai lua avoan mwasigi non God. Ke huri haro haḡea be nam bevegi kun be atat vuroga.”

⁸Kea kunia n̄ano be tav vevea be, “Gida tas lol hantai huria be tavuha vi mai.” Atatu rituai ram habwe tenteneana maira i ram bevea be kera ram bagahi ginau geki, take kera ram lol bahala ram hav lol te vevegi be kera ram laia.

⁹Gida ira Jius tan tavuha liu atat dodolua? Sigai! Gida tan vevea huba be ira Jius i kera be ira Lolobon̄i ran hovi duluai lol vuro.

¹⁰Ravrava sabuga mwa bevea be: “Atatu vwat sigai be mwa lol bavtutui ginau tagaro, atatu vwat sigai.

¹¹Atatu vwat sigai be mwa ḡita batoi ginau. Vwat sigai be mwa ḡita God huri buluiana.

¹²N̄oto ran van burigai dagai. Atatu duluai ran mai i atat vuroi. Atatu vwat sigai be mwa lol ginau tavuha, atat vwat sigai n̄an kunia.

¹³Halangara nu mahavan̄i gin malang vwavwa ram lol meara huri tenteneana. Nora avoana nu kun teltel gagasi.

¹⁴Bwan̄ora ran masiri gin vev hantai atatu i ram barihai atatu.

¹⁵Kera rav rovo vilehi huri be ramen wehi atatu.

¹⁶Vataha ute be ram bano ram la ram lol bwarebware vataha ginau i ram lol atatu ram ron̄ mwahantai.

¹⁷Ram len̄a be kun hanigi haḡea rav togo lol tamwata.

¹⁸Ram hav lai te binbinihi huri God.”

¹⁹Gida tam iloe be ira silo be ram eno kea nora be ram dogo halaten silo. Geki mwa du ḡoro avoana non atatu duluai be men tau ureure duluai aten silo vevegi non God,

²⁰bwatuna be atatu vwat sigai be vi lol vavtutu mai God be vi huri ira silo. Silo ram bagahi gida be tav ilo vuroda.

²¹Ta God non hala vwate be mwa lol atatu ram bavtutu maia lol taro be silo sigai, i kadogaha kea nu vagahi hala gea gabe silo mai ira hala ran vevea lalai gida.

²²God mwa lol atatu ram bavtutu maia sivi nora binihimwasigi garagusi alun Jisas Kraes. Geki mwasigi lalainira duluai be ram binihimwasigi Kraes, bwatuna be atatu duluai ran dadariha n̄ano:

²³N̄oto ran lol vuro i ran hav dadariha tehe huri sarisari non God,

²⁴i kera duluai ram doron be rav vavtutu mai God nin non tataro, gabe non hogoi be God nu hav volia tehe. Mwa du be rav ribwesira nin vuro sivi Kraes Jisas.

²⁵God nu laia la hala be vi vinihi kaburai vuro sivi binihimwasigi garagusi la dagan Jisas be nu mate. Geki mwa melmelo be God mwa lol hano nu vavtutu i nu tavuha, kunia tuai lol taro be nu togo ḡoḡonai i nu hav vevegi te atatu huri vurora.

²⁶Take kadogaha lol taroda, kea nu seserainia be alen̄ana nu vavtutu, i be nu lol atatu be ram binihimwasigi alun Jisas, atat vavtutu la lolmatana.

²⁷I ke ginau te vwate huria be tav av ravravwega huri gida siboda? Sigai! Huri hano haḡe sigai? Kea haḡea hala huri binihimwasigi garagusi be vi tuḡoro atatu nin avoan ravravwega, mwa hav vora te hala huribe ram dabe silo.

²⁸Gam bev bavtutuinia be atatu mwa lolian vavtutu mai God sivi binihimwasigi, vora te sivi binihi marahi silo.

²⁹I ke God kea God non ira Jius n̄ano? Ke kea nu hav vora te God non ira Lolobon̄i mulei? Uwe kunia,

³⁰bwatuna be kea God n̄an gaituvwa non kera duluai. Kea vi lol ira Jius rav vavtutu maia nin nora binihimwasigi garagusi i mwa lol ira Lolobon̄i ram bavtutu la hala n̄an gea sivi nora binihimwasigi garagusi.

³¹I ke gida tam lol bwarebware silo be tam huri halan binihimwasigi garagusi? Sigai! Binihi mwasigi mwa lol gida tav lol ginau be Silo mwa doronia.