Read Hano 1 Korin 11 Bible Online

1 Korin 11 - Hano bible

1 Korin 11

¹Giv huri maleleku kunia be nam huri malelen Kraes.

²Nam lol roroainigo huribe gom binihi dumwiau lol ginau duluai, i gon huri ira silo vagahi be nam laia lalai kimiu.

³Ta nam doronia be giv ilo ginau geki: Tomuai huri atamwani duluai kea Kraes, i tomuai huri vavine duluai kea ahoana, i tomuai huri Kraes kea God.

⁴Ihei be mwa dataro i mwa doretore huri Roroi Tavuha lol tataro bulbulu be mwa ḡagav bwatuna kea mwa lai busbusiana vai alun Kraes.

⁵Take ira vavine duluai be ram dataro i ram doretore huri Roroi Tavuha lol tataro bulbulu take mwa hav gagav te ḡoro bwatuna kea bwatun busbusiana lalai ahoana. Kea nu ḡun vavine be ram hiri kaburai iluna.

⁶Be vavine si hav gagav te ḡoro bwatuna nu tavuha be si bal dagai iluna. Take be vavine vi hiri bwatuna sage vi bal dagai iluna kea bwatun busbusiana, bwatun ginau geki kea vi bwabwan̄ ḡoro bwatuna.

⁷Take atamwani sihav gagav te ḡoro bwatuna, huribe kea mwasin nunun God sibona. Take vavine kea nunun atamwani sibona.

⁸Atamwani nu hav mai tehe nin vavine, take vavine nu mai nin atamwani.

⁹God barabe nu lol atamwani be vi vora non vavine, take nu lol vavine be vi vora non atamwani.

¹⁰Bwatun ginau geki, nu vavtutu n̄ano be vavine vi bwabwan̄ ḡoro bwatuna be men seserainia lalai ira enjel, be mwa dogo la liman ahoana.

¹¹Take lalai rahun atat binihimwasigi vavine mwa hav tu te sibona huri atamwani, i atamwani mwa hav tu te sibona huri vavine.

¹²Geki mwasigi huribe vavine nu mai nin atamwani, take mulei atamwani nu vora nin vavine. Take ginau duluai mwa mai nin God.

¹³Gov vinvinihi huri geki sibomwa. Nu tavuha huri vavine be vi tataro be mwa hav bwabwan̄ te ḡoro bwatuna?

¹⁴Rahuana ata lol ureure mulei mwa bagahi huria be ginau busbusi kebe atamwani mwa lin̄ iluna mwa du. Take ilu kea ginau tavuha huri vavine.

¹⁵Ilun vavine kea nu laiana lalainia kun gabe tutuḡoro huri bwatuna.

¹⁶Atatu rituai rav vigaigai radu huri ginau geki, take nai vevea be gida mai ira uloilua dodolua non God, nonda silo vagahi lealea.

¹⁷Lol ginau duluai geki nam bevea be nam hav avkari te kimiu, bwatuna be lol taro be gim mai utegaituvwa gim lol bwarebware liu nin lolian tavuha.

¹⁸Muana, nan ron̄oe be lol taro be gim bihabwehabwe kun gabe uloilua gim harabora, i nam binihimwasigi ginau rituai geki.

¹⁹(Si tavuha be gis haḡo alen̄ lealea alolomiu huribe vi melmelo be ihei haḡea mwa lol doroniva non God.)

²⁰Lol taro be gim mai utegaituvwa, gim hav gan te ginaganian sabuga la mwasin halana.

²¹Geki bwatuna be lol taro be gom ḡan ginau, vwate mwa ḡan gana i mwa hav hohov te tuana. Rituai ginaganiana be ram ḡania mwa hav dadariha tehe, take rituai ram mwinmwin daltale mwa liu.

²²Gov gan dum ginau ba mwinmwinu lol tanomwa mahaḡea! Huri hano gim hav binihi te marahi ira tuamiu lol uloilua non God? Mwa du be nav avkarigo? Nam hav avkarigo tehe huri ginau kerageki.

²³Silo vagahi be nam laia lalainigo kea nu dadariha mai silo vagahi be nam laia nin God: Lol bon̄i be mwa laiana na Jisas be men wehiana, mwa lai bereti,

²⁴i mwa lai avoan avkari huria. I mwa biha borae mwa bevea be, “Geki rebehiku; kea huri kimiu. Giv lolia kunia be giv binihi raduiau.”

²⁵La hala n̄an gea, atagun ginaganiana, Jisas mwa lai laha. Mwa bevea be, “Laha geki kea damean gara be nu masiri gin dagan mateanaḡu. Giv laia i giv mwinua i giv binihi raduiau.”

²⁶Vataha mahavana be gim ḡan bereti i gim mwin wai nin laha geki kea gim bev seserai mateanan varahuda vaivotu be vi mai mulei.

²⁷Ihei be mwa ḡan ginau sage mwa mwin wai lol lahan rahuana non Ratahigi be mwa lolia la hal hantai vi vevegiana huribe mwa buroga vai alun rebehin i dagan nonda Ratahigi.

²⁸Gov gitagita mulei irubwimwa amua gom siv gan bereti i amua gom siv mwinmwinu nin laha,

²⁹huribe ihei be mwa ḡan ginau sage mwa mwinmwin wai lol laha gea be mwa hav gita te batoia kea mwa lai silo vevegi aluna sibona.

³⁰Kea haḡea huri hano kera ivusi lol nom tatan̄ana ram haro, ram mandamanda i ram mate.

³¹Take be tav vevegi gida la hal vavtutu, God sihav vevegi te gida.

³²Take lol taro be God mwa bevegi gida, mwa lol ḡagaras gida huribe si hav lol te kaburai gida mai ureure.

³³Ira tuaku, lol taro be gim mai utegaituvwa be gimen gan ginau, giv hohov ira tuamiu.

³⁴Ihei be maro mwa gasia vi gan ginau lol imwana huribe lol taron togoan bulbulu gosav lai te silo vevegi non God alumwa sibomwa. Nai vevea huri hano be giv lolia lol taro be nav mai mulei.