Read Hano 1 Korin 13 Bible Online

1 Korin 13 - Hano bible

1 Korin 13

¹Kadogaha nav vagahigo gin raumatan ginau. Nav avo la avoan dodolua non atatu i non ira enjel. Take be nas hav haḡo te lolotabetabe, kea nan kun sin̄sin̄i be mwa sosobwero sage ginau vuroi vwate.

²Nav haḡo hogoi huri avoan vasinerani. Nav ilo n̄oto ginau dauhiligi non God i iloute duluai, i noḡu binihimwasigi garagusi be nav tagara dum vusi nin tanona.

³Take mai ginau n̄oto geki, lolotabetabe sigai, kea inau ginau vuroi n̄ano. Nav lai n̄oto hano be noḡu, i nav lai rebehiku kun gabe hogoi be vi tunuana. Take ginau n̄oto vwaina vi vora sigai huribe lolotabetabe sigai.

⁴Lolotabetabe kea i lin̄ mulei i lolo tavuha, tabeana vorate binbinihi hantai, vorate mwa bigaigai i vorate ravwegana.

⁵Lolotabetabe vorate alen̄ lete, i vorate bugurana, i mwa hav lolhoroi te atat dolua.

⁶Lolotabetabe vorate mwa binihi vahalana be nu loli. Lolotabetabe vorate mwa samwara gin hantai, take mwa samwara mai mwasigi.

⁷Lolotabetabe kea mosmosianana nu sigai; i non binihimwasigi garagusi, doronhohov, i mwa du wasigi ḡaoḡao.

⁸Lolotabetabe mwa hav nogo tehe. Ira hogoi huri avoan dau, take rav nogo. Ira hogoi huri avoan dodolua, take hogoi gea rav nogo. Hogoi huri mataisao take vi mai la nogonana.

⁹Binihiva be nonda iloute, nonda hogoi huri avoan dau vorate ran hav haraharai.

¹⁰Take lol taro be mwasin mwasigi vi mai, ginau be ram hav haraharai tehe rav nogo.

¹¹Lol taro be inau naturigi, nam avo kunbe inau naturigi, noḡu binbinihi kun gabe inau naturigi, i nam lol ginau n̄oto kun gabe naturigi. Lol taro be nam mai gi atat gaivua, nam mambui loliana non naturigi. Kunia mulei mai kamai.

¹²Kadogaha tam ḡita nunu be mwa hav melmelo tehe, kunia be tam ḡitae lol kilas gitagita, take tav gitae vi melmelo. Kadogaha nam ilo uduna n̄ano, take nav ilo duluainia, kunia be God nu iloau.

¹³I ginau gaitolu geki ram du rahurahu vai tuai: binihimwasigi garagusi, doronhovhov, i lolotabetabe. Ta ginau mutai alolora kea lolotabetabe.