Read Hano 1 Korin 15 Bible Online

1 Korin 15 - Hano bible

1 Korin 15

¹Ira tuaku, nam doronbe giv vinihi dum Roroi Tavuha be nan laia lalai kimiu. Gim lai Roroi Tavuha geki i giv tu wasigi aluna.

²Roroi be nan toretore huria lalai kimiu kea haḡea Roroi Tavuha. Roroi Tavuha geki vi varahugo batena be gom du wasigi aluna. Be sigai, gim binihimwasigi bonogai n̄ano.

³Nam lai lalainigo hano be nu mai lalaiau, be nu liu maragai: be Kraes nu mate huri vuroda, kun avoan sabuga mwa bevea be;

⁴mwa daviana take mwa domare mulei huri rahuana la gaitolun gubwen̄i kunia be avoan sabuga mwa bevea;

⁵nu visirai aben Pita mai ira hala han̄vul domwan gailima.

⁶Ataguna gea, atatu nu liu nin vudolua valima ran gitae lol taro n̄an gea. Rituai ram rahu garigi, take rituai ran mate.

⁷Vuri Semes mwa ḡitae i ataguna ira hala duluai.

⁸Nogonana haḡea inau nan gitae be nu visirai abeku kun gabe atatu be mwa hav vora te la tarona.

⁹I inau haḡea nogonana lol ira hala duluai. Nan hav dadariha tehe be rav uloilua gi hala, huribe nam lol bwarebware uloilua non God.

¹⁰Take hogoi non God mwa loliau nam bora kunia, i non hogoi lalaiau vorate mwa mai bonogai. Sigai! Nam lol rovoga wasi liu ira hala dodolua. (Take vorate inau mwasigi; take hogoi non God mwa dogo maiau.)

¹¹Be nav toretore lalainigo sage ira hala dodolua rav toretore lalainigo, gam doretore huri ginau gaituvwa n̄ano, i kea hano be tam binihimwasigi aluna.

¹²Kadogaha be tan toretore huria be Kraes nu tomare nin mateana, huri hano tavalumiu ram bevebe atatu rasav tomare te nin mateana, kea Kraes nu hav tomare nin mateana, huri hano tavalumiu ram bevebe atatu rasav tomare te dum nin mateana?

¹³Be atatu vwate si hav tomare te nin mateana, kea Kraes nu hav tomare tehe mulei.

¹⁴Be Kraes vorate nu tomare nin mateana, kea nonda toretore mwasin sigai, i nom binihiva mwasin sigai.

¹⁵I mulei, tam buroga be tam dentene vai alun God, huribe tam bev luae huria be nu tomarei Kraes nin mateana. Take be atatu rasav tomare tehe nin mateana, kea God vorate nu tomarei mulei Kraes.

¹⁶Be atat mate vorate ran rahu, kea Kraes mulei nu hav tomare te mulei.

¹⁷Be Kraes nu hav tomare tehe, kea binihimwasigi garagusi ginau tententene, giḡo gon vahala radu gin vuromwa.

¹⁸Take be Kraes nu hav tomare tehe nin mateana, ira atat binihimwasigi n̄oto be ran mate huba ran vano.

¹⁹Be nonda doronhohov alun Kraes huri rahuana n̄an geki, atatu n̄oto lol ureure ras hagav gida.

²⁰Take Kraes mwasigi nu tomare nin mateana muana i mwasigi be irahei be ram maturu lol mateana rav tomare kunia.

²¹Mateana mwa mai bwatun loliana non atat gaitutuvwai, take tomarean mulei nin mateana mwa mai mulei bwatun atat gaituvwa n̄ano.

²²Kun Adam gida n̄oto tav mate. La hala n̄an gea, lol Kraes gida tav tomare mulei nin mateana.

²³Take atatu n̄oto rav tomare huri rahuana la mwasin halana: Kraes kea nu tomare muana. Lol taro be Kraes vi mai mulei, kera be bilana rav tomare lol rahuana,

²⁴i nogonana vi mai. Lol taro gea Kraes vi lol kaburai ira tomuai, gitaḡoro, i ira muramura, i Kraes vi tau mulei ute ratahigi la liman God Tata.

²⁵Kraes vi gitaḡoro vaivotu be vi tau ira non ivwalu aten bwalagena.

²⁶Doren ivwalu be vi lolian kaburai vi mate.

²⁷Avoan sabuga mwa bevea be God nu tau ginau n̄oto aten bwalagena. Lol taro be mwa bevea be, “ginau n̄oto” ram dogo halatena, kea nu melmelo be mwa hav vev te God sibona. God n̄an gaituvwa be mwa dau ginau n̄oto aten Kraes.

²⁸Lol taro be ginau n̄oto vi tauana aten liman nituna, kea vi tau muleinia sibona halaten God, be nu tau ginau n̄oto halatena. Vuri God vi vora gitaḡoro huri ginau n̄oto.

²⁹Gom iloe be atatu be ram ḡaruhisabugai atatu be mwa rahu radu huri atatu be nu mate huba. Hano haḡea ram doronhohov be vi loli? Be mwasigi be atat mate ram hav tomare te mulei nin mateana, huri hano haḡea ram ḡaruhisabugai atat rahu huri atatu be nu mate huba.

³⁰I kun hanigi huri gida? Huri hano be tam dau gida lol ute hantai ḡaoḡao?

³¹Nav habwe mateana ḡaoḡao. Kea mwasigi, ira tuaku, nam samsamwara gin kimiu, huribe rahuda utegaituvwa lol Kraes Jisas nonda Ratahigi.

³²Be nav bwalo mai ira ginau turu ata Ivisas mai ira binihin atatu n̄ano, nasav lai te dum ginau vwate. Be atat mate rasav tomare te mulei, “tav gan ginau i tav mwinmwinu, huribe vaigogo tav mate.”

³³Gisav taltale tehe. “Mwemwearuv hantai vi lol bwarebware alen̄an mwemwearuva.”

³⁴Giv mai mulei la mwasin halan binbinihi i gisav mom buroga tehe, kimiu rituai giv busbusi huribe gim hav ilo te God.

³⁵Take vwate vi hudaligi be, “Kun hanigi haḡea atat mate ram domare? Hava rebehi haḡea be ras haḡoe?”

³⁶Atat bwaḡelega! Lol taro be gom riv biri, vi mate lol tano amua gim siv rahu ba mauri.

³⁷Lol taro be gom rivua, biri gea kolo maragai i nu ḡoru, kun birin bini sa koni. Biri gea si hav mauri tehe amua gim siv mate. Vi mai gi gai gaivua be mwa rahu huba.

³⁸Take God nu lai rebehi biri gea be nu vinihia, i God mwa lai lalai biri n̄oto rebehira mahaḡea.

³⁹Rebehin ginau rahu n̄oto vorate ran dadariha: Atatu rebehira dolua, ginau rahu nora dolua, manu nora dolua, i ige nora dolua.

⁴⁰Take tavuhanan ata amare kea lalan̄an vwate, i tavuhanan rebehi ata lol ureure dolua.

⁴¹Alo kea tavuhanana mahaḡea vwate, i vula mulei kunia, i ira visiu mulei nora dolua. I visiu gaitutuvwai ran dodolua nin tavuhanara gaitutuvwai.

⁴²Kea nu ḡun mateana be mwa domare nin mateana. Rebehi be mwa “daviana” vi hantai i vi boboga, take vi tomare huri rahuana be si hav hantai te dumwi.

⁴³Lol taro be nu “taviana,” kea nu hantai i nu mandamanda. Take lol taro be vi tomare mulei, kea nu muramuraga i nu hari.

⁴⁴Rebehi be nu “taviana,” kea rebehi vuroi n̄ano. Lol taro be mwa domareiana mulei, kea mwa mai gi rebehi lol vui. Huribe rebehi vuroi mwa dogo, rebehi lol vui mulei abena.

⁴⁵Nu ravana lol avoan sabuga be; “Muan atatu, Adam, kea muan atatu be nu lai rahuana, take nogonan Adam kea vui be mwa lai rahuana.

⁴⁶Vui mwa hav mai te muana, take rebehi vuroi i mwa siv vora rebehi lol vui.

⁴⁷Muan Adam nu mai nin taniavu ata lol ureure. Gairuan Adam mwa mai nin amare.

⁴⁸Ata lol ureure ran kun muan atatu lol ureure be mwa mai nin taniavu. Take kera be ata amare ran kun atatun ute amare.

⁴⁹Kunia be nu lol gida kun gabe atatun ureure, i gida mulei tai vora kun ata amare.”

⁵⁰Nam bevea kungeki ira tuaku, Rebehi i daga tanora sigai lol ute ratahigi non God. Rebehi be vi mate dumwi, si hav lai te dum rahuana be mosmosianana nu sigai. Take gitae! Nav vev ginau dahuligi geki lalainigo: Tasav maturu te n̄oto lol mateana, take tav leahi n̄oto.

⁵¹

⁵²Vi lai taro vwelvwele n̄ano kun mata be mwa ḡarabwin̄a, lol taro be mwa uvwiana na doren taiva. Taiva vi tatan̄i i kera be ran mate rav tomare mulei be rav rahu vai tuai, i gida duluai tav leahi.

⁵³Rebehi geki be vi lolian dum kaburai vi sagae gin ginau be si hav lolian te dum kaburai. I rebehi geki be mwa mate vi sagae gin ginau be si hav mate te dumwi.

⁵⁴Lol taro be ginau geki vi loli, rebehi be vi lolian kaburai vi sagae sibona ginia kebe si hav lolian te dum kaburai, i rebehi geki be vi mate vi sagae ginia kebe si hav mate te dumwi. Lol taro be vi loli, avoan sabuga vi lolian vi mai gi mwasigi: “Mateana vi lolian kaburai lol samwarana.”

⁵⁵“Mateana, nom samwarana behe? Mateana nom muramura huri lolian kaburai atatu behe?”

⁵⁶Muramuran mateana be mwa lol kaburai atatu kea mwa mai nin vuro, i muramuran vuro kea silo.

⁵⁷Take gam avkari God! Mwa lai samwarana lalai gida sivi Ratahigi Jisas Kraes.

⁵⁸Ira tuaku, giv tu wasigi. Gosav lin̄ te ginau vwate be vi leahigo. Gov lin̄ mulei duluainigo huri rovoga non God, huribe gom iloe be nom rovoga lol God mwa hav van te kaburai.