Read Hano 1 Korin 2 Bible Online

1 Korin 2 - Hano bible

1 Korin 2

¹Ira tuaku mai ira hogosiku, mahavana be nan mai huri kimiu be namen toretore huri avoan dahuligi non God, nan hav vev toretore tehe gin avoan lalavoa sa avoan ririhai.

²Lol taro be nan togo mai abemiu kimiu nan vinihia be nav avo n̄ano huri Jisas Kraes be ran voha bolvoloe alun volovolo.

³Batena be nan mai huri kimiu, nan mandamanda maragai, i nan matmatagu.

⁴Ira noḡu silo vagahi mai toretore nu hav vora te gin avoana vuroi alun mataisao non atatu be men lol atatu gim matagu take gin mwasigin mataisao be Vui mwa hogoinia.

⁵Geki mwa seserainia be nom butuana n̄ano vi tu alun muramura non God, take sihav vora te gin mataisao non atatu vuroi.

⁶Gaituvwa n̄an be nam avo lalainira gabe ram ilo halan ginau huba. Take mataisao geki nu hav vora te ata lol ureure geki, sage nin ira tomuai ata lol ureure geki gabe ran salai nora muramura huba.

⁷Nam avo gin mataisao dahuligi non God gabe mwa du dahuligi radu, take kea nu gita luae huri nonda lol roroai amua mwa siv tau ureure.

⁸Vwate nin ira tomuai ata lol ureure geki nu hav ilo te dum mataisao gea. Be ras ilo dum batoia, rasav voha te bolvolo Ratahigi roroa.

⁹Take kunia gabe mwa bevea lol ravrava sabuga be, “Geki atatu vwate nu hav gitae tehe, i atatu vwate nu hav ron̄oe te n̄an haḡea. Atatu vwate nu hav gita te batoia havanau be God mwa lol vatuvwainia hurira be ram dabea.”

¹⁰Take God mwa baseserai ginau geki sivi Vui Sabuga. Vui Sabuga mwa seserai lua ginau kera geki, vaivotu be ginau dahuligi non God.

¹¹Take nonda vui n̄ano be mwa dogo alolona mwa ilo tavuhai gida; la hala mulei gea, Vui Sabuga non God n̄ano mwa ilo tavuhai God.

¹²Kunia gida tam hav lai te Vui ata lol ureure; take tam lai Vui n̄ano be mwa mai nin God, huria be tav ilo dum havanau duluai be God mwa laia lalai gida.

¹³Take avoana n̄oto be tam avo aluna Vui Sabuga non God nu vagahi gida aluna, take mwa hav vora te gin mataisao non atatu vuroi. Take Vui Sabuga n̄an mulei gea mwa bului gida be tam bagahi ginau Sabuga lalai atat Sabuga.

¹⁴Atatu be Vui Sabuga sigai alolona si hav lai te dum ira hogoi be mwa mai nin Vui non God, bwatuna be ginau keragea ram bwaḡelega n̄ano lol matara.

¹⁵Atatu n̄ano be nu masiri gin Vui kea vi vevegi dum ginau duluai, take atatu vwate sihav vevegi te dumwia.

¹⁶Ravrava sabuga mwa bevea be, “Ihei haḡea mwa ilo binihin Ratahigi? Ihei haḡea be mwa lol dumwia be men lai avoan vagahia lalainia?” Take gida, binihinda nu kun Kraes.