Read Hano 1 Korin 3 Bible Online

1 Korin 3 - Hano bible

1 Korin 3

¹Ira tuaku mai ira hogosiku, tuai huba nan hav avo te mai kimiu kun gabe nam avo mai atatu be ran masiri gin Vui Sabuga. Nan avo mai kimiu kun gabe nam avo mai atatu be Vui Sabuga sigai, kun naturirigi lol binihimwasigi garagusi alun Kraes.

²Silo vagahi be nan laia lalai kimiu nu ḡun hun huhu, nu hav wasi tehe kun ginaganiana vuroi be nu wasi, huria be kimiu gisav lai te dum ginaganian wasi. I vaivotu be kadogaha kimiu gim hav lol te vatuvwai radu,

³bwatuna be kimiu gin hav masiri te radu gin Vui Sabuga. Binbinihi hantai mai vigaigaiana mwa du radu alolomiu, i geki mwa seserainia be vui sigai radu alolomiu. Kimiu gim lolia radu kun gabe sinombu ata lol ureure geki.

⁴Vwate alolomiu mwa bevea be, “Inau nam huri Pol,” i vwate mwa bevea be, “Inau nam huri Apolos.” Gim lol ginau kun alen̄an ata lol ureure geki?

⁵Matuke Apolos kea mwasin rau matana vwate? Sigai! Matuke Pol kea mwasin raumatana vwate? Sigai! Gida ira turin rovoga non God n̄an kunia gabe gam bului kimiu gin binihimwasigi. Gida gaitutuvwai vatvataha gida be tam lol rovoga be God mwa laia lalai gida be tav lolia.

⁶Inau nan riv biri, i Apolos mwa ruhua gin wai. Take God kea n̄an atatu gaituvwa be mwa lolia mwa mauri.

⁷Haḡe atatu gabe mwa rivua i atatu gabe mwa ruhua ramuru hav vora te mwasin raumatana, take God n̄ano mwa lolia mwa mauri.

⁸Ke gabe mwa rivua i kea gabe mwa ruhua raru dadariha n̄an, i gaitutuvwai vatvatahara vi lai tavwe huri non rovoga sibona.

⁹Gida duluai atatun rovoga non God, tam lol rovoga bulbulu haragaituvwa. Kimiu kun gabe ute loloara bilan God, i imwan God.

¹⁰Nam lalaḡo gin hogoi be God nu laia lalaiau, nam dari bwatbwatun imwa gea kun gabe mataisaon haḡohaḡo imwa. Atatun haḡohaḡo imwa dodolua be ram haḡo alun bwatbwatu n̄an gea, take sinombu duluai rav gitaḡoro kun hanigi ram haḡo imwa aluna.

¹¹Bwatbwatun imwa be nu haḡoana huba mwa eno kea Jisas Kraes, i atatu dolua vwate sihav mom dari te bwatbwatu dolua mulei vwate.

¹²Take be sinombu rav haḡo imwa alun bwatbwatu n̄an gea gin vatan̄oga, i vatlegiga, vatu sarisari, mai gai, mwanea sage bwatariu.

¹³Nora rovoga vi visirae ute melmelo, bwatuna be Gubwen̄ Vevegi non Kraes vi lai bisirainia ute melmelo. Gubwen̄i gea gabi gea vi lol seserainia be hava rovoga haḡea be nu loliana; gabi gea vi haḡo ron̄oe i vi seserai lua non mwasigi sage non hantai.

¹⁴Be imwa be nu haḡoana la mwasin bwatbwatuna mwa du radu wasigi, atatun haḡohaḡo imwa vi lai tavwe huria.

¹⁵Take be imwa nu onda kaburai, atatun haḡohaḡo imwa vi ron̄ ḡagarasi liu; atatun haḡohaḡo imwa vi rahu, take vivora kun be mwa mwalue surai nin gabi.

¹⁶Matuke gim hav iloe tehe be kimiu imwa tataro non God i be kunia Vui Sabuga non God mwa dogo alolomiu.

¹⁷Be ihei tehe be mwa salan̄ai kaburai imwa tataro non God, kunia God vi lol kaburai wani gea mulei, bwatuna be imwa tataro non God nu sabuga i giḡo haḡea imwa tataro gea.

¹⁸Gosav taltale te sibomwa! Be gomen vinihia be giḡo haḡea mataisao vai lol ureure geki, take gov lago kun gabe bwaḡele huri be gov mai dumwi gi mataisao mwasigi.

¹⁹Bwatuna be mataisao ata lol ureure geki lalai God kea mwa bora ginau bwaḡelega. Mwa bevea lol ravrava sabuga be, “Kea mwa lai dumwira be ram sani la nora vidi sibora gin nora mataisao.”

²⁰Mwa ravae mulei lol ravrava sabuga be, “Ratahigi mwa ilo hava binihiv mataisaoga be binihira mwa binihia i kea nu ḡun mauvin lan̄i n̄an vuroi.”

²¹Atatu vwate sihav sagea te la havanau be mwa lolia. Ginau n̄oto kea nomwa:

²²Pol, Apolos mai Pita; ureure geki, rahuana i mateana, gubwen̄i garigi i vainon̄oiha geki duluai nomiu,

²³kimiu bilan Kraes, i Kraes kea bilan God.