Read Hano 1 Korin 5 Bible Online

1 Korin 5 - Hano bible

1 Korin 5

¹Mwasigi mwa beveana kunia be vuro lol davolamiu alun rebehi mai rebehi nu hav tavuha tehe, i ira len̄len̄aga ram hav lolia tehe kunia. Atatu vwate aia mwa lai mulei tasalan tamana.

²Huri hano gom sasagerega? Mwa du be kimiu giv masiri gin ron̄ mwahantai huria be atatu be mwa lolia kungeki vi tauana dagai nin tatan̄ana be gim dogo huba alolona.

³Inau nam hav togo te mai kimiu lol rebehin vihogoi, take inau nam dogo abemiu lol vui. I nan vevegi atatu gea huba be nu lol bwatigoro kun gabe rebehiku mwasigi aia mai kimiu. I mahavana be gim ḡoḡo bulbulu lol ihan Ratahigi gida Jisas, i nam bisogari mai kimiu lol vui gin muramura nonda Ratahigi Jisas.

⁵Kimiu giv tau atatu gea la liman Setan be rebehina vi vano. I aia vurona sibona mwa binihi kaburaiana, i non vui rahu vi rahu lol gubwen̄in Ratahigi.

⁶Nom avoan sasagerega ivusi butbutui nu hav tavuha tehe. Kimiu giv ilo avoana geki, “Marahan is kolo n̄ano mwa lol vulaoa mwa buge maragai tanona mwa masiri latlate.”

⁷Gov lai dagai is maleiga n̄oton̄oto huri vuro huribe goi vora rebehi gara n̄oton̄oto. Gov mai kun vulaoa huri bereti be mwa buge gaivua. Nam iloe be hiḡo kunia huba. Gada bereti huri Samsamwaran Halbisḡalau mwa du vatuvwai huba huribe Kraes be sipsip huri nonda Halbisḡalau, kea nu lin̄ mulei rebehina gi tataroi tuntun.

⁸Haḡe kunia gida tav lol nonda Halbisḡalau geki, take sihav vora te mai bereti be is maleiga alolona, take is huri vuro mai mandamanda. Tav samwarai ginaganian lavoa geki mai bereti be is sigai alolona bereti huri tavuha i mwasigi.

⁹Nan ravae lalainigo la muan noḡu ravrava be gosav bulbulu tehe maira be ram buroga alun rebehi mai rebehi.

¹⁰Take nam hav vevea te gin binihiva be gosav bulbulu te maira be ata lol ureure geki be ram buroga rebehi mai rebehi, sage mai ira bugurana, sage susurana, sage maira be ram ḡogonai nun vatu. Be gomen mwalue ninira mwa du be gov lin̄ ureure geki.

¹¹Nam ravrava geki be namen vevea lalainigo be gosav bulbulu te maira be ram uloinira sibora be binihimwasigi lol Kraes take ram buroga lol rebehi mai rebehi, sage ram bugura, sage ram susura, sage ram ḡogonai nun vatu, sage ram sani atat dolua gin nora avoana, sage ram mwin wai taltale, sage ram ruruhi atat dodolua. Mwa du be gosav gan te ginau mai sinombu be kera kunia.

¹²Nu hav vora te noḡu be namen vevegi atatu kera gabe ram hav vora te ata lol uloilua. God vi vevegira. Take gov vevegi dum atatu be gim dogo utegaituvwa. Ravrava sabuga mwa bevea be, “Mwa du be gov tau dagai atat vuroga be ram dogo maigo lol tatan̄ana.”