Read Hano 2 Korin 10 Bible Online

2 Korin 10 - Hano bible

2 Korin 10

¹Inau, Pol, nam hudali kimiu gin alen̄ maḡemu i alen̄ tavuha non Kraes. Atatu rituai ram bevea be nam lolia mwa maron̄ron̄o alumiu batena be inau mai kimiu i nam lol alen̄ wasi baten be nam do dagai.

²Ram binihia be kamai gam dogo la halan ureure, i nam lol hala be nav wasi maragai maira baten be nav mai. Nam hudali kimiu be batena be nai mai nam hav doron tehe be nav lol alen̄ wasi mai kimiu.

³Gam dogo lol ureure, take gam hav bwalo tehe la hala be ureure mwa bwalo.

⁴Gam bwalo gin haḡohaḡon bwaloana be ureure mwa bwalo ginira. Nomai haḡohaḡon bwaloana gam haḡo muramura nin God kea be vi lol kaburai dum tanon ivwalu be nu wasi. Gam lol kaburai dum vigaigaiana ivusi,

⁵i ginau ravravwega be ram lin̄ i ram ron̄ maḡemu huri Kraes.

⁶Gam lol vatuvwai be gai vevegi ihei tehe aia be mwa hav ron̄ te maḡemu, take muana gan av mai kimiu be giv masiri gin non maḡemu.

⁷Giv garere huri ira lalaḡova be ran loli lol matamiu. Be giv binihi dumwia be kamai mulei bilan Kraes kun kimiu.

⁸Mwasigi be gam sasagerega huri roron̄o be Ratahigi nu laia lalai kamai. Take roron̄o geki be vi voha kimiu giv hamai amare, si hav wehi te kimiu vai ata, i nasav busbusi tehe.

⁹Nam hav doron tehe be giv binihia be nam lol ron̄oe be nav lol kimiu giv matagu mai noḡu ravrava.

¹⁰Atat rituai ram bevea be, “Ravrava non Pol mwa ron̄oana be raumatan ravrava i ram muramuraga, take bwatuna be kea abeda nu mandamanda. I non avoana mwa hav vora te ginau vwate”

¹¹Mwa du be rav iloe be: Gam hav togo tehe bul mai kimiu kadogaha, i kunia gam bev ginau kera uhu alolon ravrava. Take batena be kamai aia mai kimiu, gav seserai roron̄o be gam ravae lol nomai ira ravrava.

¹²Gam n̄arin̄ari gam dadarihai kamai sibomai maira be ram binihia sibora be kera muan atatu. Kera sibora ram dadarihainira alura sibora, i ram harahara lalainira sibora be kera kunia. Geki mwa seserainia be ram hav ilo te havanau.

¹³Take kamai gav av sasagerega huri ginau avare nin rovoga be nu laian lalai kamai be gav lolia. Gav tau matavwen nomai avoan sasagerega mai rovoga be God nu hagainia lalai kamai, geki mai nomai rovoga mai kimiu.

¹⁴Gam hav av te sasagerega maragai, kunia be mwa du be gav lolia be gan hav mai te radu vai abemiu. Take gan mai vai abemiu mai Leo Tavuha huri Kraes.

¹⁵Gam dau matavwen nomai avoan ravravwega alun rovoga be nomwa, nu hav vora te havanau be atat dodolua ran lolia huba. Gam doronhohov be nomiu binihimwasigi garagusi vi mauri rahurahu, kimiu giv bului nomai rovoga be vi mauri gaivua maragai.

¹⁶Gam doron be gai vev Roroi Tavuha lol ara haltavalun nomiu bwatutun Vanua. Gam hav doron tehe be gav sage kamai huri rovoga be gan lolira huba lol ara non atat dodolua.

¹⁷Take be, “Tuara vwate mwa doron be vi av sasagerega, vi sage Ratahigi.”

¹⁸Nu hav vora te kera be ram binihira sibora be ran vavtutu be ran tavuha, take kera be Ratahigi mwa binihira be ran vavtutu.