Read Hano 2 Korin 13 Bible Online

2 Korin 13 - Hano bible

2 Korin 13

¹Nai mai vai abemiu vatoluna. “Ginau duluai be vi avoiana take mwa du be vi vora dovon̄ana be vi vora mat gita gairuruai sa gaitolu.”

²Batena be nan togo mai kimiu varuana, nan lai avoan vamata lalainira be ran lol bwatigoro. Kadogaha inau nam do dagai nin kimiu, i nam lai avoan vamata lalainira rituai. Batena be nai mai mulei vai abemiu, nasav maron̄ron̄o tehe lalainira.

³Gim doron dovon̄ana be Kraes mwa avo siviau. Noḡu dovon̄ana be kea mwa hav mandamanda tehe alolomiu, take kea nu masiri gin muramura.

⁴Kea mwasigi be nu mandamanda batena be nu mate alun volovolo, take mwa rahu kadogaha gin muramura non God. Kea mwasigi be kamai gam mandamanda lol Kraes, take huri kimiu kamai gam rahu alolon Kraes gin muramura non God.

⁵Giv gitagita tavuhai kimiu sibomiu. Giv haḡo ron̄ kimiu giv gitae be gim dogo lol binihimwasigi garagusi. Gim iloe be Kraes Jisas kea alolomiu be gim hovi be giv haḡo ron̄ kimiu.

⁶Take nam doronhohov be giv gitae be kamai sibomai gan hav hovi tehe gin haḡo ron̄o.

⁷Gam dataro lalai God be gisav lol te havanau be nu vahala. Nu hav vora te muan ginau be vi gitana be gan van sivi dum haḡo ron̄o, take muan ginau be vi gitana be kimiu gim lol havanau be nu vavtutu, gaituvwa be gitanana kun be kamai gan hovi.

⁸Gasav lol te dum havanau ḡoro mwasigi.

⁹Gam ron̄ mwandavuha be gav beuga, be kimiu giv mai wasi, i gam dataro be giv mai gi atat duluai.

¹⁰Nam rav ravrava uhu batena be nam dogo dagai nin kimiu huria be batena be nav mai take nasav wasi tehe mai noḡu roron̄o mai kimiu. Ratahigi nu lai roron̄o geki be vi voha kimiu giv hamai amare, take mwa hav vora te huria be vi haḡo bahivoi kimiu.

¹¹Kadogaha, ira tuaku nam bevea be tai vilin̄lin̄i. Giv lol ron̄oe be giv mai gi atat duluai. Giv lol havanau be nan hudali kimiu be giv togo lol tamwata. Vuvuri God be kea lolotabetabe i tamwata vi togo mai kimiu.

¹²Giv lai ḡoḡo gaitutuvwai alolomiu gin bulbul tagai sabuga.

¹³Sinombu sabuga non God duluai, ram hora nora avoan helheloi lalai kimiu.

¹⁴Hogoi non nonda Ratahigi Jisas Kraes, tabetabe non God, bulbul tavuha non Vui Sabuga, vi togo mai kimiu duluai.